قىسقامەتراجدى فيلم
قازاقستان مەن فرانسيانىڭ بىرلەسكەن جوباسى - «ءتاڭىر قىزى» قىسقامەتراجدى ءفيلمى ماڭعىستاۋدا تۇسىرىلەدى. بۇل تۋرالى قوعامدىق كوممۋنيكاسيا ورتالىعىندا وتكەن بريفينگىدە ءفيلمنىڭ رەجيسسورى دانا مۋسا ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
قىسقامەتراجدى ءارت-فيلمنىڭ يدەياسى – كەڭ بايتاق قازاق دالاسىندا ەرتەدە تاراعان تاڭىرشىلدىك نانىم-سەنىمىن جانە ايەل ادامنىڭ قوعامداعى ورنىن كورسەتۋگە باعىتتالعان.
«فيلم ءتۇسىرىلىمى ماڭعىستاۋ وبلىسىندا 21 تامىزدا باستالىپ، ءبىر اپتاعا سوزىلادى. وسىعان دەيىن تۇسىرىلگەن «كيەلى بي» ءفيلمىنىڭ ءتۇسىرىلىمى دە كيەلى ولكەدە وتكەن ەدى. ەكىنشى جوبامىزدى دا ءبىرىنشى جوباداعى كوماندامەن باستاپ وتىرمىز. فيلم وپەراتورى الەكساندر مەرفي دە ماڭعىستاۋ ولكەسى تابيعاتىنىڭ سۇلۋلىعى قايتالانباس، بىرەگەي ەكەنىن ايتىپ، تاڭعالدى. الەمنىڭ ءبىراز ەلىن ارالاعان ادامنان مۇنداي باعا الۋ – مەن ءۇشىن ماقتانىش»، - دەدى دانا مۋسا.
فيلم – قازاقستان مەن فرانسيانىڭ بىرلەسكەن جۇمىسى. وندا قارت باقسىنىڭ ءوز قاسيەتىن كەيىنگى ۇرپاققا مۇراعا قالدىرۋ جايى كورسەتىلەدى. بويىندا كۇش-قۋاتىن جوعالتقان قاريا ءوزىنىڭ سالتتىق ءبيىن جاس قىزعا بەرەدى. وسىلايشا، ول قىز رۋدىڭ تاريحىن جالعاستىرا الادى، اتا-بابا رۋحتارىمەن بايلانىستا بولادى.
فرانسيا پروديۋسەرى سەباستيان لاگلەزدىڭ ايتۋىنشا، ءفيلمنىڭ ۇزاقتىعى 15-20 مينۋت. دايىن فيلم 2023 جىلدىڭ كوكتەمىندە قالىڭ كورەرمەنگە جول تارتادى. قىسقامەتراجدى ارت-فيلم بي سالاسىنداعى كونكۋرستىق كينوفەستيۆالدەرمەن قاتار، مۋزەيدە دە ەرەكشە لايف-پەرفورمانس نۇسقادا كورسەتىلمەك.