ەلوردادا 2-4 تامىز كۇندەرى قازاقستان-اۋعانستان بيزنەس فورۋمى وتەدى. بۇل تۋرالى سىرتقى ىستەر ءمينيسترىنىڭ ورىنباسارى قانات تۋمىش ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2-4 تامىز ارالىعىندا استانا قالاسىندا قازاقستان-اۋعانستان بيزنەس فورۋمى وتەدى. ءىس-شاراعا ەكى ەلدىڭ مەملەكەتتىك ورگاندارى، كۆازيمەملەكەتتىك سەكتور مەن ىسكەرلىك توپتاردىڭ 400-دەن اسا وكىلى قاتىسادى. قازاقستان مەن اۋعانستان اراسىنداعى قاتىناس تاتۋ كورشىلىك، ءوزارا سەنىم مەن ءتيىمدى ىنتىماقتاستىققا نەگىزدەلگەن. قازاقستان مەن اۋعانستان حالىقتارى - تاريحي تامىرى ورتاق، ەجەلدەن بەرى ءبىر ايماقتى مەكەندەپ كەلە جاتقان كورشىلەس، ءسالت-داستۇرى مەن تاعامدارى ۇقساس ەلدەر. اۋعان حالقى دا بىزدەر سەكىلدى ءال-فارابيدى ماقتان تۇتىپ، ءوز اتا-باباسى رەتىندە قارايدى»، - دەدى قانات تۋمىش سىرتقى ىستەر مينيسترلىگىندە وتكەن بريفينگتە.
سونىمەن قاتار ول اۋعانستان حالقى شىن مانىندە تەرەڭ تاريحى مەن مادەنيەتى دامىعان ەل ەكەندىگىن باسا ايتتى.
«ولاردىڭ قاتارىنان يسلام وركەنيەتىنىڭ التىن عاسىرلارىندا كوپتەگەن عۇلاما شىققان بولاتىن. جالپى، اۋعاندىقتار وتە ەڭبەكقور حالىق، كەرەمەت قولونەرشىلەر، زەرگەرلەر، ديقانشىلار. قازاقستان اۋعانستاننىڭ تاۋەلسىز، بەيبىت، بەيتاراپتى دەموكراتيالىق جانە گۇلدەنگەن ەل رەتىندە دامىعانىن قالايدى»، - دەدى مينيستر ورىنباسارى.