الماتىنىڭ اكىمى سونداي كەڭەس قۇردى.
الماتى قالاسىنىڭ ساۋلەت-قۇرىلىس سالاسىنداعى ولقىلىقتارىن اكىمدىك جانىنان قۇرىلعان كەڭەس ارقىلى رەتتەۋ كوزدەلىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى قازاقستان ساۋلەتشىلەر وداعىنىڭ پرەزيدەنتى سەرىك سۇلتانعالي ورتالىق كوممۋنيكاسيالار قىزمەتىندە وتكەن بريفينگتە ايتتى.
تاۋەلسىزدىكتىڭ 30 جىلىندا ەلدە ارحيتەكتورلاردىڭ مارتەبەسى سىن كوتەرمەيتىندەي دەڭگەيگە ءتۇسىپ كەتكەنىن ماسەلە ەتىپ كوتەرگەن وداق باسشىسى سالادا قوردالانعان ماسەلەلەردىڭ ءبارىن ءتىزىپ، پرەزيدەنتكە جۇگىنگەندەرىن ەسكە سالدى.
«پرەزيدەنت قاسىم-جومارت كەمەلۇلىنا جازعان حاتىمدا مەن ساۋلەت سالاسىنداعى ماسەلەلەردى كوتەرە وتىرىپ، الماتى قالاسىن مىسالعا كەلتىردىم. وڭتۇستىك استانامىز – كوپ ادام ءۇشىن سۇيىكتى قالا. ءقازىر «نۇكتەلى قۇرىلىس»، «نىعىزداۋشى قۇرىلىس» دەپ اتاپ جۇرگەن جوبالار الماتىنىڭ ەڭ باستى پروبلەماسى – سەيسميكانى ەسكەرمەي ىسكە اسىرىلىپ كەلدى. كوپ قاباتتى ۇيلەردىڭ، شەكتەن تىس بيىك ۇيلەردىڭ كوپتەپ سالىنۋى ارحيتەكتورلاردى عانا ەمەس، وسى باسسىزدىقتاردىڭ اراسىندا تىرشىلىك كەشىپ جاتقان قالانىڭ قاراپايىم تۇرعىندارىن دا الاڭداتىپ وتىر»، - دەدى سەرىك سۇلتانعالي.
سونداي-اق، ول قۇرىلىستىڭ ساۋاتتى جوسپارلانباۋى سالدارىنان الماتىنىڭ ينفراقۇرىلىمىنا دا زيان كەلگەنىن اتاپ ءوتتى.
«نىعىزداۋشى قۇرىلىس» جەلەۋىمەن سكۆەرلەر، تۇراقتار ءسۇرىلىپ كەتتى. ارينە، ءدال ءقازىر ول ءىس تارتىپكە كەلىڭكىرەي باستادى. نەگە بۇلاي بولىپ كەلدى؟ ويتكەنى، ەڭ باستى قۇرال – اكىمدىك جانىنان جۇمىس ىستەيتىن قالا قۇرىلىسىنىڭ كەڭەسى بولعان جوق. الماتىنىڭ اكىمى سونداي كەڭەستى قۇردى. 1 تامىزدان باستاپ سول كەڭەس جۇمىس ىستەي باستايدى»، - دەدى وداق ءتوراعاسى.
بۇعان دەيىن نۇر-سۇلتان قالاسىنىڭ ساۋلەتتىك قۇرىلىسىن جوسپارلاۋ ەرەجەسى بەكىتىلگەن بولاتىن.