19 مىڭعا جۋىق تالاپكەر قاتىستى
تامىز ايىنداعى ۇلتتىق ءبىرىڭعاي تەستىلەۋگە (ۇبت) 19 مىڭعا جۋىق تالاپكەر قاتىستى، دەپ حابارلايدى Almaty-akshamy.kz ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
19 مىڭعا جۋىق تۇلەكتىڭ 69% قازاق تىلىندە، 31% جۋىعى ورىس تىلىندە، 0،1% اعىلشىن تىلىندە تەستىلەۋدەن ءوتتى. ايتا كەتەيىك، تامىزداعى ۇبت سەرتيفيكاتىمەن تالاپكەرلەر جوعارى وقۋ ورىندارىنا اقىلى نەگىزدە وقۋعا تۇسە الادى.
تەستىلەۋ قورىتىندىسى بويىنشا 10 مىڭ تالاپكەر شەكتى بالل جيناي الدى، بۇل – قاتىسۋشىلاردىڭ جالپى سانىنىڭ شامامەن 54% قۇرايدى. ۇبت ورتاشا بالى 58 بالدى قۇرادى. ەڭ جوعارى بالل – 128.
ۇبت وتكىزۋ بارىسىندا 118 قاتىسۋشىنىڭ ناتيجەسى جويىلدى. ونىڭ ىشىندە 39 ازامات سمارتفون، شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلعان. قالعان 79 ادام تەستىلەۋ كەزىندە ەرەجەلەردى بۇزىپ، اۋديتوريادان شىعارىلعان. ولاردىڭ دا تەست ناتيجەسى جويىلدى.
«تالاپكەرلەردىڭ تاڭداۋى وزگەرىسسىز قالىپ تۇر. بارلىق قاتىسۋشىلاردىڭ 21% «ماتەماتيكا-فيزيكا» كومبيناسياسىن، 20% «حيميا-بيولوگيا» كومبيناسياسىن تاڭداعان. «حيميا-فيزيكا» پاندەر كومبيناسياسىن تەك 39 تالاپكەر تاپسىردى»، – دەدى ق ر عجب ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەسكە سالايىق، تەستىلەۋ قورىتىندىسىمەن كەلىسپەگەن تالاپكەر اپەللياسياعا ەلەكتروندى فورماتتا ءوتىنىش بەرە الادى. تامىزدا ۇبت تاپسىرعانداردان اپەللياسياعا 2 مىڭنان استام ءوتىنىش تۇسكەن. ولاردىڭ ىشىندە 2 تەست تاپسىرماسى قاناعاتتاندىرىلدى. رەسپۋبليكالىق اپەللياسيالىق كوميسسيا جۇمىسىن اياقتادى، تالاپكەرلەردىڭ سەرتيفيكاتتارى جەكە كابينەتتە قولجەتىمدى.
تامىز ايىنداعى ۇبت شەكتى بالل جيناي الماعان تالاپكەرلەردىڭ تەستىلەۋدەن قايتا ءوتىپ، جوو-عا اقىلى نەگىزدە ءتۇسۋ مۇمكىندىگى بولۋى ءۇشىن وتكىزىلەدى. سونىمەن قاتار جوو-دا اقىلى نەگىزدە ءوز ماماندىعى بويىنشا وقۋدى جالعاستىرۋدى جوسپارلاپ وتىرعان كوللەدج تۇلەكتەرى وقۋعا اڭگىمەلەسۋ قورىتىندىسى بويىنشا قابىلدانادى.