تامىز ايىندا ىشكى نارىقتى قامتاماسىز ەتۋ ءۇشىن قانت جەتكىلىكتى

اۋىل شارۋاشىلىعى ءمينيسترى ەربول قاراشوكەيەۆ ىشكى نارىقتى قانتپەن قامتاماسىز ەتۋ  جايلى ايتتى.

رەسپۋبليكا بويىنشا تامىز ايىنىڭ سوڭىندا قانتتىڭ جالپى قورى 118 مىڭ توننانى قۇرايدى، دەپ حابارلايدى Almaty-akshamy.kz

ءمينيستردىڭ ايتۋىنشا، شىلدە ايىنىڭ باسىندا رەسپۋبليكاداعى قانت قورى 28 مىڭ توننانى قۇراعان. ايدىڭ سوڭىنا دەيىن 37 مىڭ توننا قانت وندىرىلەدى دەپ بولجانىپ وتىر.

«كۆوتا اياسىندا يمپورت كولەمى 33،3 مىڭ توننانى قۇرايدى. وسىلايشا ىشكى قاجەتتىلىك 69،8 مىڭ توننا بولسا، قانتتىڭ جالپى قورى 98،1 مىڭ توننا بولادى دەپ كۇتىلۋدە. شىلدە ايىندا قانت زاۋىتتارىنداعى قانت قۇراعىنان قانت ءوندىرۋ كولەمىن ەسكەرسەك، قانت كولەمى جەتكىلىكتى. ءوز-وزىمىزدى قامتاماسىز ەتە الامىز»، - دەدى قاراشوكەيەۆ.

ول تامىز ايىنداعى قانتقا بولجامدى قاجەتتىلىك 69،8 مىڭ توننا ەكەنىن اتاپ ءوتتى.

«بۇل - تۇتىنۋدىڭ ەڭ جوعارعى كولەمى. تامىزدىڭ باسىندا رەسپۋبليكا بويىنشا قانت قورى 35 مىڭ توننا بولجانىپ وتىر. 42،2 مىڭ توننا قانت يمپورتتالادى دەپ كۇتىلۋدە. اكىمدىكتەر قورىن ەسكەرسەك، رەسپۋبليكا بويىنشا قانتتىڭ جالپى قورى تامىز ايىنىڭ اياعىنا دەيىن 118 مىڭ توننانى قۇرايدى دەپ جوسپارلانۋدا. سول سەبەپتى وسى شىلدە-تامىز ايلارىندا ءوزىمىزدى قامتاماسىز ەتۋ ءۇشىن قانت قورى جەتكىلىكتى»، - دەدى مينيستر.

قاراشوكەيەۆتىڭ ايتۋىنشا، رەسپۋبليكا بويىنشا قانت بالانسى وڭ سالدونى كورسەتكەن. بيىل قاڭتار ايىنان باستاپ وتاندىق قانت زاۋىتتارى 120 مىڭ توننا قۇراق شيكىزاتىنان قانت ءوندىردى. بۇل وتكەن جىلدىڭ ۇقساس كەزەڭىمەن سلىستىرعاندا 19 پايىزعا ارتىق.