بيىل تامىز ايىندا موڭعوليا ەلىنىڭ استاناسى ۇلان-باتىر قالاسىندا الەم ايەلدەرىنىڭ كونگرەسى وتەدى. بۇل تۋرالى بۇگىن شىۇ پليۋس وتىرىسىندا موڭعوليا پرەزيدەنتى ۋحنااگيينا حۋرەلسۋحان ءمالىم ەتتى، دەپ حابارلايدى اlmaty-akshamy.kz.
«شىۇ پليۋس» فورماتىنداعى وتىرىستا شانحاي ىنتىماقتاستىق ۇيىمىنا باقىلاۋشى ەلدەردىڭ پرەزيدەنتتەرى دە ءسوز الىپ جاتىر. ءوز سوزىندە ۋحنااگيينا حۋرەلسۋحان دامۋدىڭ جاڭا دەڭگەيىنە بەت العان موڭعوليا جان-جاقتى ىنتىماقتاستىققا دايىن ەكەنىن حابارلادى.
«جۋىردا موڭعوليادا پارلامەنت سايلاۋى ءوتتى. ءقازىر بىزدە جاڭا ۇكىمەتتى جاساقتاۋ پروسەسسى ءجۇرىپ جاتىر. موڭعوليا بەيبىتسۇيگىش جانە اشىق مەملەكەت. جانە تەك قانا ەكى جاقتى عانا ەمەس، كوپ جاقتى ىنتىماقتاستىققا اشىق ەل»، - دەدى ول.
وڭتايلى ءساتتى پايدالانا وتىرىپ ۋحنااگيينا حۋرەلسۋحان موڭعوليانىڭ اتقارىپ جاتقان ساياسي-گۋمانيتارلىق شارالارى تۋرالى ايتتى. ماسەلەن، ول اتاپ وتكەندەي، ءقازىر موڭعوليا ميلليارد اعاش ەگۋ تۋرالى يدەيانى ىسكە اسىرىپ جاتىر.
«سونىمەن قاتار، موڭعوليا بيىل تامىز ايىندا بۇۇ اياسىندا ۇلان-باتىردا الەم ايەلدەرىنىڭ كونگرەسسىن وتكىزەدى. وعان بۇكىل الەم ەلدەرىنىڭ ءتۇرلى نازىك جاندىلارى جينالادى»، - دەپ حابارلادى ول.