ەلوردادا تۋريزم جانە سپورت مينيسترلىگىنىڭ القا وتىرىسى ءوتتى. وعان ق ر پرەمەر-مينيسترىنىڭ ورىنباسارى تامارا دۇيسەنوۆا، پارلامەنت دەپۋتاتتارى، سالالىق ۆەدومستۆو باسشىلارى مەن ساراپشىلار قاتىستى، دەپ حابارلايدى almaty-akshamy.kz
تۋريزم جانە سپورت ءمينيسترى ەرمەك مارجىقپايەۆ وتكەن جىلدىڭ ناتيجەلەرى مەن بيىل اتقارىلاتىن شارۋالار جوسپارى تۋرالى ايتىپ بەردى. ول ەلدە سپورتپەن شۇعىلداناتىندار قاتارى تۇراقتى تۇردە ءوسىپ جاتقانىن اتاپ ءوتتى: 2023 جىلى ولاردىڭ سانى 510 مىڭ ادامعا كوبەيگەن. الايدا سالادا نازار اۋدارارلىق ماسەلەلەر دە بار. سالانى دامىتۋ ءۇشىن جاڭا كوزقاراس كەرەك. اسىرەسە بۇقارالىق سپورتتى دارىپتەۋگە قاتىستى. وڭىرلەر بيۋدجەتتەن بولەتىن قاراجات كولەمىنىڭ جەتكىلىكسىز ەكەنى ايتىلدى.
«حالىقارالىق تاجىريبەگە ساي بۇقارالىق سپورتتى دامىتۋ ءۇشىن مەكتەپتەردەن باستاپ، ەگدە جاستاعىلارعا دەيىن ارنايى سپورتتىق ليگالاردى جانداندىرۋ كەرەك. وزىق ەلدەردىڭ تاجىريبەسى بالالار اراسىنداعى بۇقارالىق سپورت بولاشاق چەمپيونداردىڭ نەگىزى ەكەنىن كورسەتەدى. بىزدە ازىرگە ءبىرىڭعاي جۇيە جوق. دەمەك بۇقارالىق سپورتتى دامىتۋدىڭ العاشقى كەزەڭىنەن-اق اقساپ تۇرمىز»، — دەپ اتاپ ءوتتى تامارا دۇيسەنوۆا.
وسى ورايدا مينيسترلىك پەن وبلىس اكىمدەرىنە بارلىق كەزەڭدەگى سپورتتىق ليگالاردى ماقساتتى تۇردە دامىتۋ جۇمىستارىن قولعا الۋ تاپسىرىلدى. بۇل ىسكە سالالىق مينيسترلىكتەر، مەكتەپتەر، كوللەدجدەر، جوعارى وقۋ ورىندارى، مەديسينالىق ورتالىقتار مەن ەڭبەك ۇجىمدارى ات سالىسۋى شارت.
ۆيسە-پرەمەر بالالار مەن جاس وسپىرىمدەر سپورت مەكتەپتەرىن قارجىلاندىرۋ تۋراسىندا دا ءسوز قوزعادى. بۇل باعىتتا جالپى ءبىلىم بەرۋ وشاقتارى سەكىلدى جان باسىنا شاققانداعى نورماتيۆتەردى ەنگىزۋ جاعىن قاراستىرۋ قاجەتتىگى ايتىلدى. ودان بولەك 18 جاسقا دەيىنگى بالالارعا ارنالعان سپورتتىق ۇيىرمەلەرگە «ۆاۋچەرلەر» ۇسىنۋ جۇيەسىن رەتكە كەلتىرۋ ماقساتى تۇر. قاراستىرىلعان قاراجاتتى ءتيىمدى جۇمساۋ ءۇشىن «ءبىر بالا – ءبىر ۆاۋچەر» ءپرينسيپىن قولدانۋ كوزدەلگەن.
جوعارى جەتىستىكتەر سپورتىن قارجىلاندىرۋ مودەلى دە قايتا قاراستىرۋدى قاجەت ەتەدى.
«ۇلتتىق قۇراما كوماندالارىنا رەزەرۆ دايىندايتىن سپورتتىق ۇيىمدارىمىز ءقازىر وليمپيادالىق ەمەس سپورت تۇرلەرىنە باعىت العانىن مويىنداۋىمىز كەرەك. بىزدە جازعى وليمپيادالىق ويىندار تىزىمىنە ەنگەن 45 ءتۇرلى سپورتقا باسىمدىق بەرىلگەن. ولاردىڭ قاتارىن ازايتىپ، قالعانىن دامىتۋعا ءمان بەرۋمىز كەرەك. بۇل تۇستا تاڭداۋ عىلىمي تۇرعىدا نەگىزدەلىپ، ەلىمىزدىڭ ەرەكشەلىگىن ەسكەرۋى قاجەت»، — دەپ اتاپ ءوتتى ۆيسە-پرەمەر.