الەۋمەتتىك جەلىلەردە ءماجبۇرلى ۆاكسيناسيانىڭ جاڭا ادىستەرىنىڭ پايدا بولعانى تۋرالى اقپارات تارادى. ادۆوكات توماس رەنس ەندى ادامدارعا اۋا مەن تاماق ارقىلى ۆاكسينا الۋعا بولادى دەپ مالىمدەدى، مۇنى كەيبىر زەرتتەۋلەر راستايدى ەكەن. سونىمەن قاتار رەنس ادامداردى ءقازىردىڭ وزىندە ولاردىڭ كەلىسىمىنسىز جانە ەسكەرتپەستەن ۆاكسيناسيالاپ جاتقانىن اتاپ ءوتتى. بۇل جالعان.
توماس رەنستىڭ ادۆوكات رەتىندەگى جۇمىسى COVID-19 پاندەمياسى كەزىندە بەلسەندى بولدى. رەنس بىرنەشە رەت ۆاكسيناسياعا قارسى شىعىپ، ولار مىڭداعان ادامنىڭ ولىمىنە سەبەپ بولدى دەپ مالىمدەدى. سونداي-اق ول ۇكىمەت پەن فارماسيەۆتيكالىق كومپانيالار ۆاكسينالار ارقىلى ادامداردى ولتىرەدى دەپ سوتقا تالاپ-ارىزدار بەرگەن. ءبىراق ونىڭ بارلىق ايىپتاۋلارى دالەلسىز، ال مالىمدەمەلەرى ۆاكسينالاردىڭ تيىمدىلىگى مەن قاۋىپسىزدىگىن دالەلدەيتىن كلينيكالىق سىناقتار مەن زەرتتەۋلەرگە قايشى كەلەدى.
عالىمدار اەروزولدى جانە جەۋگە جارامدى ۆاكسينالاردى ازىرلەپ جاتىر.
اەروزولدى ۆاكسيناسيانىڭ ادامداردى تەز جانە جاپپاي يممۋنداۋدىڭ ءبىرقاتار ارتىقشىلىقتارى بار. سونىمەن قاتار ۆاكسيناسيانىڭ بۇل ءادىسى يممۋنيتەتتىڭ دامۋىنا اكەلىپ قانا قويماي، بۇكىل اعزانى ءتيىمدى، جاپپاي قورعاۋعا اكەلەدى. وڭتۇستىك امەريكادا قىزىلشاعا قارسى اەروزولدى ءتىرى ۆاكسينا سىناقتارى جۇرگىزىلدى، بۇل اەروزولدى يممۋنداۋدىڭ پەرسپەكتيۆاسىن كورسەتتى. سونداي-اق ا تۇماۋىنا قارسى بەلسەندى ەمەس نەمەسە ءتىرى السىرەتىلگەن اەروزولدى ۆاكسينانى زەرتتەۋدىڭ دە ناتيجەسى جاقسى بولدى.
سىناق كەزىندە وڭ اسەر بولعانىنا قاراماستان، مۇنداي اەروزولدى ۆاكسينالار جوعارى تەحنيكالىق تالاپتارعا بايلانىستى ءالى وندىرىلمەيدى جانە قولدانىلمايدى. سونداي-اق اەروزولدى ۆاكسينالاردى جەتكىزۋ مەن ولاردىڭ وڭتايلى قۇرامى بويىنشا شەشىلمەگەن ماسەلەلەر بار.
جەۋگە جارامدى ۆاكسينالار تەوريالىق تۇرعىدان ينەكسياعا جاقسى بالاما بولىپ سانالادى. ولار ارزان، قولدانۋ ءۇشىن مەديسينالىق پەرسونال مەن جابدىقتى قاجەت ەتپەيدى، سونىمەن قاتار تاسىمالداۋ جانە ساقتاۋ الدەقايدا وڭاي. قازىرگى ۋاقىتتا جەۋگە جارامدى ۆاكسينا جاساۋ ءۇشىن تەمەكى، كارتوپ، قىزاناق، بانان، جۇگەرى جانە بۇرشاق داقىلدارى سياقتى وسىمدىكتەردى قولدانۋ قاراستىرىلۋدا.
الايدا، قازىرگى ۋاقىتتا مۇنداي ەكپەلەر وندىرىلمەيدى جانە پايدالانىلمايدى. نەگىزگى سەبەپتەردىڭ ءبىرى – دوزانى رەتتەۋ ماسەلەسى، ويتكەنى ول ءار پارتيا مەن وسىمدىكتە بىردەي بولماۋى مۇمكىن. وسىعان بايلانىستى ادامدار ۆاكسينانى تىم كوپ نەمەسە كەرىسىنشە از الۋى مۇمكىن. بۇل اۋرۋدىڭ ورشۋىنە اكەلەدى. سونىمەن قاتار كەيبىر وسىمدىكتەر كوبىنەسە شيكى ەمەس، وڭدەلگەن كۇيدە قولدانىلادى. اس ءپىسىرۋ ۆاكسينانىڭ مولشەرىن ازايتىپ، پرەپاراتتىڭ اسەرىن السىرەتۋى مۇمكىن.
دەمەك، اەروزولدى جانە جەۋگە جارامدى ۆاكسينالار ازىرلەنۋ ساتىسىندا، قازىرگى ۋاقىتتا ولار حالىققا قول جەتىمسىز. ال ادامداردى ولاردىڭ كەلىسىمىنسىز ۆاكسيناسيالايدى دەگەن مالىمدەمە – فەيك بولىپ سانالادى.