2024 جىلعى 24 قاڭتاردا ەستونيا استاناسى تالليندە قازاقستان تاراپىنان كولىك ءمينيسترى م.قارابايەۆتىڭ جانە ەستونيا تاراپىنان سىرتقى ىستەر ءمينيسترى م.ساحكنانىڭ توراعالىعىمەن ەكونوميكالىق جانە عىلىمي-تەحنيكالىق ىنتىماقتاستىق جونىندەگى قازاقستان-ەستونيا ۇكىمەتارالىق كوميسسياسىنىڭ 7ء-شى وتىرىسى ءوتتى.
ءىس-شاراعا قازاقستاننان مەملەكەتتىك ورگاندار، ۇلتتىق كومپانيالار مەن بيزنەستەن 50-گە جۋىق دەلەگات قاتىستى، دەپ حابارلايدى aqshamnews.kz كولىك مينيسترلىگىنە سىلتەمە جاساپ.
تاراپتار ساۋدا-ەكونوميكالىق ىنتىماقتاستىق، كولىك جانە لوگيستيكا، اۋىل شارۋاشىلىعى، سيفرلاندىرۋ، سونداي-اق ءبىلىم بەرۋ سالاسىنداعى ەكىجاقتى ءوزارا ءىس-قيمىلدىڭ نەگىزگى باعىتتارىن تالقىلادى.
وتىرىس اياسىندا ەستونيا ينفراقۇرىلىم ءمينيسترى ۆ. سۆەتپەن ەكىجاقتى كەزدەسۋ وتكىزىلدى. ترانزيتتىك مۇمكىندىكتەردى كەڭەيتۋگە جانە قازاقستان مەن ەستونيا اراسىنداعى، ونىڭ ىشىندە، تەڭىز پورتتارى ارقىلى لوگيستيكالىق بايلانىستاردى جاقسارتۋعا ەرەكشە نازار اۋدارىلدى.
سونداي-اق، كولىك ءمينيسترى ءبىرقاتار ەستونيالىق Eesti Raudtee، Muuga Grain Terminal، Skinnest Groupp سياقتى ءىرى كومپانيالارىنىڭ، سونداي-اق Sillamae جانە تاللين پورتتارىنىڭ باسشىلارىمەن ەكىجاقتى كەزدەسۋلەر وتكىزدى. كەزدەسۋلەردىڭ قورىتىندىسى بويىنشا ەستوندىق بيزنەسپەن دامۋدىڭ پەرسپەكتيۆالىق باعىتتارى ايقىندالدى.
وتىرىس قورىتىندىسى بويىنشا كولىك-لوگيستيكا سالاسىنداعى بىرلەسكەن جوبالاردى ىسكە اسىرۋ جونىندەگى ناقتى قادامداردى، سونداي-اق ەكونوميكاداعى، سيفرلاندىرۋداعى، ءبىلىم بەرۋدەگى جانە باسقا دا سالالارداعى ءوزارا ءىس-قيمىلدى نىعايتۋ جونىندەگى ۋاعدالاستىقتاردى قامتيتىن حاتتاماعا قول قويىلدى.
كوميسسيانىڭ كەلەسى وتىرىسىن 2026 جىلى استانا قالاسىندا وتكىزۋ جوسپارلانۋدا.