تالدىقورعانداعى زاۋىتتا ءورت شىعىپ، جارىلىس بولدى

ءورت سالدارىنان زارداپ شەككەن ءۇش ازاماتتىڭ ءبىرىنىڭ جاعدايى اۋىر. 

تالدىقورعاندا اۆتوموبيل شينالارىن قايتا وڭدەۋ زاۋىتىندا ءورت شىعىپ، ءۇش ادام زارداپ شەكتى، دەپ  حابارلايدى Almaty-akshamy.kz Almaty.tv cايتىنا سىلتەمە جاساپ. 

الماتى وبلىستىق توتەنشە جاعدايلار دەپارتامەنتىنىڭ مالىمەتىنشە، ءورت تۋرالى حابارلاما 25 تامىزدا 03.25-تە كەلىپ تۇسكەن. ءمالىم بولعانداي، وڭدەلگەن شينالارعا ارنالعان 5 تەكشە مەترلىك ۆاككۋمدىق پيروليزدەۋ رەزەرۆۋارىندا جارىلىس بولدى. ول اشىق الاڭدا ورنالاسقان، ارتىنان جانىنداعى ەسكى شينالار تۇتانىپ، 80 شارشى مەتر جەردى ءورت شارپىدى.

«ءورت سالدارىنان 1962، 1969 جانە 1977 جىلعى ءۇش جۇمىسشى زارداپ شەكتى. ەكى ەر ادامنىڭ جاعدايى ورتاشا. 1977 جىلى تۋعان ازاماتتىڭ جاعداي اۋىر. ۇشەۋى دە كوپ سالالى اۋرۋحاناعا جەتكىزىلدى»، – دەلىنگەن حابارلامادا.

ءورت وشاعى تاڭعى ساعات 04.27-دە وقشاۋلاندىرىلىپ، 04.49-دا ءسوندىرىلدى. وقيعا بولعان جەرگە توتەنشە جاعدايلار دەپارتامەنتىنىڭ 9 تەحنيكاسى مەن 24 قىزمەتكەرى باردى. سونىمەن قاتار پوليسيا قىزمەتكەرلەرى، جەدەل جاردەم مەن سۋ جانە ەلەكتر جەلىلەرى قىزمەتكەرلەرى دە سول جەردە بولدى.

توتەنشە جاعدايلار دەپارتامەنتىنىڭ بولجامى بويىنشا، ءورتتىڭ شىعۋىنا جۇمىس اۋماعىندا تەحنولوگيالىق پروسەستىڭ دۇرىس اتقارىلماۋى سەبەپ بولعان.