مۇنداي ورتالىقتاردىڭ جاس ۇرپاقتى ساۋىقتىرۋداعى ءرولى زور.
تالدىقورعان قالاسىنداعى بالالاردى وڭالتۋ ورتالىعى جۇمىسىن باستاعان ءبىر جارىم جىلدىڭ ىشىندە تىنىس جولدارىنىڭ پاتولوگياسى بار 1 مىڭنان استام بالانى ساۋىقتىردى. بۇل ورتالىقتىڭ، اسىرەسە، ىندەتپەن كۇرەس كەزىندە ماڭىزى ارتا ءتۇستى، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىس ورتالىعىندا ىندەت جاعدايىندا بالالاردىڭ تىنىس الۋ جولدارىن ەمدەيتىن ورتالىق اشۋ قاجەتتىگى تۋعان. ءسويتىپ، 75 ورىنعا ارنالعان وڭالتۋ ورتالىعى 2020 جىلدىڭ تامىز ايىنان جۇمىس ىستەي باستادى. مۇندا تىنىس جولدارىنىڭ سىرقاتى بار 5-18 جاس ارالىعىنداعى بالالار تۇرعىلىقتى جەرىنىڭ ەمحاناسىنان بەرىلگەن ءتيىستى جولدامامەن تەگىن ەم قابىلداي الادى. وڭالتۋ ورتالىعىنىڭ قىزمەتى بالالاردىڭ تىنىس الۋ مۇشەلەرىن قالپىنا كەلتىرۋ مەن وڭالتۋعا باعىتتالعان.
بالالاردى جالپى ساۋىقتىرۋ، اعزانىڭ كۇش-قۋاتىن جانە ناۋقاستىڭ ءومىر ءسۇرۋ ساپاسىن جوعارىلاتۋ ماقساتىندا مۇندا مەن ءداستۇرلى ادىستەر مەن جاڭا تەحنولوگيالار قاتار قولدانادى. اتاپ ايتقاندا، دارى-دارمەكپەن قاتار كليماتوتەراپيا، ماسساج، ەمدىك دەنە شىنىقتىرۋ، ەمدىك دۋش، ەڭبەك تەراپياسى، تۇزدى بولمە، فيزيوتەراپيا، ت.ب. پروسەدۋرالار جاسالادى. بۇل پروسەدۋرالار ۋۆچ-تەراپيا، ۋفو، بيوپترون، شاركو سەبەزگىسى، كەدر بوشكەسى، گيدروماسساج ۆانناسى سياقتى ەمدىك جابدىقتاردىڭ كومەگىمەن اتقارىلدى. تاماقتانۋ راسيونى دا ساۋىقتىرۋعا نەگىزدەلگەن. بالالاردىڭ بوس ۋاقىتتارى پسيحولوگ جانە مۋزىكا مامانى ءتۇرلى ويىندارمەن، مۋزىكالىق ساباقتارمەن ۇشتاستىرىپ، ەم-شارالارىن بەكىتە تۇسەدى.
«بىزگە كوروناۆيرۋسپەن، تۇماۋمەن اۋىرىپ شىققان، برونحيت، استماسى اسقىنعان بالالار جولدانادى. ءتيىستى ەم-شارالارىن الىپ، وڭالتۋدان وتەدى. اشىلعالى بەرى مىڭنان استام بالانى ساۋىقتىرىپ شىعاردىق. قازىرگى كەزدە ورتالىقتا 11 بالا ەم قابىلداپ جاتىر»، - دەيدى مەكەمە ديرەكتورى سوۆەتحان سارسەبايەۆا.
ماماندار بۇگىندە بالالاردىڭ اللەرگياعا بەيىمدىلىگى ارتۋىنا بايلانىستى تىنىس جولدارىنىڭ اۋرۋى دا كوبەيە تۇسكەنىن ايتادى. سوندىقتان مۇنداي ورتالىقتاردىڭ جاس ۇرپاقتى ساۋىقتىرۋداعى ءرولى زور.