ەلىمىزدە بالالار ۇيلەرىنىڭ سانى بىرتىندەپ ازايىپ كەلەدى

بىلتىر ەلىمىزدە ەكى بالالار ءۇيى جابىلدى

ءبىلىم جانە عىلىم ۆيسە-مينيسترى بيبىگۇل اسىلوۆا ۆەدومستۆونىڭ القا وتىرىسىندا ەلىمىزدە بالالار ۇيلەرىنىڭ سانى بىرتىندەپ ازايىپ كەلە جاتقانىن ايتتى، دەپ حابارلايدى Almaty-akshamy.kz 

بيبىگۇل اسىلوۆا ەلىمىزدەگى بالالار ءۇيى تاربيەلەنۋشىلەرىنىڭ 81 پايىزى وتباسىندا ءومىر ءسۇرۋ قۇقىعىن پايدالانعانىن ايتتى.

«بالالار ءۇيىنىڭ سانى 30-عا دەيىن قىسقاردى، 2021 جىلى تاعى 2 بالالار ءۇيى، 1 قيىن جاعدايدا قالعان بالالاردى قولداۋ ورتالىعى، 1 بالالار ءۇيى جابىلدى. بۇگىنگى تاڭدا جەتىم بالالارعا ارنالعان ۇيىمداردا 4 مىڭعا جۋىق بالا تۇرادى. ءبىز ەكى باعىتتا – تاربيەلەنۋشىلەرگە جايلى جاعداي جاساۋدى قاداعالاۋ جانە بالالاردىڭ وتباسىندا تاربيەلەنۋىن قامتاماسىز ەتۋ بويىنشا جۇمىسىمىزدى جالعاستىرامىز»،– دەدى ول.

سونىمەن قاتار اسىلوۆا بىلتىر بالالاردىڭ قۇقىعىن قورعاۋ سالاسىندا مەملەكەتتىك باقىلاۋ جۇرگىزىلگەنىن جەتكىزدى. وندا ەلىمىزدىڭ 17 ايماعىنان 390 بالالار مەكەمەسى قامتىلعان.

«اتىراۋ، شىعىس قازاقستان، جامبىل وبلىستارىندا، نۇر-سۇلتان جانە شىمكەنت قالالارىندا جەتىم جانە اتا-اناسىنىڭ قامقورلىعىنسىز قالعان بالالاردىڭ قۇقىقتارىن ورەسكەل بۇزۋ فاكتىلەرى انىقتالدى. بالالاردى وتباسىنا ورنالاستىرۋ، باسپانامەن قامتاماسىز ەتۋ، جۇمىسقا ورنالاستىرۋ مەرزىمىندەگى قۇقىقبۇزۋشىلىقتار كوپتەگەن وڭىرلەرگە ءتان. تەكسەرۋ قورىتىندىسى بويىنشا اتالعان وبلىستاردىڭ قورعانشىلىق ورگاندارىنىڭ ماماندارى رەسپۋبليكالىق دەرەكتەر بانكىن ۋاقتىلى جانە دۇرىس جۇرگىزبەگەنى جانە باسقا دا زاڭبۇزۋشىلىقتار ءۇشىن ايىپپۇل تۇرىندەگى اكىمشىلىك جاۋاپكەرشىلىككە تارتىلدى. ماسەلەن، اتىراۋ قالالىق قورعانشىلىق ورگانىنىڭ ماماندارى 8 بالانىڭ ساۋالناماسىنا ۋاقتىلى وزگەرىستەر ەنگىزبەگەن. تەكسەرىلگەن وبلىستاردىڭ بارلىعىندا دەرلىك وسىنداي زاڭبۇزۋشىلىقتار بار»، – دەيدى سپيكەر.

سونداي-اق، ونىڭ سوزىنشە، اقتوبە، اتىراۋ، شىعىس قازاقستان، باتىس قازاقستان، قاراعاندى ​​جانە تۇركىستان وبلىستارىنىڭ ءبىلىم باسقارمالارىندا بالالاردى اسىراۋ بويىنشا جاردەماقىلاردى مەرزىمىندە تولەمەۋ، سونداي-اق قامقورشىلارعا جانە پاتروناتتىق تاربيەشىلەرگە اقشالاي قاراجاتتى تولىق كولەمدە تولەمەۋ فاكتىلەرى انىقتالعان.

بيبىگۇل اسىلوۆا بيىل وسىنداي مەكەمەلەرگە ارنالعان باقىلاۋ پاراقتارىن كەڭەيتۋ جوسپارى بار ەكەنىن ايتتى. مەكەمەلەردە ازىق-تۇلىك ستاندارتتارىنا، كيىم ۇلگىسىنە سايكەستىگى قاداعالانىپ، بەينەباقىلاۋ كامەرالارىنىڭ ورناتىلۋى تەكسەرىلەدى.