جەلتوقسان وقيعاسىنا وبەكتيۆتى باعا بەرەتىن دەرەكتى فيلم ءتۇسىرۋ كەرەك
ونىڭ ەسكيزىن ازىرلەۋگە جەلتوقساندىقتاردىڭ وزدەرى قاتىسادى، ال قاجەتتى قارجىلاي قولداۋ وبلىس اكىمدىگى تاراپىنان كورسەتىلەدى. بۇل تۋرالى بۇگىن تاۋەلسىزدىك كۇنى قارساڭىندا 1986 جىلعى جەلتوقسان وقيعاسىنا قاتىسۋشىلارمەن وتكىزگەن ءداستۇرلى كەزدەسۋدە وبلىس اكىمى بەيبىت يسابايەۆ ايتتى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەزدەسۋگە 29 جەلتوقساندىق كەلدى، جالپى، وڭىردە اتالمىش وقيعاعا قاتىسقان 74 ازامات تۇرادى.
بەيبىت يسابايەۆ جينالعاندارمەن اڭگىمەلەسىپ، ءوزىنىڭ جۋرناليستىك قىزمەتتە بولعان سول جىلدارداعى ەستەلىكتەرىمەن ءبولىستى.
كەزدەسۋگە قاتىسۋشىلار اتىنان «جەتىسۋلىق جەلتوقساندىقتار» وبلىستىق قوعامدىق بىرلەستىگىنىڭ جەتەكشىسى ەرمۇحان ءجۇنىسحان، جەلتوقسان وقيعاسىنا قاتىسۋشىلار باعدات ايتمۇقايەۆا، تولقىن مۇساحان قىزى جانە باسقا دا ازاماتتار ءسوز الدى.
بەيبىت يسابايەۆ جەلتوقساندىقتارمەن باسقوسۋدى بۇدان بىلاي ءجيى وتكىزىپ تۇراتىنىن ايتىپ، وسى ساناتتاعى ازاماتتارعا قاجەتتى قولداۋلار كورسەتۋ تۋرالى ءتيىستى مەملەكەتتىك ورگاندارعا تاپسىرما بەردى. ەندى جەتىسۋداعى جەلتوقساندىقتارعا مەديسينالىق قىزمەت كورسەتۋدە جەڭىلدىكتەر قاراستىرىلادى. ولار كەلەسى جىلدان باستاپ ساناتورلىق-كۋرورتتىق ەم قىزمەتىن جىلىنا ءبىر رەت تەگىن پايدالانا الادى. جىلىنا ءبىر رەت بەرىلەتىن ماتەريالدىق كومەك سوماسى 50 مىڭ تەڭگەگە ۇلعايتىلىپ، بيىلدان باستاپ ونىڭ سوماسى 200 مىڭ تەڭگەگە جەتكىزىلەتىن بولدى. سونداي-اق وبلىس اكىمى تالدىقورعاندا جەتىسۋلىق جەلتوقساندىقتاردىڭ ءاتى-جونى جازىلعان مونۋمەنت تۇرعىزۋ، ولار تۋرالى ەستەلىكتەر كىتابىن شىعارۋ تۋرالى ۇسىنىسىن ايتتى.
- سىزدەرمەن تاۋەلسىزدىك كۇنى قارساڭىندا عانا ەمەس، جىلدىڭ باسىندا دا كەزدەسۋ وتكىزسەك، جىل بويى بىرلەسىپ قانداي ءىس-شارالار اتقاراتىنىمىزدى اقىلداسىپ جوسپارلاعانعا ءتيىمدى بولار ەدى. مەملەكەت باسشىسى قاسىم-جومارت توقايەۆ «ازاتتىقتىڭ العاشقى قارلىعاشتارى – جەلتوقسان قاھارماندارىنىڭ ازاماتتىق ەرلىگى لايىقتى باعاسىن الىپ، جوسپارلى تۇردە ناسيحاتتالۋى كەرەك»، - دەگەن بولاتىن. تالدىقورعاندا مونۋمەنتتى «جاستار» ساياباعىنا قويۋعا بولادى، ءبىراق ورنى تۋرالى ءالى دە اقىلداسايىق. جەلتوقسان وقيعاسىنا وبەكتيۆتى باعا بەرەتىن دەرەكتى فيلم ءتۇسىرۋ كەرەك، كىتاپ شىعارۋ كەرەك دەپ ەسەپتەيمىن، - دەدى ب.يسابايەۆ.