باس جۇلدە - جانداربەك بۇلعاقوۆقا بۇيىردى
تالدىقورعاندا ءىلياس جانسۇگىروۆ اتىنداعى مادەنيەت سارايىندا جامبىل جابايەۆتىڭ 175 جىلدىعىنا وراي «توگەيىن جىردى حالقىما» اتتى حالىقارالىق ايتىس ءوتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ايتىسقا اۋزىمەن قۇس تىستەگەن ەلىمىزدىڭ اقىندارىمەن قاتار قىرعىز ەلىنىڭ توكپە ايتىسكەرلەرى قاتىستى.
«بۇل – حالىقارالىق ايتىس الاتاۋدى جاعالاي قونىستانعان ەكى ەل اراسىنداعى عاسىردان جالعاسىپ كەلە جاتقان قاسيەتتى ونەرگە دەگەن قۇرمەت. بۇل – كەشەگى ءسۇيىنباي مەن توقتاعۇل، جامبىل مەن قاتاعاننان قالعان ماڭگى سىيلاستىق. بۇگىنگى ايتىستا جامبىل بابا ونەرىنىڭ جاڭا قىرلارى جىرلانىپ، ايتىسكەرلەر دوستىقتى تۋ ەتەدى دەپ سەنەمىن. وسى ايتىسقا قىرعىز ەلىنەن قانىبەك قاپاش ۇلى يمانالييەۆ باستاپ كەلگەن ءقادىرلى قوناقتارىمىزعا، ايتىسكەر اقىندارىمىزعا «قوش كەلدىڭىزدەر!» دەيمىن»، - دەگەن اماندىق باتالوۆ قانىبەك يمانالييەۆتىڭ يىعىنا شاپان جاۋىپ، ەستەلىك سىيلىقتار تارتۋ ەتتى.
«قازاق پەن قىرعىزدى باسقالاردان وزگەشە ەتەتىن وزدەرىنە ءتان ءبىر بيىگى بار. ول – كيەلى ءسوز. ءبىز ءسوزدى بايلىقتان دا، باسقادان دا، ءتىپتى ومىردەن دە بيىك قويامىز. قازاق پەن قىرعىز جىلقىعا مىنگەندە، دومبىرا مەن قومىز تارتقاندا جانە ايتىسقا تۇسكەندە ارقالانادى. رۋحاني جاقىندىعى مول قوس ەلدىڭ تاۋەلسىزدىگى باياندى بولىپ، ونەرى ورىستەي بەرسىن»، - دەدى ق.يمانالييەۆ.
بۇدان ءارى اقىندار جەرەبي ارقىلى جۇپتالىپ، ءسوز سايىسى باستالدى.
ەسكە سالساق، حالىقارالىق ايتىسقا ەل اتىنان جانداربەك بۇلعاقوۆ، مۇرادىم ميرلانوۆ، جالعاس ماقسۇتوۆ، ايشولپان تىلەۋتاي، سىرىم اۋەزحان، قىرعىز اقىندارىنان امانتاي قۇتمانالييەۆ، ازامات بلوگونبايەۆ، اسىلبەك ماراتوۆ، بايان اكماتوۆ، كۋبات تۋكەشوۆ قاتىستى.
ءسوز دوداسىنا حالىقارالىق تۇركى اكادەمياسىنىڭ پرەزيدەنتى دارحان ءقىدىرالى، جازۋشى، حالىقارالىق «الاش« سىيلىعىنىڭ لاۋرەاتى جۇماباي شاشتاي ۇلى، قىرعىزستان جازۋشىلار وداعىنىڭ مۇشەسى، كومپوزيتور، پۋبليسيست، قىرعىزستاننىڭ حالىق ءارتىسى تۇگولباي قازاقوۆ، قازاقستاننىڭ مادەنيەت سالاسىنىڭ ۇزدىگى، ايتىس اقىنى ايتاقىن بۇلعاقوۆ، ق ر ەڭبەك سىڭىرگەن قايراتكەرى، «اسىل ارنا« تەلەارناسىنىڭ باس ديرەكتورى مۇحامەتجان تازابەكوۆ، ق ر مادەنيەت قايراتكەرى، ت.جۇرگەنوۆ اتىنداعى ونەر اكادەمياسىنىڭ وقىتۋشىسى سەرىك قالييەۆ، ايتىسكەر اقىن بالعىنبەك يماشيەۆ قازىلىق ەتتى.
جۇلدەلى ورىندارعا يە بولىپ، سىيلىق جانە ديپلومدارمەن ماراپاتتالعاندار:
باس جۇلدە - جانداربەك بۇلعاقوۆ (قازاقستان رەسپۋبليكاسى، الماتى وبلىسى)، اسىلبەك ماراتوۆ (قىرعىز رەسپۋبليكاسى). قوس اقىن 1،5 ميلليون تەڭگەدەن الدى.
ءسوز بارىمتاسىندا ەرەكشە كوزگە تۇسكەن قازاق قىزى ايشولپان تىلەۋتاي مەن قىرعىز اقىنى ازامات بولگونبايەۆ 1-ورىندى جەڭىپ الىپ، 1 ميلليون تەڭگەنىڭ سەرتيفيكاتتارىن قانجىعالادى.
ەكىنشى ورىن – مۇرادىم ميرلانوۆ (قازاقستان رەسپۋبليكاسى، باتىس قازاقستان وبلىسى)، كۋبات تۋكەشوۆ (قىرعىز رەسپۋبليكاسى)، قارجىلاي سىيلىق - 700 مىڭ تەڭگەدەن.
ءۇشىنشى ورىن – جالعاس ماقسۇتوۆ (قازاقستان رەسپۋبليكاسى، الماتى وبلىسى)، امانتاي كۋتمانالييەۆ (قىرعىز رەسپۋبليكاسى)، سىياقى كولەمى - 500 مىڭ تەڭگە.
ىنتالاندىرۋ جۇلدەسى 300 مىڭ تەڭگە - سىرىم اۋەزحان (قازاقستان رەسپۋبليكاسى، الماتى قالاسى) مەن بايان اكماتوۆقا (قىرعىز رەسپۋبليكاسى) بۇيىردى.
ايتا كەتەيىك، جىر الىبىنا ارنالعان شارالار الداعى كۇندەرى دە جالعاسىپ، «جامبىل ىزىمەن» اتتى ەكسپەديسيا الماتى، تاراز، بىشكەك، ماسكەۋ، سانكت-پەتەربۋرگ قالالارىنا شىعىپ، جامبىل اتامىزدىڭ ەسىمىن ۇلىقتايتىن بولادى.