ءوڭىر كاسىپكەرلەرىنە مەملەكەت تاراپىنان كورسەتىلەتىن قولداۋلار تۋرالى دا ۇمىت قالدىرعان جوق
بۇگىن وبلىس اكىمى بەيبىت يسابايەۆ تالدىقورعانداعى «اتامەكەن» كاسىپكەرلەر ۇلتتىق پالاتاسىندا بيزنەس قاۋىمداستىقپەن كەزدەسۋ وتكىزدى. جيىندا اتقارۋشى ورگاندار مەن كاسىپكەرلەردىڭ ءوزارا ىنتىماقتاستىعى، بيزنەستى دامىتۋعا باعىتتالعان مەملەكەتتىك قولداۋ شارالارى، بيۋروكراتيانى، كولەڭكەلى بيزنەستى بولدىرماۋ، بيزنەستىڭ الەۋمەتتىك جاۋاپكەرشىلىگى سياقتى كوپتەگەن ماسەلەلەر قوزعالدى، - دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
بەيبىت يسابايەۆ كاسىپكەرلىكتى دامىتۋ مەملەكەتتىك ساياساتتىڭ باسىم باعىتى ەكەنىن، پرەزيدەنتتىڭ ادال، اشىق، ءادىل قوعام قۇرۋ باستامالارىنىڭ بيزنەستى وركەندەتۋدەگى ىقپالى زور ەكەنىن اتاپ ءوتتى. 2024 جىلى جاڭا سالىق كودەكسى ەنگىزىلەتىنىن، ونى دايىنداۋعا بيزنەس قاۋىمداستىقتىڭ ءوزى دە تىكەلەي قاتىساتىنىن تىلگە تيەك ەتتى. سونىمەن قاتار بەيبىت يسابايەۆ جەتىسۋ ءوڭىرىنىڭ ەكونوميكاسىندا باسىمدىق بەرىلەتىن باعىتتارعا توقتالدى. ونىڭ ايتۋىنشا، بىرىنشىدەن، اۋىل شارۋاشىلىعى داقىلدارىن ءوسىرۋ مەن وڭدەۋ، ەكىنشى، وڭدەۋ ونەركاسىبىن دامىتۋ، ۇشىنشىدەن، كولىك-لوگيستيكا سالاسىنا باسىمدىق بەرۋ، تورتىنشىدەن، ءتۋريزمدى وركەندەتۋ، بەسىنشىدەن، وبلىستىڭ جاڭارتىلعان ەنەرگيا كوزدەرىن يگەرۋگە مۇمكىندىگى مول. ءوڭىر كاسىپكەرلەرىنە مەملەكەت تاراپىنان كورسەتىلەتىن قولداۋلار تۋرالى دا ۇمىت قالدىرعان جوق. ماسەلەن، وبلىستا اگروونەركاسىپتىڭ 4،5 مىڭ سۋبەكتىسىنە 10،5 ملرد. تەڭگە سۋبسيديا بەرىلگەن. كاسىپكەرلىكتى دامىتۋدىڭ ۇلتتىق جوباسى اياسىندا 2022 جىلعا 6،3 ملرد. تەڭگە قاراستىرىلدى. بۇل رەتتە 150 جوبانى قارجىلاندىرۋ جوسپارلانعان.
«ءبىز «ەستيتىن مەملەكەت» قۇرۋعا دەن قويدىق، سوندىقتان دا بۇگىن بيزنەس وكىلدەرىمەن كەزدەسىپ، پىكىرلەرىڭىزدى تىڭداساق دەپ، سىندارلى ۇسىنىستارىڭىزدى سالانى دامىتۋ جوسپارلارىندا ەسكەرسەك دەگەن ماقساتىندا جينالىپ وتىرمىز. كاسىپكەرلىكتى دامىتۋ تاقىرىبىندا وي قوسۋعا، ورتاق ماسەلەلەردىڭ شەشىمىن بىرگە تالقىلاۋعا كەلگەن بارشاڭىزعا العىس ايتامىن»، - دەدى ب.يسابايەۆ.
كاسىپكەرلەر ءوز سوزدەرىندە وسىرگەن كوكونىستەرىن وتكىزۋگە جاردەمدەسۋ، ءونىم ساقتايتىن قويما سالۋ، الەۋمەتتىك ماڭىزدى ازىق-تۇلىككە جاتاتىن ءسۇت، ايران، قايماق، ىرىمشىك سياقتى تاعام تۇرلەرىنە سۋبسيديا قاراستىرۋ، زاڭدى تۇلعالاردىڭ ەلەكتر تۇتىنۋ ءتاريفىنىڭ جوعارىلىعى، جىلىجاي اشۋعا جەر ۋچاسكەسىن ءبولۋ، شاعىن تىگىن سەحىنا عيمارات جاعىنان قولداۋ كورسەتۋ سياقتى كوپتەگەن ماسەلەلەردى كوتەردى. سونىمەن قاتار بيزنەس وكىلدەرى نورماتيۆتىك قۇقىقتىق اكتىلەردە، سونىڭ ىشىندە جاڭا سالىق كودەكسىندە ەسكەرىلۋى ءتيىس وزەكتى تاقىرىپتاردى دا ءسوز ەتتى. سۇراق-وتىنىشتەردى مۇقيات تىڭداعان وبلىس اكىمى بەيبىت يسابايەۆ كوتەرىلگەن ماسەلەلەردىڭ قاي-قايسىسى دا ەسكەرۋسىز قالمايتىنىن ايتىپ، ءتيىستى لاۋازىمدى تۇلعالارعا تاپسىرمالار بەردى. ال جەرگىلىكتى جەردىڭ قۇزىرىنا كىرمەيتىن ماسەلەلەر كەزدەسۋدىڭ حاتتاماسى نەگىزىندە ورتالىق ورگاندارعا ۇسىنىلاتىن بولادى.
كاسىپكەرلەردىڭ ءوز قۇقىقتارىن بىلمەۋىنەن، ماسەلەنى زاڭدى جولمەن قالاي شەشۋ كەرەكتىگى جايلى اقپاراتتاردان بەيحابارلىعىنان كوبىنەسە جەمقورلىققا جول بەرىلىپ جاتادى. بۇل رەتتە مەملەكەتتىك ورگاندار مەن بيزنەس وكىلدەرىنىڭ ءوزارا اشىق قارىم-قاتىناسىن قالىپتاستىرۋداعى كاسىپكەرلەر ۇلتتىق پالاتاسىنىڭ ءرولى ۇلكەن. دەگەنمەن موراتوريگە قاراماستان، جەكە ازاماتتاردىڭ شاعىمىن جەلەۋ ەتىپ، بيزنەس سۋبەكتىلەرىن تەكسەرەتىن مەملەكەتتىك ورگانداردىڭ ءالى دە بار. سوندىقتان وبلىس اكىمى ەكى جاقتى بىرلەسىپ شەشەتىن ماسەلەلەردىڭ مول ەكەنىن ايتا كەلە:
«وسىنداي كەزدەسۋدى جىلىنا ەكى رەت وتكىزىپ تۇرۋدى ۇسىنامىن. ەكىنشىدەن، بيزنەس قاۋىمداستىقپەن تۇراقتى بايلانىستا بولۋ ءۇشىن وبلىس اكىمى اپپاراتى باسشىسىنىڭ ورىنباسارى باقىتنۇر باقىتۇلىن ارنايى ۋاكىلەتتى تۇلعا رەتىندە بەكىتەمىن. بىزگە مەملەكەتتىك ورگانداردىڭ ءوزارا بىرلەسكەن ءىس-قيمىلى مەن كەشەندى جۇمىسىن قالىپتاستىرۋ كەرەك. باقىلاۋشى ورگانداردىڭ اقسۋ اۋدانىنداعى «اگروحولدينگ اقسۋ» سەرىكتەستىگىنىڭ بانك ەسەپشوتتارىنداعى بارلىق شىعىس وپەراسيالارىن بۇعاتتاۋى سالدارىنان كاسىپورىن 3 اي توقتاپ تۇردى. جۇمىسشىلارىنىڭ جالاقىسىن بەرۋ، مال ازىعىن ساتىپ الۋ جاعىنان قيىندىقتار تۋىندادى. ءقازىر نىسان قايتا جۇمىسقا كىرىستى. وسىنداي جاعدايلاردى بولدىرماۋ ءۇشىن مەملەكەتتىك ورگاندار بىر-بىرىمەن ۇيلەسىمدە جۇمىس جۇرگىزۋى كەرەك. وعان قوسا بيزنەستىڭ جەكە جۇمىسشىلارىنىڭ الدىنداعى، ال ءىرى كاسىپورىندار مەن ينۆەستورلاردىڭ تۇتاس وبلىس الدىنداعى الەۋمەتتىك جاۋاپكەرشىلىگى بار ەكەنىن ەستەن شىعارماۋىمىز كەرەك.
الەۋمەتتىك جاۋاپكەرشىلىك دەگەنىمىز – ءوڭىر حالقىنىڭ ءال-اۋقاتىن ارتتىرۋعا، سونىڭ ىشىندە بيزنەستى ءتيىمدى جۇرگىزۋگە ءسىز بەن ءبىز بولىپ بىرلەسىپ جۇمىس ىستەۋ»، - دەدى بەيبىت يسابايەۆ.