الماتىدا «قىتايدىڭ الەمدىك مۇرا نىساندارى» اتتى فوتوكورمە وتەدى

قىتايدىڭ مادەني مۇراسى ءوزىنىڭ اۋقىمىمەن تاڭ قالدىرادى

29 قىركۇيەك كۇنى مەملەكەتتىك ورتالىق مۋزەيدە «قىتايدىڭ الەمدىك  مۇرا  نىساندارى» حالىقارالىق فوتوكورمەسى وتەدى، دەپ حابارلايدى Almaty-akshamy.kz.

قازاقستان رەسپۋبليكاسى مەملەكەتتىك ورتالىق مۋزەيى 17 جىل بويى الماتى قالاسىنداعى جۇڭگو حالىق رەسپۋبليكاسىنىڭ باس كونسۋلدىعىمەن ىنتىماقتاستىقتى جالعاستىرىپ، مادەني بايلانىس اياسىندا جۇڭگو تاريحى، مادەنيەتى مەن ونەرى بويىنشا بىرلەسكەن جوبالاردى ىسكە اسىرىپ كەلەدى.  

ىنتىماقتاستىقتى جالعاستىرا وتىرىپ، ق ر مەملەكەتتىك ورتالىق مۋزەيى جۇڭگو حالىق رەسپۋبليكاسىنىڭ باس كونسۋلدىعىمەن بىرلەسىپ، جۇڭگو حالىق رەسپۋبليكاسىنىڭ قۇرىلعان كۇنىنە ارنالعان 2022 جىلعى 29 قىركۇيەك كۇنى ساعات 16.00-دە كورەرمەندەر نازارىنا «قىتايدىڭ الەمدىك  مۇرا  نىساندارى» حالىقارالىق فوتوكورمەسىن ۇسىنادى.

قىتاي-كوپتەگەن تاريحي ەسكەرتكىشتەر ساقتالعان ەجەلگى وركەنيەت پەن ەرەكشە مادەنيەتتىڭ ەلى. قىتايدىڭ مادەني مۇراسى ءوزىنىڭ اۋقىمىمەن تاڭ قالدىرادى.

فوتوەكسپوزيسيانىڭ ماقساتى - كەلۋشىلەردى قىتايدىڭ باي تاريحي-مادەني جانە تابيعي مۇراسىمەن تانىستىرۋ.

«قىتايدىڭ الەمدىك  مۇرا  نىساندارى» كورمەسىندە يۋنەسكو-نىڭ بۇكىلالەمدىك مۇرا تىزىمىنە ەنگىزىلگەن جانە الەمنىڭ قازىناسى بولىپ تابىلاتىن قىتايدىڭ تاريحي جانە مادەني ەسكەرتكىشتەرىنىڭ فوتوسۋرەتتەرى قويىلعان. كەلۋشىلەردىڭ نازارىنا «ۇلى جۇڭگو قابىرعاسى»، «يمپەراتور سين ءشيحۋانديدىڭ ءقابىرى جانە تەرراكوتالىق مۇسىندەر»، «ۋدانشان تاۋلارىنداعى ەجەلگى عيماراتتار كەشەنى»، ەجەلگى ليسزيان قالاسى، سيۋيفۋداعى كونفۋسيي عيباداتحاناسى، «موگاو ۇڭگىرلەرى»، «لۋشان ۇلتتىق پاركى»، «سۋچجوۋ قالاسىنداعى كلاسسيكالىق باقتار»، «داسزۋدىڭ جارتاستاعى رەلەفتەرى» جانە ت. ب. 

كورمەگە ەجەلگى وركەنيەتتىڭ ءىنجۋ-مارجاندارىنىڭ 59 استام فوتوسۋرەتى قويىلعان. شىعارمالاردىڭ اۆتورلارى - تانىمال جۇڭگو فوتوگرافتارى-چجوۋ سزيانيەن، سۋن چجيسزيۋن، تان مين جانە ت. ب.
كورمەنىڭ رەسمي اشىلۋ سالتاناتىندا ق ر مەملەكەتتىك ورتالىق مۋزەيىنىڭ ديرەكتورى راشيدا حاريپوۆا، جۇڭگو حالىق رەسپۋبليكاسىنىڭ الماتىداعى باس كونسۋلى سزيان ۆەي   ءسوز سويلەيدى.