ۇستاۋ كەزىندە كۇدىكتىلەر كولىكتەردىڭ بىرىندە جاسىرىنۋعا تىرىسقان.
تالدىقورعاندا اقبوكەن ءمۇيىزىن ساتۋعا تىرىسقان ءتورت ادام ۇستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كۇدىكتىلەر Ravon Nexia جانە Mazda كولىكتەرىمەن جۇرگەن. ۇستاۋ كەزىندە ۇشەۋى كولىكتەردىڭ بىرىندە جاسىرىنۋعا تىرىسقان.
اقبوكەننىڭ 270 ءمۇيىزى تاركىلەندى. ۇستالعاندار 1982-2000 جىلدارى تۋعان الماتى قالاسى، جامبىل جانە الماتى وبلىستارىنىڭ تۇرعىندارى ەكەندىگى انىقتالدى. بارلىعى وبلىستىق پوليسيا دەپارتامەنتىنە تۇسىنىك بەرۋ ءۇشىن جەتكىزىلدى.
«ق ر قك-نىڭ 339-بابىنىڭ 2-بولىمىندە «ءوسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ» كوزدەلگەن تەرگەۋ امالدارى باستالدى»، - دەلىنگەن جەتىسۋ وبلىستىق پوليسيا دەپارتامەنتى باسپا ءسوز قىزمەتىنىڭ حابارلاماسىندا.