الماتى وبلىسىندا مەسەناتتار حالىقتىڭ الەۋمەتتىك ءالجۋاز توپتارىنا پاتەر ساتىپ اپەردى
الماتى وبلىسىندا از قامتىلعاندار قاتارىنداعى 12 تالدىقورعاندىق وتباسى مەسەناتتاردىڭ كومەگىمەن باسپانالى بولدى. ولاردىڭ ىشىندە كوپ بالالى انالار، جالعىزباستى انالار، ەرەكشە بالالاردى تاربيەلەپ وتىرعاندار، جەتىم بالالار، تولىق ەمەس وتباسىلار، مۇمكىندىگى شەكتەۋلى ازاماتتار بار ، - دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەزەكتە تۇرعاندارعا بۇل پاتەرلەردى مەسەنات ەرىك ايداربايەۆ پەن «حارەكەت» رەسپۋبليكالىق قايىرىمدىلىق قورى ساتىپ بەردى. انالارعا بەرىلگەن پاتەر كىلتتەرى مەن سەرتيفيكاتتار 8 ناۋرىز مەرەكەسى قارساڭىنداعى ەرەكشە سىي بولدى.
«بۇگىنگى كۇنى الەمدە ايەلدەر ەڭبەك ەتىپ، قوعامنىڭ بارلىق سالاسىندا تابىستى قىزمەت جاساۋدا، ۇيدە دە، تۇزدە دە ءوز مىندەتتەرىن جاۋاپكەرشىلىكپەن اتقارىپ ءجۇر. اسىرەسە كوپ بالالى انالارعا زور العىس ايتامىز. ويتكەنى بالالار - كەز كەلگەن ەلدىڭ باستى بايلىعى. سوندىقتان كوپ بالالى، از قامتىلعان وتباسىلارىن قولداۋ – ورتاق ازاماتتىق پارىزىمىز»، - دەدى 9 پاتەردىڭ كىلتىن تاپسىرۋ سالتاناتىندا مەسەنات ە.ايداربايەۆ.
«حارەكەت» قايىرىمدىلىق قورىنىڭ تالدىقورعانداعى جەتەكشىسى امانگەلدى تولەمىسوۆ مەرەكەگە جينالعان ايەلدەردى قۇتتىقتاپ، قورعا قولداۋ كورسەتكەن دەمەۋشىلەرگە ريزاشىلىعىن ءبىلدىردى.
«قايىرىمدىلىق قورى جۇمىسىن باستاعان جىلداردان بەرى باسپاناعا مۇقتاج جاندارعا 593 پاتەردىڭ كىلتى بەرىلدى. سونىڭ ىشىندە تالدىقورعان وڭىرىندە ءبارىمىز جۇمىلا وتىرىپ 48 وتباسىعا باسپانا اپەردىك. سول سياقتى رەسپۋبليكا بويىنشا «70 باسپانا» اكسياسى ناۋرىز ايىندا ءبىر اي بويى جالعاسىپ، 30 كۇن ىشىندە 70 پاتەر اپەرۋ جوسپارلانعان. سونىڭ 5-ەۋى تالدىقورعان قالاسىندا بەرىلەدى، سونىڭ 3-ەۋى بۇگىن بەرىلىپ وتىر. قولداۋعا مۇقتاج جاندار ءالى دە از ەمەس، سوندىقتان قول ۇشىن سوزا الاتىن جانداردى قاتارىمىزعا شاقىرامىز»، - دەدى ا.تولەمىسوۆ.
مەسەناتتارعا راحمەتىن ايتقان قانات بوزىمبايەۆ وبلىستا كوپ بالالى جانە از قامتىلعان وتباسىلاردىڭ ءال-اۋقاتىن ارتتىرۋعا باعىتتالعان الەۋمەتتىك قولداۋ شارالارى جۇيەلى اتقارىلاتىن اتاپ ءوتتى. بۇل رەتتە تۇرعىن ۇيمەن قامتۋعا ەرەكشە نازار اۋدارىلىپ، ماسەلەنى شەشۋگە كاسىپكەرلەر بەلسەندى كومەك كورسەتىپ كەلە جاتىر.
«بيىل ءبىزدىڭ وبلىستا مەسەناتتاردىڭ قولداۋىمەن كوپ قاباتتى 15 تۇرعىن ءۇي سالىنا باستايدى. جالپى وبلىس كولەمىندە قۇرىلىس اۋقىمىن ۇلعايتۋىمىز كەرەك. ويتكەنى بىزدە 60 مىڭنان استام جەتىسۋلىق ءۇي كەزەگىندە تۇر. قازىرگى كەزدە قارجىلاندىرۋدىڭ ءارتۇرلى كوزدەرى ەسەبىنەن جىل سايىن 3 مىڭ پاتەردى پايدالانۋعا بەرىپ كەلەمىز. وسى كورسەتكىشتى كەم دەگەندە جىلىنا 10 مىڭ پاتەرگە جەتكىزۋىمىز قاجەت. ولاي بولماسا تۇرعىندار ءوز كەزەگىن 20 جىلداپ، ءتىپتى ودان دا كوپ كۇتۋى مۇمكىن. بۇل ماسەلەدە بىزگە مەسەناتتار مەن كاسىپكەرلەردىڭ كومەگى كەرەك. مەملەكەت باسشىسى قاسىم-جومارت توقايەۆ ايتقانداي، بيزنەس اياعىنان نىق تۇردى، ەندى مەملەكەت پەن ونىڭ ازاماتتارىنا الەۋمەتتىك وزەكتى ماسەلەلەردى شەشۋگە كومەكتەسەتىن ۋاقىت كەلدى. وسىنداي ۇلكەن جۇرەكتى ازاماتتاردىڭ ارقاسىندا تالدىقورعاندىق 12 وتباسى بۇگىن ءۇيلى بولىپ وتىر. بۇل - كوپشىلىككە ۇلگى بولارلىق ءىس»، - دەدى ق. بوزىمبايەۆ.
بەس بالانىڭ اناسى ءاليا كاۋمەنوۆا قونىستوي يەلەرىنىڭ اتىنان مەسەناتتارعا العىسىن ءبىلدىردى.
«ءبىز كوپ جىلدان بەرى پاتەر جالداپ كەلەمىز. بالالارمەن اندا-مىندا كوشىپ جۇرگەن قيىن. ەندى ءبىزدىڭ ءوز باسپانامىز بار. قاتتى قۋانىپ تۇرمىن، مەنىڭ ارمانىمدى ورىنداعان، وتباسىمدى قيىندىقتان الىپ شىققان ازاماتتارعا شىن جۇرەكتەن راحمەت ايتامىن» ، - دەدى كوپ بالالى انا.
الماتى وبلىسى حالىقتىڭ تابيعي ءوسىمى جاعىنان رەسپۋبليكادا الدىڭعى ورىندا، بال تۋۋ كورسەتكىشى جوعارى. 2019 جىلى 50 مىڭ بالا ومىرگە كەلسە، 2020 جىلى 54 مىڭ، وتكەن جىلى 56 مىڭ بالا دۇنيە ەسىگىن اشقان. بۇگىنگى كۇنى وڭىردە 59 مىڭنان استام كوپ بالالى وتباسى بار. سونىڭ ىشىندە 28 مىڭ انا – «التىن القا»، «كۇمىس القا» توسبەلگىلەرىنىڭ يەگەرى.