قازاق قىزدارى ءبىرىنشى دۇنيەجۇزىلىك سوعىس كەزىندە ەرلىكتىڭ ەرەن ۇلگىسىن كورسەتكەن
اتالعان ەكسپوزيسيا حالىقارالىق ايەلدەر كۇنىنە وراي ۇيىمداستىرىلۋ ۇستىندە. ونىڭ نەگىزگى ماقساتى – سۇراپىل سوعىس جىلدارىندا ەرلىك كورسەتكەن قازاقستاندىق ارۋلار تۋرالى سىر شەرتۋ، دەپ حابارلايدى Almaty-akshamy.kz قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
قازاق دالاسى ەرلەرمەن قاتار تۋعان جەردى قاسىق قانى قالعانشا قورعاپ، باتىرلىق تانىتقان نازىك جاندىلارعا كەندە ەمەس.
قازاق قىزدارى ءبىرىنشى دۇنيەجۇزىلىك سوعىس كەزىندە ەرلىكتىڭ ەرەن ۇلگىسىن كورسەتكەن. ماسەلەن، اققاعاز دوسجانوۆا مەيىربيكە رەتىندە مايدانعا جىبەرىلدى، جارالانعاندارعا كومەك كورسەتتى، گوسپيتالداردا جۇمىس ىستەدى.
ازامات سوعىسى جىلدارى اعارتۋشى الما ورازبايەۆا قازاق جاۋىنگەرلەرىنەن قۇرالعان ەسكادروننىڭ كوميسسارى بولعان.
ۇلى وتان سوعىسىندا مايدان دالاسىندا مەرگەن ءاليا مولداعۇلوۆا، پۋلەمەتشى مانشۇك مامەتوۆا، ۇشقىش حيۋاز دوسپانوۆا جاۋمەن شايقاسىپ، جەڭىستى جاقىنداتتى.
كۇمىس كومەي ءانشى روزا باعلانوۆا بۇلبۇل داۋسىمەن مايدانداعى، اۋرۋحانالارداعى جانە تىلداعى جاۋىنگەرلەردى رۋحتاندىردى. قازاق وپەرا ونەرىنىڭ نەگىزىن قالاۋشىلاردىڭ ءبىرى – كۇلاش بايسەيىتوۆا كونسەرتتىك توپتىڭ قۇرامىندا بىرنەشە رەت مايداندا ونەر كورسەتكەن.
كورمەدەگى جادىگەرلەر سوعىستار مەن قارۋلى قاقتىعىستارعا قاتىسقان باسقا دا كوپتەگەن قازاق ايەلدەرىنە ارنالعان.
كورمەگە كەلۋشىلەر ءۇشىن قورعانىس مينيسترلىگى ورتالىق ءانسامبلىنىڭ جانە اسكەري وركەستردىڭ ورىنداۋىندا سوعىس جىلدارىنداعى اندەر مەن اۋەندەر شىرقالۋ ۇستىندە.