الماتى اكىمىنىڭ تاپسىرماسىمەن مەدەۋ اۋدانىنىڭ وڭتۇستىك بولىگىندەگى تالاي جىلدان بەرى قوردالانعان سۋ تاپشىلىعى ماسەلەسى شەشىلدى
الماتى اكىمى ەربولات دوسايەۆ مەدەۋ اۋدانىنىڭ تۇرعىندارىمەن كەزدەسۋ بارىسىندا ساپالى سۋمەن جابدىقتاۋ جانە كارىز جۇيەسىمەن قامتاماسىز ەتۋ ماڭىزدى ماسەلەنىڭ ءبىرى ەكەنىن اتاپ ءوتتى، دەپ حابارلايدى aqshamnews.kz
بيىل جازدا «بالقاش» تازا سۋ رەزەرۆۋارى پايدالانۋعا بەرىلىپ، «كامەنسك ءۇستىرتى» شاعىن اۋدانىنداعى تالاي جىلدان بەرى قوردالانعان سۋ تاپشىلىعى ماسەلەسى شەشىلدى. 2023 جىلدىڭ مامىر ايىندا باستالعان اۋقىمدى جوبا اياسىندا 7،3 مىڭ تەكشە مەتر سۋعا ارنالعان 7 رەزەرۆۋار سالىندى، 3 رەزەرۆۋار جاڭارتىلدى جانە تاۋلىگىنە 15،7 مىڭ تەكشە مەتر سۋ وتكىزۋ قابىلەتى بار 3 جاڭا ۇڭعىما سالىندى، تاۋلىگىنە 22 مىڭ تەكشە مەتر سۋ وتكىزۋگە ارنالعان 12 سورعى ورناتىلدى.
سونىمەن قاتار، بيىل شىلدە ايىندا مەملەكەت باسشىسىنىڭ تاپسىرماسىمەن تاۋلىگىنە 32 مىڭ تەكشە مەتر سۋ بەرۋگە ارنالعان رەزەرۆتىك سۋ بەرۋ جۇيەسى پايدالانۋعا بەرىلدى. نەگىزگى سۋ كوزدەرى - تالعار جەر استى سۋلارىنىڭ كەن ورىندارىنان سۋ كاسكادتى ادىسپەن جەتكىزىلەدى. جوبانى جۇزەگە اسىرۋ ناتيجەسىندە «سامال»، «كوكتوبە» جانە «گورنىي گيگانت» شاعىن اۋداندارىنىڭ ءبىر بولىگىنىڭ 50 مىڭ تۇرعىنى سۋمەن تۇراقتى قامتاماسىز ەتىلدى.
سونىمەن قاتار، قالا باسشىسى اتاپ وتكەندەي، تۇرعىندار سانىنىڭ وسۋىنە بايلانىستى، سونىڭ ىشىندە «دۋمان» شاعىن اۋدانىندا سۋمەن قامتاماسىز ەتۋ ماسەلەسى بارعان سايىن وزەكتى بولىپ وتىر. جاز مەزگىلىندە قولدانىستاعى رەزەرۆۋارلاردىڭ وتكىزۋ قابىلەتى اۋىز سۋعا دەگەن قاجەتتىلىكتى وتەي الماي، تاۋلىگىنە 2،2 مىڭ تەكشە مەتر سۋ تاپشىلىعىنا اكەلدى.
بۇل ماسەلەنى شەشۋ ءۇشىن ءتورت جاڭا رەزەرۆۋار، 3،5 كم سۋ قۇبىرىنىڭ قۇرىلىسى جانە ەكى سورعى ستانسياسىن جاڭعىرتۋ جوسپارلانىپ وتىر. بۇل جۇمىستار 2025 جىلدىڭ ءبىرىنشى توقسانىندا باستالادى.
- 2024 جىلدىڭ سوڭىنا دەيىن «كەڭساي»، «كومپوت»، «دۋمان» جانە «كولساي» شاعىن اۋداندارىندا 65 كم سۋ جانە كارىز جەلىلەرىنىڭ قۇرىلىسى اياقتالادى. سونداي-اق، «مۇزتاۋ» جانە «سۇلۋساي» شاعىن اۋداندارىندا 19،5 كم سۋمەن جابدىقتاۋ جانە كارىز جەلىلەرىنىڭ قۇرىلىسى جۇرگىزىلۋدە، ونى 2025 جىلدىڭ ءۇشىنشى توقسانىندا اياقتاۋ كوزدەلگەن.
- 2024 جىلدىڭ ناۋرىز ايىندا «اتىراۋ»، «الاتاۋ» جانە «مالايا ستانيسا» شاعىن اۋداندارى بويىنشا 37 كم سۋمەن جابدىقتاۋ جانە سۋ بۇرۋ جەلىلەرىن سالۋعا مەملەكەتتىك ساراپتاما الىندى. جۇمىستار 2025 جىلدىڭ ءبىرىنشى توقسانىندا باستالادى.
سونداي-اق، «اسكارتاۋ»، «يۋبيلەينىي»، «كامەنسك ءۇستىرتى» جانە «تاۋلى قىرات» شاعىن اۋداندارىندا 127 كم جەلى سالۋعا قۇجاتتاما ازىرلەنۋدە، ساراپتاما 2024 جىلدىڭ ءتورتىنشى توقسانىندا شىعادى.