ەرماحان ىبىرايىموۆ، سيدنەي وليمپياداسىنىڭ چەمپيونى:
ۇلتتىق قۇراما 7 جولدامانى العاندا ءبارىمىز قۋاندىق. شىن مانىندە، تولىق كوماندامەن قازاقستان مەن وزبەكستان عانا باردى. ءبىراق وزبەكتەردىڭ قۇراما كومانداسى وتە تابىستى ونەر كورسەتىپ جاتىر. بىردەن 5 بوكسشىسى جارتىلاي فينالعا شىقتى. ارينە، جىگىتتەر جەڭىپ شىقسا، كوڭىل تولار ەدى. ەندىگى بار ءۇمىت – نۇربەك ورالبايدا عانا.
جالپى، ءبىزدىڭ جىگىتتەردىڭ كوزىندە وت جوق ەكەنىن بايقادىق. ءبىرىنشى راۋندتا جەڭەدى، ەكىنشى جانە ءۇشىنشى راۋندتا جەڭىلەدى. فيزيكالىق تۇرعىدان شارشاڭقى سياقتى كورىندى. بالكىم، باسقاشا دايىندالۋ كەرەك پە ەدى دەپ ويلايمىن. بۇل تۋرالى كەلگەننەن كەيىن دە كوپ اڭگىمە بولادى. مەنىڭشە، دايىندىق تومەن بولعان سياقتى.
ءبىراق ماعان مۇحامەدسابىر بازاربايدىڭ ويىنى وتە جاقسى ۇنادى. بولاشاعىنان ءۇمىت كۇتكىزەتىن ءۇش جەكپە-جەك وتكىزدى. ونىڭ ەكەۋىن جەڭدى، ۇشىنشىسىندە گرۋزيالىق لاشا گۋريليدەن جەڭىلدى. تورەشىلەر سولاي شەشتى. ال ساكەن بيبوسىنوۆ وليمپيادا جانە ەكى دۇركىن الەم چەمپيونى حاسانبوي دۋسماتوۆپەن جەكپە-جەگىندە وڭباي ءسۇرىندى. بولماشى ءبىر سوققىلار جاسادى. «نەگە ونداي سوققى جىبەرەسىڭ؟ ودان دا قولىڭدى كوتەرىپ، قورعانىس جاسامايسىڭ با؟! سوندا حاسانبويدىڭ سوققىسى ءدال تۇسپەي، تورەشىلەردىڭ ويى وزگەرمەس ەدى عوي!» دەپ «اتتەگەن-ايلاپ» وتىردىم. شىن مانىندە، ساكەن وسى جولى چەمپيون بولۋعا مۇمكىندىگى بار ەدى.
ۇلتتىق قۇرامانىڭ كاپيتانى اسلانبەك شىمبەرگەنوۆ تۋ ۇستاۋ قۇرمەتىنە يە بولدى. ول وسى جاۋاپكەرشىلىكتى كوتەرە الدى ما، جوق پا، ويلانىپ قالدىم. بالكىم، وعان تۋدى بەكەر ۇستاتتىق پا؟ وعان ەشتەڭە جۇكتەمەي-اق ءوز ستيلىمەن بوكستاسۋعا مۇمكىندىك بەرۋ كەرەك پە ەدى، كىم ءبىلسىن؟! ءبىراق يوردانيالىق بوكسشىعا ەسە جىبەرگەنىنە قاتتى قاپا بولدىم.
مىسالى، وزبەكستان بوكسشىلارىنىڭ ويىنىن كوردىڭىز بە؟! سونشالىقتى مىقتى وينايدى. ءبىر سوزبەن ايتقاندا، ەش كۇمان تۋدىرمايدى. ءبىزدىڭ جىگىتتەرگە سونداي سەنىمدىلىك جەتىسپەدى. شارشى الاڭعا شىققان كەزدە دە اياق الىسى دۇرىس بولمادى. تالاي جەڭىس قولىمىزدان سۋسىپ كەتتى. ايتالىق، قامشىبەك قوڭقابايەۆ، اسلانبەك شىمبەرگەنوۆ، ماحمۇد سابىرحاننىڭ بوكسىنا كوڭىلىم تولمادى. بالەنباي جىلدىق تاجىريبەسى بار، ءبىراز جاسقا كەلگەن بوكسشىلاردىڭ وسىنداي ونەر كورسەتكەنىنە ىشتەي رەنجىدىم.
ادام الدىمەن باسىن جۇمىس ىستەتۋ كەرەك قوي. بوكس دەگەن قارسىلاسىڭنىڭ مۇرنىن بۇزۋ ەمەس. تاكتيكالىق تۇرعىدا، شاحمات ويىنى سياقتى الداپ، جەڭىلىن قۇربان ەتىپ، قوماقتىسىن قاعىپ الۋ كەرەك. ءوي-ورىسى، الداۋ ءتاسىلى، قياس قيمىلدىڭ ەشقايسىسىن كورسەتە المادى. اشىقتان اشىق كۇش بىلەگىنە سالىپ ءجۇردى. الدىڭعى قولمەن جويقىن سوققى بەرگەنىن كورمەدىم. شىنىمدى ايتسام، ءىشىم كۇيىپ، جانىپ وتىردى. ءبىراق «جىگىتتەر ناشار ونەر كورسەتتى» دەپ قاتتى سىنعا دا المايمىن. بارىن جاسادى، الايدا جيعان تاجىريبەسىن قولدانىپ، اقىلعا سالىپ بوكستاسۋ كەرەك ەدى.
"Nege.kz" سايتىنان ىقشامدالىپ الىندى