بۇل نورما جاڭا سالىق كودەكسى اياسىندا كۇشىنە ەنەتىن بولادى، دەپ حابارلايدى aqshamnews.kz
مەملەكەتتىك كىرىستەر كوميتەتىنىڭ ارنايى سالىق رەجيمدەرىن اكىمشىلەندىرۋ باسقارماسىنىڭ باسشىسى ەرقانات شىنبەرگەننىڭ سوزىنشە، بۇل تىكەلەي قوسىمشالار مەن ينتەرنەت-پلاتفورمالار ارقىلى جۇمىس ىستەيتىن تاكسيستەر مەن كۋرەرلەرگە قاتىستى. ولار – Yandex، InDrive، Glovo، Wolt جانە باسقا سەرۆيستەر.
ءدال وسى پلاتفورمالاردىڭ وپەراتورلارى جۇمىس ىستەيتىن ادامدار ءۇشىن الەۋمەتتىك تولەمدەردى ۇستاپ قالىپ، ءوزى اۋدارادى. بۇل نورما 2024 جىلدىڭ 1 قىركۇيەگىنەن باستاپ كۇشىنە ەنگەن جانە جاڭا سالىق كودەكسىندە دە ساقتالماق. ەڭ باستى ايىرماشىلىق، اتالعان ساناتتار ءۇشىن جك مارتەبەسى الىنىپ تاستالادى.
– ءقازىر ارنايى سالىق رەجيمىن قولداناتىندار – جەكە كاسىپكەرلەر. ال كەلەسى جىلدان باستاپ ولار ەسەپتەن الىنىپ، جەكە تۇلعا رەتىندە قاراستىرىلادى، – دەدى ە.شىنبەرگەن.
تاعى ءبىر وزگەرىس بار. ول تولەم قۇرىلىمىنا قاتىستى. ياعني، ءبىرىڭعاي مولشەرلەمە بۇرىنعىداي 4 پايىز بولىپ قالادى، ءبىراق ونىڭ ىشىنەن جەكە تابىس سالىعى الىنىپ تاستالادى. ونىڭ ورنىنا مىندەتتى زەينەتاقى جارنالارى ەنگىزىلەدى. بۇل جارنالاردى دا پلاتفورمانىڭ وپەراتورى ۇستاپ قالادى.
– جاڭا سالىق كودەكسىندە دە سولاي، الەۋمەتتىك تولەمدەردىڭ 4 پايىزى، مىسالى تاكسيستەر ءۇشىن پلاتفورما ارقىلى ۇستالادى. اي قورىتىندىسى بويىنشا وپەراتور ولاردى ءتيىستى قورلارعا اۋدارادى. ءقازىر بۇل جۇيەنى قازاقستان بويىنشا شامامەن 118 مىڭ ادام پايدالانىپ وتىر، – دەپ ناقتىلاي ءتۇستى باسقارما باسشىسى.
جالپىلاما العاندى، رەسمي تۇردە سالىق جۇكتەمەسى وزگەرمەيدى، مولشەرلەمە بۇرىنعىداي 4 پايىز بولىپ قالادى. سوندىقتان، قاعاز جۇزىندە جولاقى مەن جەتكىزۋ قۇنى وزگەرمەۋى ءتيىس.