قارجى ۆيسە-مينيسترى ەرجان ءبىرجانوۆ ەندى ەلىمىزدە تاكسي جۇرگىزۋشىلەرى جەكە كاسىپكەر رەتىندە تىركەلىپ، سالىق تولەۋگە مىندەتتى ەكەنىن ايتتى، - دەپ حابارلايدى اlmaty-akshamy.kz.
ۇكىمەتتىڭ باسپا ءسوز ورتالىعىندا جۋرناليست ۆيسە-مينيسترگە "قازاقستاندا "ياندەكس. تاكسي" جانە تاعى باسقا تاكسي پاركتەرىنىڭ جۇرگىزۋشىلەرى بار. مىسالى، بۇگىن مەن جۇمىسقا تاكسيمەن كەلدىم. جولاقىسىن ءموبيلدى اۋدارىم ارقىلى تولەدىم. اقشا تاكسي جۇرگىزۋشىسىنىڭ ايەلىنىڭ اتىنا ءتۇستى. ەندى تاكسي جۇرگىزۋشىلەرى مەن كۋرەرلەر سالىقتى قالاي تولەيدى؟ ولار ءۇشىن سالىقتى كومپانيا تولەي مە؟"، - دەپ سۇراق قويدى.
ەرجان ءبىرجانوۆ تاكسي جۇرگىزۋشىلەرى جەكە كاسىپكەر رەتىندە تىركەلۋگە مىندەتتى ەكەنىن جەتكىزدى.
"بۇگىندە تاكسي جۇرگىزۋشىلەرى ءۇشىن ارنايى سالىق رەجيمى بار. زاڭعا سايكەس، ولار جەكە كاسىپكەر رەتىندە تىركەلىپ، ءموبيلدى قوسىمشا ارقىلى 1 پايىز سالىق تولەي الادى. ولار مىندەتتى تۇردە سالىق ورگاندارىنا كەلىپ، تىركەلۋى كەرەك نەمەسە ءموبيلدى قوسىمشا ارقىلى ونلاين (جەكە كاسىپكەر رەتىندە) تىركەلە الادى. ولارعا جاعداي جاسالعان"، - دەدى ول.
سونداي-اق، ءمينيستردىڭ ورىنباسارى زاڭعا وزگەرىستەر ەنگىزىلۋى مۇمكىن ەكەنىن مالىمدەدى.
"ءبىز وپەراتوردى سالىق تولەۋشى رەتىندە تىركەۋدى قاراستىرىپ جاتىرمىز. وسىنداي ۇسىنىس بار. مىسالى، تاكسي جۇرگىزۋشىسى وپەراتور ارقىلى جۇمىس ىستەسە، ول سالىقتى وپەراتور ۇستاپ، بيۋدجەتكە اۋدارسا، ءبىز ونى (سالىق تولەۋ - ەسك.) مىندەتىنەن بوساتۋدى قاراستىرىپ جاتىرمىز. بۇل ەندى بولاشاق كودەكستىڭ نورماسى بولادى دەپ ويلايمىز. ماسەلەنى بيزنەسپەن (كاسىپكەرلەرمەن - ەسك.) تالقىلاپ جاتىرمىز. ءقازىر قولايلى جاعداي بار. تاكسي جۇرگىزۋشىلەرى ءموبيلدى قوسىمشا، پاتەنت ارقىلى (جەكە كاسىپكەر رەتىندە - ەسك.) تىركەلىپ، 1 پايىز سالىق تولەۋى كەرەك. بۇگىندە تاكسي جۇرگىزۋشىلەرى قىزمەت اتقارىپ، قولما-قول اقشا الاتىن بولسا، وپەراتورلار تاراپىنان مۇنداي جۇرگىزۋشىلەردىڭ رەيتينگى تومەندەپ، تاپسىرىسى ازايۋى مۇمكىن. ونداي جاعداي بىزدە ءجيى تىركەلىپ جاتىر. سوندىقتان تاكسي جۇرگىزۋشىلەرى زاڭ اياسىندا جۇمىس ىستەۋى كەرەك دەپ ويلايمىن"، - دەدى ەرجان ءبىرجانوۆ.