تايلاندتا تۋريستەر زيكا ۆيرۋسىن جۇقتىردى

زيكا ۆيرۋسىن جۇقتىرعان كەزدە ونىڭ بەلگىلەرى بىردەن بايقالمايدى

تايلاندتا دەمالعان ماجارلىق ەكى ءتۋريستى تروپيكالىق ماسا شاعىپ، زيكا ۆيرۋسىن جۇقتىرعان. بۇل تۋرالى بۋداپەشت ۇلتتىق قوعامدىق دەنساۋلىق ساقتاۋ ورتالىعىنىڭ وكىلدەرى مالىمدەدى، دەپ حابارلايدى Almaty-akshamy.kz Tengritravel.kz-كە سىلتەمە جاساپ.

ۆەدومستۆو مالىمەتىنشە، قۋانىشقا وراي، تايلاندتان كەلگەن تۋريستەردەن تەك جەڭىل بەلگىلەرى انىقتالعان.

«زيكاعا قارسى ۆاكسينا نەمەسە ەم بولماعاندىقتان، تروپيكالىق جانە سۋبتروپيكالىق ايماقتارعا ساپارلاۋ كەزىندە ۆيرۋستى تاراتاتىن ماسالاردىڭ شاعۋىنان قورعانۋ وتە ماڭىزدى»، - دەدى ماجارستاننىڭ قوعامدىق دەنساۋلىق ساقتاۋ باسقارماسىنىڭ وكىلدەرى.

تۋريستەرگە ءاردايىم وزدەرىمەن بىرگە جاندىكتەرگە قارسى قۇرالداردى الىپ جۇرۋگە، موسكيت تورلارىن قولدانۋعا، سونداي-اق اياقتارىن تولىعىمەن جاباتىن ۇزىن جەڭدى فۋتبولكالار مەن شالبار كيۋگە كەڭەس بەرىلدى.

مەديسينالىق مالىمەتتەرگە سايكەس، زيكا ۆيرۋسىن جۇقتىرعان كەزدە ونىڭ بەلگىلەرى بىردەن بايقالمايدى جانە تەك كەيبىر جۇقتىرعاندار 3-14 كۇندىك ينكۋباسيالىق كەزەڭنەن كەيىن جەڭىل بەلگىلەردى كورسەتەدى. بۇل قىزبا نەمەسە دەنە قىزۋىنىڭ كوتەرىلۋى، السىزدىك، باس اۋرۋى، بورتپە، بۋىن اۋرۋى، كونيۋنكتيۆيت بولۋى مۇمكىن.

«جۇكتى ايەلدەر جۇقتىرعان كەزدە ۇرىقتا تۋا بىتكەن جۇيكە دامۋىنىڭ اۋىتقۋى پايدا بولۋى مۇمكىن، سوندىقتان بولاشاق انالار تروپيكالىق ەلدەرگە بارعان كەزدە دەنساۋلىعىن مۇقيات قاداعالاپ وتىرۋى كەرەك»، - دەيدى ماماندار.

زيكا ۆيرۋسى – افريكانىڭ، امەريكانىڭ، ازيانىڭ جانە تىنىق مۇحيتىنىڭ تروپيكالىق جانە سۋبتروپيكالىق ايماقتارىندا كەزدەسەتىن قوزدىرعىش، ول نەگىزىنەن ماسالاردىڭ شاعۋى ارقىلى تارالادى، ءبىراق ينفەكسيا جىنىستىق جولمەن نەمەسە جۇكتى انادان ۇرىققا دا بەرىلۋى مۇمكىن.