الماتىدا ساتىبالدى نارىمبەتوۆ تۋرالى دەرەكتى ءفيلمنىڭ تۇساۋى كەسىلدى
الماتىدا بەلگىلى كينورەجيسسەر، جازۋشى، كينودراماتۋرگ، قازاقستاننىڭ ەڭبەك سىڭىرگەن قايراتكەرى ساتىبالدى نارىمبەتوۆتى ەسكە الۋعا ارنالعان «تاريح تۋدىرعان تۇلعا» اتتى دەرەكتى ءفيلمنىڭ تۇساۋكەسەرى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دەرەكتى ءفيلمنىڭ تۇساۋكەسەرىنە ساتىبالدى نارىمبەتوۆتىڭ تۋىستارى، تانىمال كينوگەرلەر مەن ب ا ق وكىلدەرى قاتىستى. بەلگىلى كينورەجيسسەردى ەسكە الۋعا ارنالعان دەرەكتى ءفيلمنىڭ اۆتورى — رەجيسسەر ساتىبالدى تەكەيەۆ. ونىڭ ايتۋىنشا، دەرەكتى فيلمدە قازاق كينو ونەرى مايتالمانىنىڭ ءجۇرىپ وتكەن جولى مەن شىعارماشىلىعى باياندالادى.
«قازاق كينوسىندا جازۋشىلىقتان رەجيسسۋراعا اۋىسقان، شاكەن ايمانوۆ، ءماجيت بەگالين، سۇلتان قوجىقوۆ، ابدۋللا قارساقبايەۆ سىندى قازاق كينوسىنىڭ شەبەرلەرىنەن كەيىنگى تولقىننىڭ ءبىرتۋار تۇلعاسى ول – ساتىبالدى نارىمبەتوۆ. نەگىزى ساكەڭ جايلى دەرەكتى فيلم ءتۇسىرۋدى ونىڭ كوزى تىرىسىندە، 75 جاسقا تولار شاعىندا باستاعانبىز. وسى كەزدە پاندەميا باستالىپ كەتتى. قارجىلىق جاعىنان دا قىسىلتاياڭ كەزەڭ بولدى. الايدا، وتكەن جىلى قارجىلاي كومەك تابىلىپ، وتكەن جىلدىڭ جەلتوقسان ايىندا ءفيلمدى ءتۇسىرىپ بىتىردىك. بۇل ءفيلمدى ءبىز ساكەڭنىڭ ءومىرى مەن شىعارماشىلىعىن كەلەشەك ۇرپاق كورسىن، ءبىلسىن، ونىڭ ءومىربايانى ماڭگىلىك تاريحتا قالسىن دەگەن ماقساتپەن تۇسىردىك. بۇل ساتىبالدى جايلى تۇسىرىلگەن العاشقى دەرەكتى فيلم. الداعى ۋاقىتتا ساكەڭنىڭ تۋعان كۇنىنە وراي دەرەكتى ءفيلمدى «قازاقستان» ۇلتتىق ارناسىندا كورسەتەتىن بولادى»،- دەدى ساتىبالدى تەكەيەۆ.
شارا بارىسىندا مادەنيەت، ونەر سالاسىنىڭ وكىلدەرى ساتىبالدى نارىمبەتوۆ جايلى ەستەلىكتەرىمەن ءبولىستى.
قازاق كومپوزيتورى، كۇيشى، دومبىراشى، قازاقستاننىڭ ەڭبەك سىڭىرگەن ءارتىسى سەكەن تۇرىسبەكوۆ دەرەكتى ءفيلمدى كورگەننەن كوڭىلى بوساعانىن جەتكىزدى.
«دەرەكتى فيلم قوڭىر ءۇن، قوڭىر كۇي، ءبارى قوڭىردان تۇراتىن ءتاتتى مۇڭ سەكىلدى. ساتىبالدى قازاقتىڭ تاريحىن، تاعدىرىن سوناۋ تەرەڭنەن قوزعاپ، جالپاق جۇرتقا جەتكىزۋى – ونىڭ ومىرلىك ارمانى ىسپەتتى بولدى. ول كوبىنەسە جازۋشى، دراماتۋرگ اقسار سۇلەيمەنوۆكە ەلىكتەيتىن. ساتىبالدىنىڭ ويلاعان ويلارى مەن سوزدەرىندە اسەكەڭنىڭ ىقپالى بولۋى مۇمكىن. ال سول ويلارىن ونىڭ حالىققا جەتكىزۋىن مەن ۇلكەن باقىت دەپ ويلايمىن»،- دەدى سەكەن تۇرىسبەكوۆ.
جازۋشى، كينودراماتۋرگ، قازاقستاننىڭ ەڭبەك سىڭىرگەن قايراتكەرى سماعۇل ەلۋبايدىڭ ايتۋىنشا، ساتىبالدى نارىمبەتوۆ - ءوز حالقىن ءسۇيىپ وتكەن ادام.
«ساتىبالدى ەرەكشە ازامات ەدى. ول بارلىق ادامدى جاقسى كوردى. اسىرەسە، ءوز حالقىن، جاسىن دا، كارىسىن دە جاقسى كوردى. بۇل گۋمانيستىك قاعيداسى ونىڭ ونەرىندە كورىنەتىن. حالقىنا دەگەن ۇلى ماحاببات ونىڭ جۇرەگىندە عۇمىر بويى جانىپ تۇردى. ءبىز تۋرا ەلۋ جىل دوس بولدىق. ول وز-وزىنە ەسكەرتكىش قويعان رەجيسسەر بولدى. ساكە (ساتىبالدى تەكەيەۆ – رەد) ءسىز دوسىڭىزعا ەكراندا ەسكەرتكىش قويىپسىز. بۇل ەڭبەگىڭىز قۇتتى بولسىن. ەندى ساتىبالدى نارىمبەتوۆ جايلى اڭگىمە بولسا بۇل ءفيلمدى اينالىپ وتپەيتىن بولامىز»،- دەدى سماعۇل ەلۋباي.
جازۋشى ءاليا بوپەجانوۆا دەرەكتى فيلمدە ساتىبالدى نارىمبەتوۆتىڭ تۇلعالىق قاسيەتى ءدال اشىلعانىن ايتتى.
«ارينە، ءبىر دەرەكتى فيلمدە ساكەڭ تۋرالى ءبارىن ايتۋ مۇمكىن ەمەس. بۇل ساكەڭ تۋرالى ۇلكەن داستاننىڭ باسى دەپ ويلايمىن. ءبىز ءالى ساكەڭە ورالاتىن بولامىز. ونى ۇلى سۋرەتكەر، ۇلى كينورەجيسسەر دەپ ايتساق بولادى. جاتقان جەرى جارىق بولسىن»، - دەپ ەسكە الدى ءاليا بوپەجانوۆا.
كينو جانە تەاتر اكتەرى، قازاقستاننىڭ ەڭبەك سىڭىرگەن قايراتكەرى دۋلىعا اقمولدا ساتىبالدى نارىمبەتوۆتىڭ ءتىرى كەزىندە باستالعان «جاڭعىرىق» ءفيلمىنىڭ ءالى ءتۇسىرىلىپ بىتپەگەنىنە وكىنىش ءبىلدىردى.
«ساتىبالدى اعا باستاپ كەتكەن ءفيلمدى تۇسىرۋگە بالالارى، «قازاقفيلم» كينوستۋدياسى، ءتىپتى، مادەنيەت مينيسترلىگى اتسالىسىپ جاتىر. دەگەنمەن، فيلم ءالى ءتۇسىرىلىپ بىتپەي جاتىر. بۇل وتە وكىنىشتى جاعداي. سەبەبى، ساتىبالدى نارىمبەتوۆ - دۇنيەجۇزىلىك ارەناعا تانىمال رەجيسسەر. ونىڭ باستاعان دۇنيەسىن ءبىزدىڭ بىتىرە الماي ءجۇرۋىمىز - ول ءبىزدىڭ وسالدىعىمىز دەپ بىلەمىن. ول نامىسقا تيەتىن نارسە. سوندىقتان بۇل ماسەلەنى كوتەرۋ كەرەك دەپ ويلايمىن»، - دەدى اكتەر.
ساتىبالدى نارىمبەتوۆتىڭ ۇلى، كينو وپەراتور ەسكەندىر نارىمبەتوۆ بۇگىنگى شاراعا كەلگەن قوناقتارعا، اكەسى جايلى دەرەكتى ءفيلمدى تۇسىرگەن ساتىبالدى تەكەيەۆكە العىسىن جەتكىزدى.
«بۇگىنگى شاراعا كەلگەن بارلىقتارىڭىزعا العىس ايتامىن. اكەمىزدى ۇمىتپاي، ونى سىيلاپ، باعالاعاندارىڭىز ءۇشىن مىڭ العىس. ساتىبالدى اعا اكەم جايلى تۇسىرگەن دەرەكتى ءفيلمىڭىز ءۇشىن كوپ راحمەت. فيلم وتە تاماشا شىقتى. ماعان قاتتى اسەر ەتتى. اكەم ومىرىندە كوپ نارسەنى جاساۋعا ۇلگەرمەي كەتتى. سونىڭ ءبىرى - ونىڭ سوڭعى «جاڭعىرىق» اتتى ءفيلمى. ءقازىر بۇل ءفيلمدى ءتۇسىرىپ جالعاستىرۋ ماسەلەسى وتە وزەكتى بولىپ تۇر. دەگەنمەن، ءبىز ونى ءتۇسىرىپ بىتىرەمىز دەپ ويلايمىن»،- دەدى ەسكەندىر نارىمبەتوۆ.
ايتا كەتەيىك، ساتىبالدى نارىمبەتوۆتىڭ تۋعان كۇنى قارساڭىندا «قازاقفيلم» كينوستۋدياسىنىڭ «جۇلدىزدار اللەياسىنداعى» ساتىبالدى نارىمبەتوۆ جۇلدىزىنا گۇل شوقتارى قويىلدى.
«ۇلتتىق كينەماتوگرافيا شەبەرى – ساتىبالدى نارىمبەتوۆتىڭ ەسىمى قازاق كينەماتوگرافياسىنىڭ التىن قورىنا جازىلعان. ونىڭ تالانتى مەن شەبەرلىگىمەن جاسالعان كينو تۋىندىلارىن قالىڭ كورەرمەن «كلاسسيكالىق شىعارما» دەپ تانيدى. ول جاس ۇرپاق ءۇشىن قۇرمەت پەن ەلىكتەۋدىڭ ۇلگىسى بولارى ءسوزسىز. قازاقستاندىق كورەرمەندەر مەن ۇلتتىق كينەماتوگرافيانىڭ جانكۇيەرلەرى بەلگىلى كينورەجيسسەردىڭ شىعارماشىلىق ۇلەسىن جوعارى باعالايدى»، - دەپ حابارلادى «قازاقفيلم» كينوستۋدياسىنىڭ باسپا ءسوز قىزمەتى.