سىرتقى ىستەر مينيسترلىگىنىڭ رەسمي وكىلى ايبەك سمادياروۆ تايلاند پەن ميانما ەلدەرىندە قۇلدىققا تاپ بولعان ازاماتتارعا قاتىستى جۇمىستىڭ جۇرگىزىلىپ جاتقانىن ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
«ول ازاماتتار بويىنشا ءقازىر جۇمىستى جالعاستىرۋدامىز. تايلاند، ميانما ەلدەرىنىڭ سىرتقى ىستەر جانە ىشكى ىستەر مينيسترلىكتەرىمەن بايلانىستامىز. وسىنداي جاعدايعا جارتى جىل بۇرىن ءبىر ازاماتشامىز تاپ بولعان. وزدەرىڭىز بىلەتىندەي، بۇل – حالىقارالىق-كريمينالدىق توپتاردىڭ ءىسى. بۇل «التىن ءۇشبۇرىش» دەپ اتالاتىن جەر. ول جەردە بيلىك تە جوق، بايلانىس تا جوق، وزدەرىمەن-وزدەرى، كىشىگىرىم عانا ەل»، - دەدى ءسىم رەسمي وكىلى ايبەك سمادياروۆ.
ايتۋىنشا، تەكسەرىلمەگەن اقپاراتتارعا سايكەس، «التىن ءۇشبۇرىشتا» ەلىمىزدىڭ تاعى بىرنەشە ازاماتى تۇتقىندا بولۋى مۇمكىن. ال ازىرگە ەكى ازاماتتان عانا رەسمي ءوتىنىش كەلىپ تۇسكەن.
«كوپ ازامات سول جەرگە بارعان سوڭ قالىپ قويىپ جاتىر. ويتكەنى اقشالارى جوق، سوندىقتان جۇمىس ىستەۋگە ءماجبۇر. ءقازىر ءبىزدىڭ ازاماتتار سول جەردە. ەكى ازامات بىزگە ءوتىنىش ءبىلدىردى. تەكسەرىلمەگەن اقپاراتتارعا سۇيەنسەك، تاعى باسقا ازاماتتار بار دەپ ەستىپ جاتىرمىز. ولارعا ايتارىمىز، ءبىزدى ەستىپ جاتسا، سىزدەردى وقىپ جاتسا، اتى-جوندەرىن ناقتى اتاپ، وزدەرى تۋرالى مالىمەت بەرسىن، قورىقپاسىن»، - دەدى ايبەك سمادياروۆ.