قازاقستاندا عىلىمدى دامىتۋ ەل ءۇشىن ستراتەگيالىق ماڭىزدى باسىمدىقتاردىڭ ءبىرى بولىپ تابىلادى. مەملەكەت باسشىسى عىلىم جانە تەحنولوگيالار جونىندەگى ۇلتتىق كەڭەستە اتاپ وتكەندەي، دارىندى جانە قابىلەتتى جاستاردىڭ عىلىممەن اينالىسۋىنا جاعداي جاساۋ وتە ماڭىزدى، دەپ حابارلايدى aqshamnews.kz
مەملەكەت باسشىسىنىڭ تاپسىرماسى بويىنشا عىلىمي زەرتتەۋلەردى قارجىلاندىرۋ كولەمى ۇلعايتىلىپ، عىلىمي ۇيىمدار جاڭعىرتىلۋدا. سونىمەن قاتار، شەتەلدە تاعىلىمدامالار سانى ارتىپ، بۇل جاس عالىمداردى عىلىمعا تارتۋعا، حالىقارالىق ىنتىماقتاستىقتى دامىتۋعا جانە زەرتتەۋ ينفراقۇرىلىمىن نىعايتۋعا ىقپال ەتۋدە.
2025-2027 جىلدارعا ارنالعان عىلىمي زەرتتەۋلەردى قارجىلاندىرۋ كولەمى 531،1 ميلليارد تەڭگەگە دەيىن ۇلعايتىلدى. عىلىمدى دامىتۋعا باعىتتالعان زاڭدار قابىلدانىپ، ساتىپ الۋ راسىمدەرىن جەڭىلدەتۋ ءۇشىن شارالار قابىلداندى. سونىمەن قاتار، ق ر پرەزيدەنتى جانىنداعى ۇلتتىق عىلىم اكادەمياسىنىڭ مارتەبەسى جاڭا عىلىمي ۇيىم رەتىندە بەلگىلەندى.
يننوۆاسيالىق ينفراقۇرىلىمدى قولداۋ ماقساتىندا عىلىم قورىنىڭ مارتەبەسى كەڭەيتىلدى، ول ۆەنچۋرلىك قارجىلاندىرۋدى تارتۋ جانە ءبىرىڭعاي تەرەزە ۇسىنۋ ارقىلى عىلىمي قىزمەتتى قولدايدى. عىلىمي قىزمەتكەرلەردىڭ مارتەبەسىن ارتتىرۋ ءۇشىن عىلىمي ۇيىمدار قىزمەتكەرلەرىنىڭ جالاقىسى 18%-عا ۇلعايتىلدى، ال عىلىمي اتاقتار ءۇشىن قوسىمشا اقىلار 50 اەك-كە دەيىن كوتەرىلدى.
قازاقستاندا عىلىمي زەرتتەۋلەرمەن 425 ۇيىم اينالىسادى، بۇل 2022 جىلمەن سالىستىرعاندا 11 ۇيىمعا كوپ. عىلىمي قىزمەتكەرلەردىڭ سانى 25،4 مىڭ ادامعا جەتتى، ولاردىڭ 46%-ى جاس عالىمدار. بۇل كورسەتكىش جاس مامانداردىڭ عىلىمعا دەگەن قىزىعۋشىلىعى مەن قاتىسۋىن ارتتىرۋدا.
مەملەكەت جاس عالىمدارعا قولداۋ كورسەتۋ ءۇشىن كوپتەگەن شارالار قابىلداۋدا. 2024 جىلى پرەزيدەنتتىڭ تاپسىرماسى بويىنشا 315 جاس عالىم پاتەر الدى. ونىڭ 290-ى «وتباسى بانكىمەن» بىرلەسىپ ىسكە اسىرىلاتىن ارنايى يپوتەكالىق باعدارلاما اياسىندا ءۇي السا، 25 عالىمعا وتەۋسىز نەگىزدە تۇرعىن ءۇي بەرىلدى. بۇل شارالار جاس عالىمداردىڭ الەۋمەتتىك مارتەبەسىن ارتتىرىپ، عىلىمعا جاڭا كادرلاردىڭ كەلۋىن ىنتالاندىرۋعا باعىتتالعان.
قازاقستاندا عىلىمدى دامىتۋ ءۇشىن جاس عالىمدارعا جاسالىپ جاتقان قولداۋ كوپ. عىلىم سالاسىنداعى قارجىلاندىرۋدىڭ ۇلعايۋى، عىلىمي ۇيىمداردىڭ جاڭعىرتىلۋى جانە جاس عالىمدارعا ارنالعان ءتۇرلى باعدارلامالار بۇل سالانى ودان ءارى دامىتا وتىرىپ، ەلىمىزدىڭ عىلىمي الەۋەتىن ارتتىرۋعا مۇمكىندىك بەرەدى.