«Hit beat music» اتتى قارجى پيراميداسى انىقتالدى.
قارجى مونيتورينگى اگەنتتىگىنىڭ الماتى قالاسى بويىنشا دەپارتامەنتى Hit beat music دەپ اتالاتىن قارجى پيراميداسىن قۇرۋ جانە باسقارۋ كۇدىگى بويىنشا سوتقا دەيىنگى تەرگەۋدى باستادى، دەپ حابارلايدى Almaty-akshamy.kz.
Ulysmedia.kz cايتىندا جاريالانعان اقپاراتقا سايكەس، كۇدىكتى جارنامالىق شوۋ-پرەزەنتاسيا وتكىزۋ كەزىندە ۇستالدى.
«Hit beat music (HBM Group) ينۆەستيسيا سالاسىنداعى اقپاراتتىق-تالدامالىق كومپانيا رەتىندە جاسىرىنىپ، ءوزىنىڭ زاڭسىز قىزمەتىن جۇزەگە اسىرعان. كومپانيا سەنگىش ازاماتتارعا تۇراقتى سىياقى الۋعا كەپىلدىك بەرەتىن كانادالىق مۋزىكالىق ينۆەستيسيالىق جوبالارعا اقشا سالۋدى ۇسىندى. سونىمەن قاتار، Hit beat music (HBM Group) قازاقستان اۋماعىندا زاڭدى تۇلعا، وكىلدىك جانە فيليال رەتىندە تىركەلمەگەن، سونداي-اق اشىق بانكتىك شوتى جوق. سالىمشىلاردىڭ جارنالارى كىرىس كاسسالىق وردەرلەرىن رەسىمدەمەي قولما-قول نىساندا جۇرگىزىلەدى. تىركەلگەن پايدالانۋشىلاردىڭ جالپى سانى 2300-دەن اسادى»، – دەلىنگەن حابارلامادا.
قازىرگى ۋاقىتتا «Hit beat music» ۇيىمداستىرۋشىسى 2 ايعا قامالدى.
قما مەن پروكۋراتۋرا ورگاندارى ازاماتتاردى قىراعى بولۋعا جانە ءوز جيناقتارىن كۇماندى قارجى ۇيىمدارىنا سالماۋعا شاقىردى.