قازاق ونەرىنىڭ اسقارى - اسقار نايمانتايەۆ دۇنيەدەن ءوتتى.
بۇل تۋرالى ونىڭ ونەردەگى دوسى ءارى ارىپتەسى ۇلان ءنۇسىپالى ءوزىنىڭ Facebook پاراقشاسىندا جازدى، دەپ حابارلايدى Almaty-akshamy.kz.
«قوش، قايران دوس! قادىرىڭە جەتە الماساق، كەش ءبىزدى...»، - دەلىنگەن جازبادا.
اسقار نايمانتايەۆ 1965 جىلى، 17-ماۋسىم كۇنى، الماتى وبلىسى، نارىنقول اۋىلىندا، ونەرلى وت باسىندا دۇنيەگە كەلگەن. اكەسى ءابدىعالىم نايمانتايەۆ "نارىنقول حالىق تەاترىندا" رەجيسسەر، ال، اناسى رافيا رايجانوۆا سول حالىق تەاترىنىڭ اكتريساسى بولىپ قىزمەت اتقارعان. اسقاردىڭ بالالىق ءومىرى سول تەاتر ىرگەسىندە ءوتتى. حالىق تەاتر ساحناسىنا ەڭ العاش م.اۋەزوۆتىڭ "ەڭلىك-كەبەك" سپەكتاكلىندەگى ەڭلىكتىڭ بالاسىنىڭ ورنىنا جورگەكتەگى كەزىندە شىققان. ءوزى رەجيسسەرلىق كاسىپپەن مەكتەپ قابىرعاسىندا جۇرگەندە اينالىسا باستادى. مەكتەپ ساحناسىندا 6-سىنىپتان باستاپ ق.جەتپىسبايەۆتىڭ "بالا مەرگەن"، س.ءجۇنىسوۆتىڭ "جارالى گۇلدەر" سياقتى بىرنەشە سپەكتاكلدەردى ساحنالادى.
"الماتى تەاتر جانە كوركەمسۋرەت" ينستيتۋتىندا كسرو حالىق ءارتيسى حاديشا بوكەيەۆا مەن قازاقستاننىڭ حالىق ءارتيسى تۇڭعىشباي جامانقۇلوۆتىڭ كلاسىندا "تەاتر جانە كينو اكتەرى" ماماندىعى بويىنشا وقىپ، ديپلوم العان سوڭ قازاقتىڭ م.و.اۋەزوۆ اتىنداعى اكادەميالىق دراما تەاترىنا جولداما الدى. تەاتر ساحناسىندا كوپتەگەن سپەكتاكلدەردە باستى رولدەردى سومدادى. ج.تاشەنوۆ، ي.ءساۆۆينننىڭ "كوشەدە جۇرگەن پاقىردى، اكىم بول دەپ شاقىردى" سپەكتاكلىندە نۇرتازا ءرولىن، ش.ايتىماتوۆتىڭ "عاسىردان دا ۇزاق كۇن" سپەكتاكلىندە ءسابيتجان ءرولىن، م.ماقاتايەۆتىڭ "قوش ماحابباتىندا" قاسىم، ج.ايماۋىتوۆتىڭ "اقبىلەگىندە" بالتاش رولدەرىن ويناپ، ءازىربايجان مامبەتوۆ، ءاسانالى ءاشىموۆ، بولات اتابايەۆ، اۋباكىر راحيموۆتاي دارىندى رەجيسسەرلارمەن قىزمەت اتقاردى. قازاق ەستراداسىنىڭ ساحناسىندا اسقار نايمانتايەۆ "تاماشا" ويىن-ساۋىق وتاۋى ارقىلى كوپشىلىككە تانىمال بولدى.رەسپۋبليكامىزدىڭ ەسترادا ونەرىنىڭ تاريحىندا اسقار نايمانتايەۆ اشقان "تەرىسقاقپاي"، "اققۋ-گاككۋ" كومەديالىق تەاترلارىنىڭ ورنى ەرەكشە. اسقار اقيىق اقىن مۇقاعالي ماقاتايەۆ جىرلارىن دارىپتەۋشى رەتىندە دە ەداۋىر ەڭبەك ەتتى. "بۇگىن مەنىڭ تۋعان كۇنىم" اتتى كونسەرتتىك جوباسى رەسپۋبليكالىق تەلەارنالار ارقىلى بىرنەشە جىل قاتارىنان وتكەن ءداستۇرلى حالىق سۇيگەن جوباعا اينالدى. "مۇقاعالي اتىنداعى سىيلىقتىڭ" قۇرىلتايشىسى بولىپ، مۇقاعالي مۇراسىن دارىپتەۋگە ەڭبەك ەتكەن جازۋشى، اقىن، ءانشى، كومپوزيتورلاردى ماراپاتتادى. اسقار نايمانتايەۆ ەسترادا ونەرىنىڭ ساحناسىندا "رەترو جۇلدىزدار شاقىرادى"، "ايتىڭىز قابىل بولسىن"، "جاڭا جىلعا-جاڭا جۇلدىزدار" "قازاقشا ديسكوتەكا" سىندى كوپتەگەن تانىمال جوبالاردىڭ ۇيىمداسترۋشى-رەجيسسەرى، ساتيرا تەاترلارىنىڭ قويىلىمدارىنىڭ، "دايكپرەسس" باسپاسىنان 2004 جىلى مەملەكەتتىك تاپسىرىسپەن شىققان ساتيرالىق "تەرىس كىتاپ" جيناعىنىڭ اۆتورى. مۇقاعالي ماقاتايەۆتىڭ مۇراسىن دارىپتەۋگە سىڭىرگەن ەڭبەگى ءۇشىن اۋعان سوعىسى ارداگەرلەرىنىڭ "قازاقستان ارداگەرلەرى" قاۋىمداستىعى كەڭەسىنىڭ 2007 جىلدىڭ 9-اقپان كۇنگى شەشىمىمەن "قايىرىمدىلىعى ءۇشىن "ساۋاپ" مەدەلىمەن ماراپاتتالدى. قازاقستان رەسپۋبليكاسىنىڭ 2008 جىلدىڭ 8- جەلتوقسان كۇنگى جارلىعى بويىنشا "قازاقستاننىڭ ەڭبەك سىڭىرگەن قايراتكەرى" قۇرمەتتى اتاعى بەرىلدى. اسقار نايمانتايەۆ "اينالايىن"، "دوماشنيە ۆوينى" سەريالدارىنىڭ سەناريستەر توبىندا بولىپ، كوپتەگەن تەلە جوبالاردىڭ، سەريالداردىڭ، ساحنالىق قويىلىمداردىڭ سەناريلەرىن جازدى. الماتى قالاسىندا ءوزىنىڭ "تالانتتار مەكتەبىن" اشىپ، وندا جاس ۇرپاقتى ونەرگە باۋلۋعا ەڭبەك ەتىپ جاتىر. بۇگىنگى تاڭدا ول مەكتەپ جاستارعا “اكتەر ونەرى” ماماندىعىن وقىتاتىن “Bilte” akademy” بولىپ وزگەرىپ، جۇمىس ىستەپ جاتىر. ت.جۇرگەنوۆ اتىنداعى ۇلتتىق ونەر اكادەمياسىندا ۇستازدىق ەتەدى. 2014 جىلى "استانا" تەلەارناسىنىڭ تاپسىرىسى بويىنشا تۇسىرىلگەن "دوماشنيە ۆوينى" سەريالىنىڭ قويۋشى رەجيسسەرى بولدى. 2014 جىلدىڭ مامىر ايىندا جامبىل وبىلىستىق قازاق دراما تەاترىندا وسپانحان اۋباكىروۆتىڭ "تەرىسقاقپاي" كومەدياسىنىڭ جەلىسىمەن "ءڭوڭ" اتتى كومەديالىق دۋماننىڭ قويۋشى رەجيسسەرى بولدى. پرەمەراسى 30،31 مامىر كۇندەرى بولىپ ءوتتى.
2018 جىلى مۇقاعالي ماقاتيەۆ شىعارماسىنىڭ جەلىسىمەن “اققۋلار ۇيىقتاعاندا” اتتى قىسقامەتراجدى. كوركەم-پوەتيكالىق فيلم ءتۇسىردى. 2019 جىلى “ۆامپير كۇيەۋ” اتتى كومەديالىق فيلم ءتۇسىردى. 2020 جىلى س.مۇقانوۆ اتىنداعى سقو سازدى درام تەاترىنىڭ ساحناسىنا “مەڭدۋانا ماحاببات” اتتى كومەديانى ساحنالادى. پرەمەراسى 21-اقپان كۇنى بولدى. اسقار نايمانتايەۆ تەلە جۇرگىزۋشى رەتىندە دە “TamashaTV” ارناسىندا “ءبىر عانيبەت”، “Jastar TV”ارناسىندا “ماسقارا شوۋ” حابارلارىن جۇرگىزدى. ول حابارلاردىڭ، جوعارىدا اتالعان فيلمدەردىڭ سەناريلەرىن ءوزى جازدى. 2018 جىلى ستۋدەنتتەرگە ارنالعان “كونفەرانسە - اكتەر جانە كوركەمسوز شەبەرى” كىتابى مەن “التىن توردان شىققان ءان” اتتى جيناعى جارىق كوردى. "دوماشنيە ۆوينى"، “باستىق بولامىن”، “ورىStar ۆ شىمكەنتتە”، “دەتەكتيۆ اجە” ،"تۋىسقاندار"، "بۇيىمتاي"، "وسەكشىلەر" "ۆنۋكي ۆ اۋلە" كومەديالىق سەريالدارىندا، ساتىبالدى نارىمبەتوۆتىڭ "امانات"، باقىتاس سانيتاستىڭ "تەزەك" فيلمدەردىندە وينادى. باستى رولدەر سومدادى. بىرنەشە پەسا، كينوسەناريلەر، تەلەجوبالاردىڭ، اۋدارمالاردىڭ اۆتورى. 2020 جىلى الماتى وبلىسى رايىمبەك جانە ۇيعىر اۋداندارىندا "ءحانتاڭىرى" جانە "قارادالا" تەاترلارىن اشتى. ول تەاترلاردىڭ اشىلۋى رەسپۋبليكا كولەمىندە ەلەۋلى وقيعا بولدى. ەكى تەاتر اشىلا سالا گەرمانيانىڭ فرانكفۋرت نا ماينە قالاسىندا وتكەن حالىقارالىق فەستيۆالدىڭ گران پري جانە باس جۇلدەسىنە يە بولدى. بۇگىنگى كۇنگە دەيىن سول ەكى تەاتر مەن 2015 جىلى ءوزى اشقان قاراكەمەر بالالار تەاترىن (ەڭبەكشىقازاق اۋدانى) العا سۇيرەپ كەلەدى. "قارادالا" تەاترى قازاق پەن ۇيعىر حالقىنىڭ ونەرپازدارى باس قوسا جۇمىس ىستەپ جاتقان ەرەكشە تەاتر. تەاتر رەپەرتۋارىندا ەكى ۇلتتىڭ دا قوعام، ادەمبيەت قايراتكەرلەرى تۋرالى قويىلىمدار بار. "قاراكەمەر" بالالار تەاترى" وبلىستاعى بالالارعا ارنالعان جالعىز تەاتر. 2022 جىلى "التىن توردان شىققان ءان"، "كونفەرانسە" ، "تەرىس كىتاپ" اتتى كىتاپتارى قايتا باسىلىپ، جاڭادان "حالىق تەاترىنىڭ قالتا كىتابى" اتتى كىتابى جارىق كوردى. قوعام قايراتكەرى رەتىندە دە الەۋمەتكە تانىمال تۇلعا.
اقپارات Kk.wikipedia.org-تان الىندى