پاسيەنت كىندىك قانىنىڭ باعانالى جاسۋشالارىمەن جاسالعان تەراپيادان سوڭ ساۋىققان
عالىمدار الەمدە ءۇشىنشى ادامنىڭ ايتۆ-دان ەمدەلىپ شىققانىن مالىمدەدى، دەپ حابارلايدى Almaty-akshamy.kz Lenta.ru سايتىنا سىلتەمە جاساپ.
اقش-تاعى ءجيتس-تى حالىقارالىق كلينيكالىق زەرتتەۋ جەلىسىنىڭ عالىمدارى ءۇشىنشى پاسيەنت دەرتىنەن قۇلان-تازا ايىقتى دەپ وتىر. ورتا جاستاعى ايەل ادام قان وبىرىنىڭ ەكسپەريمەنتتىك تەراپياسىنان كەيىن ارادا ءتورت جىل وتكەندە ۆيرۋستى جەڭىپ شىققان.
بۇعان دەيىن سۇيەك ءتىنىن ترانسپلانتاسيالاعاننان كەيىن ايتۆ تولىق رەميسسياسىنىڭ دالەلدەنگەن ەكى جاعدايى بەلگىلى بولاتىن. جوعارى ەكسپەريمەنتتىك ەمدەۋدىڭ الدىن الا ناتيجەسى بيىل دەنۆەردە وتكەن عىلىمي كونفەرەنسياسى بارىسىندا تانىستىرىلدى. الايدا ول تۋرالى ءالى رەسەنزيا جاسايتىن عىلىمي جۋرنالدارعا جاريالانىپ ۇلگەرمەگەن.
بەلگىلى بولعانداي، پاسيەنت كىندىك قانىنىڭ باعانالى جاسۋشالارىمەن جاسالعان تەراپيادان سوڭ ساۋىققان.
كىندىك قانىنان الىنعان باعانالى جاسۋشالاردىڭ ورنىعىپ، جاڭا قان جاسۋشالارىن ءوندىرۋى ءۇشىن بىرنەشە اپتا قاجەت كورىنەدى. الايدا ايتۆ قورعانىس لەيكوسيتتەرىنىڭ ءبولىنۋى باستالعانعا دەيىن ولارعا «شابۋىل» جاساۋى مۇمكىن. سول ءۇشىن عالىمدار باعانالى جاسۋشانى اۋىستىرماس بۇرىن قان توبى سايكەس كەلەتىن تۋىسىنىڭ قانىن قۇيىپ، ترانسپلانتاتقا ۆيرۋسقا قارسى ۋاقىتشا قورعانىس بەرگەن.
ودان بولەك، شاراناداعى دنق جاسۋشاسىندا CCR5 گەنىنىڭ ەكى كوشىرمەسىندە دە delta-32 مۋتاسياسى بولعان. بۇل گەن C-C-رەسەپتور حەموكين 5 س-س-رەسەپتورىنىڭ اقۋىزىن كودتايدى. سونىڭ كومەگىمەن ايتۆ يممۋندىق ت-جاسۋشالارعا قوسىلىپ، ىشكە ەنەدى. ال delta-32 مۋتاسياسى ونى بولدىرمايدى. مۇنداي مۋتاسياسى بار ادامدار ايتۆ-تى قابىلدامايدى دەپ وتىر ماماندار.