الماتىدا تاعام جەتكىزۋشىلەرى دە ەندى تارتىپكە باعىناتىن بولادى. پوليسيا دەپارتامەنتى ەندى ولاردىڭ سومكەسىن نومىرلەۋدى ۇسىنىپ وتىر. بۇل كوپ جاعدايدا جول اپاتىنىڭ سەبەپكەرى بولاتىن موپەد پەن سكۋتەر جۇرگىزۋشىلەرىنىڭ جاۋاپكەرشىلىكتەن قاشىپ قۇتىلماۋىنا تۇرتكى بولماق. ءتارتىپ ساقشىلارىنىڭ بۇل باستاماسىنا بىردەن 2 بىردەي ءىرى كومپانيا قولداۋ بىلدىرگەن.
تاماق تاسىمالدايتىن ءىرى جەلىلەردىڭ ءبىرى سومكەلەردى نومىرلەۋدى ءبىر جىل بۇرىن باستاپتى. بارلىق قوراپتىڭ ءۇش جاعىنان جەكە نومىرلەر جابىستىرعان. ال كومپانيا باسشىلىعى قىزمەتكەرلەرگە كۇندەلىكتى ءتۇسىندىرۋ جۇمىستارىن جۇرگىزەدى ەكەن. قانداي دا ءبىر ءتارتىپبۇزۋشىلىق بولعان جاعدايدا جاۋاپكەرشىلىكتەن قاشپايمىز دەيدى.
– ءبىز ءوز قىزمەتكەرلەرىمىز ءۇشىن قاتتى الاڭدايمىز، ولاردىڭ قاۋىپسىزدىگىن قامتاماسىز ەتكىمىز كەلەدى. سونداي-اق، بۇل تۇتىنۋشىلارمەن كەرى بايلانىس ورناتۋعا كومەكتەسەدى. قانداي دا ءبىر ارىز-شاعىم بولسا، سول ءنومىردى ايتىپ جاۋاپتىلارعا حابارلاسسا بولادى. وسىلايشا قىزمەت ساپاسىن ارتتىرۋدى كوزدەيمىز، – دەيدى تاعام جەتكىزۋشى كومپانيانىڭ وپەراسيالىق ديرەكتورى يلحام يسمايلوۆ.
كوبىنە تاماق تاسۋشىلار قاراپايىم ەرەجەلەردى ەسكەرمەيدى. ولار تاپسىرىستى تەز جەتكىزۋ ءۇشىن كەيدە ءتىپتى جاياۋ جۇرگىنشىلەر جولىنا شىعىپ كەتىپ، موپەدپەن ادامداردى قاعىپ كەتۋى دە مۇمكىن. بۇرىندارى ولاردى تابۋ مۇمكىن بولمايتىن. ويتكەنى، ءبارىنىڭ سومكەسى بىردەي ءارى وندا نومىرلەرى كورسەتىلمەيتىن. ەندى ولاردى نومىرلەسە، ءتارتىپبۇزۋشىلىق ورىن العان جاعدايدا ءىزىن سۋىتپاي، تاۋىپ الۋعا بولادى.
ال جول قاۋىپسىزدىگىنە جاۋاپ بەرەتىن قاۋىمداستىق وكىلىنىڭ ايتۋىنشا، بۇل باستاما اپاتتى جاعدايدىڭ الدىن الۋ ءۇشىن جەتكىلىكسىز دەيدى. ونىڭ ايتۋىنشا، زاڭ جۇزىندە وزگەرىستەر ەنگىزۋ قاجەت.
– ءبىز ىشكى ىستەر مينيسترلىگى مەن پارلامەنت ماجىلىسىنە موپەد سەكىلدى كولىكتەردى تىركەۋ تۋرالى ماسەلەنى قايتا قاراستىرۋدى ۇسىنىپ وتىرمىز. ولارعا مەملەكەتتىك ءنومىر بەرىلۋ كەرەك. سوندا ساقتاندىرۋدى راسىمدەۋ نە بولماسا جاۋاپكەرشىلىككە تارتۋدى باقىلاۋعا بولادى، – دەدى «جالپى جول» قاۋىمداستىعىنىڭ پرەزيدەنتى ارسەن شاكۋوۆ.
پوليسيا دەپارتامەنتىنىڭ مالىمدەۋىنشە، جىل باسىنان بەرى تاعام تاسىمالداۋشىلاردىڭ قاتىسۋىمەن 250-دەن استام جول كولىك وقيعاسى تىركەلگەن. 270 ادام زارداپ شەگىپ، 5 ادام قازا تاپقان.