الماتىلىق سيقىرشى-يلليۋزيونيست جەڭىس ايتجانوۆ ءۇش رەت گيننەستىڭ رەكوردتار كىتابىنا ەندى. بۇل جولى ول ءوزىنىڭ ەكى رەكوردىن جەڭىپ، ءتورت تيىندى قول ساۋساقتارىنىڭ اراسىندا اينالدىرۋ بويىنشا ۇزدىك اتاندى. تالاپ – تيىنداردى ساۋساقتاردىڭ اراسىندا قولمەن بۇراۋ جانە بارىنشا ۇزاق ۋاقىت اينالدىرۋ.
ول العاش رەت 2015 جىلى قول ساۋساقتارىمەن ءبىر تيىندى توقتاۋسىز 55 سەكۋند ىشىندە 55 رەت اينالدىرىپ، الەمدى تاڭقالدىرعان. ودان سوڭ ءتورت تيىندى قول ساۋساقتارىنىڭ اراسىندا 14 رەت 60 سەكۋند ىشىندە شىر اينالدىردى. مۇنداي ءادىستى الەمنىڭ مىقتى دەگەن يلليۋزيونيستەرى قايتالاي المايدى. بۇل جولى ول ءوزىنىڭ الدىڭعى رەكوردىن بۇزىپ، ءتورت تيىنمەن 16 اينالىم جاسادى.
– رەكورد جاساۋ ءۇشىن قازىلار القاسى مۇقيات تەكسەرگەن قاراپايىم تيىندار پايدالانىلادى. تەك ءۇش رەت تالپىنىس جاسالدى، ءبىراق ءبارى ويداعىداي ءوتتى، – دەيدى جەڭىس. ءقازىر جاس جىگىت تاعى دا ءوز رەكوردىن جاڭارتۋعا نيەتتى. ازىرگە جاتتىعۋ رەجيمىندە ول 17 بۇرالۋ جاساۋدا.
ءتورت تيىندى ازعانتاي سەكۋندتتىڭ ىشىندە ساۋساقتارىندا اينالدىرۋ ءۇشىن قول ەپتىلىگى مەن ويلاۋ جۇيەسىنىڭ جىلدام جۇمىس ىستەۋى ماڭىزدى. سيقىرشى جەڭىس ايتجانوۆ وسى ءتاسىلدى جەتىك مەڭگەرگەن. ەپتىلىگىمەن قوسا ءار ادامنىڭ پسيحيكاسىن وزگەلەردەن ارتىق ءارى جىلدام تۇسىنە ءبىلۋى وعان الەمدىك رەكورد ورناتۋعا كومەكتەستى. ايتۋىنشا، ادامنىڭ كوزىن ارباۋ ادەمى سويلەۋ ارقىلى جۇزەگە اساتىن كورىنەدى. تيىن اينالدىرۋدان بولەك، ۇيالى تەلەفوننىڭ جاسىرىن كودىن وپ-وڭاي تاباتىن دا قىرى بار.
بالا كۇنىنەن عاجايىپقا سەنگەن جەڭىس ايتجانوۆ 6 جاسىنان تىلسىم، جۇمباققا تولى ونەرگە ەنىپ كەتتى. اتاقتى سيقىرشىلاردىڭ شوۋلارىن كورىپ، فوكۋستارىن ۇيرەنۋگە كۇش سالادى. كۇن سايىن كورگەن سيقىرىن قايتالاپ، قول ەپتىلىگىن ارتتىردى. تيىنى قولىنان قايتا-قايتا ءتۇسىپ، تۇك شىقپاعان ساتتە وسى ءبىر ونەردى قالاي دا بولسا ۇيرەنەمىن دەگەن ماقسات قويادى. نەگىزگى ماماندىعى – ەكونوميست. ءبىراق ونىڭ جانىنا قارجىگەرلىكتەن گورى يلليۋزيا ونەرى جاقىن. ايتۋىنشا، رەكورد ورناتۋ دا وڭاي شارۋا ەمەس. سيقىردى مىقتىلارعا دالەلدەۋ قيىننىڭ قيىنى.
ول الدىن الا دايىنداپ العان رەكۆيزيتتەن گورى، حالىقتىڭ قولىنداعى زاتتاردى پايدالانۋ ارقىلى سيقىر ويلاپ تابادى. رەپەرتۋارىنداعى فوكۋستارىنىڭ جارتىسىنىڭ اۆتورى – ءوزى. سوندىقتان ونەرىن حالىق شىنايى دەپ ەسەپتەيدى. باستى ماقساتى – قازاق ەلىندە يلليۋزيا ونەرىن وركەندەتۋ. ول الەمنىڭ 25 ەلىندە ونەر كورسەتكەن، «قازاقستاننىڭ 100 جاڭا ەسىمى» جوباسىنىڭ قاتىسۋشىسى. سونداي-اق، جەڭىس قايىرىمدىلىق ەرىكتىسى، ويتكەنى ول ونى ءار ادامنىڭ اجىراماس بولىگى دەپ سانايدى.