بانكتەر كىمگە نەسيە بەرۋگە بولاتىنىن، كىمگە بەرۋگە بولمايتىنىن قالاي انىقتايدى؟ تابىسى تومەن ماماندىق يەلەرى سىرت قالادى ما؟
اينۇر، المالى اۋدانى.
بانكتىڭ كرەديت كوميتەتى قارىزگەردى تاڭداعاندا ونىڭ باسقا نەسيەلەرى بار-جوقتىعىن، بۇدان بۇرىن العان نەسيەلەرىن قالاي تولەگەنىن، تابىسىن ەسەپكە الادى. قارجى ۇيىمدارىنىڭ بۇل سۇراققا رەسمي جاۋابى وسىنداي بولىپ كەلەدى. ءبىراق بەيرەسمي اقپاراتقا ءسۇيەنسەك، بانكتەر قارجىگەرلەر مەن زاڭگەرلەرگە نەسيە بەرۋدەن قاتتى ساقتانادى. ولاردىڭ تابىسى، ءتىپتى بىرنەشە مىڭ دوللار بولسا دا نەسيەگە ءوتىنىشىن ماقۇلدامايدى. ويتكەنى، وسى ەكى ماماندىق يەلەرى كەلىسىمشارتتىڭ بۇگە-شىگەسىن جاقسى بىلەتىندىكتەن، ەرتەڭ بانك مەنەدجەرلەرىنىڭ ەكى اياعىن ءبىر ەتىككە تىعۋى مۇمكىن.
سونداي-اق، قوماقتى كرەديت الىپ، زاڭ بويىنشا بانكتى «لاقتىراتىنداردىڭ» دەنى زاڭگەرلەر دەگەن مالىمەت تە بار. ودان وزگە كولىك جۇرگىزۋشىلەرى، پوليسيا، ۇلتتىق قاۋىپسىزدىك قىزمەتى جانە اسكەريلەر نەسيە بەرىلمەيتىن ماماندىقتاردىڭ بەيرەسمي تىزىمىنە كىرەدى.