تابىستى ايەلدىڭ ۇلگىسى

سينگاپۋر پرەزيدەنتى حاليما ياكوب كۇنسۇلۋ زاكاريانى تابىستى ايەل رەتىندە مىسالعا كەلتىردى.

حاليما ياكوب قازاقستاندى ايەلدەرگە تەڭ مۇمكىندىكتەر بەرۋ بويىنشا تاجىريبە الماسۋعا شاقىردى، دەپ حابارلايدى Almaty-akshamy.kz

«سينگاپۋردا ايەلدەردىڭ مۇمكىندىكتەرىن كەڭەيتۋمەن وتە بەلسەندى اينالىسامىز. بۇۇ ەسەبىنە سايكەس، سينگاپۋر ايەلدەردىڭ مۇمكىندىكتەرىن كەڭەيتۋ سالاسىندا 7ء-شى ورىندا تۇر. سينگاپۋر پارلامەنتىندە ايەلدەردىڭ ۇلەسى 30%-عا جەتەدى جانە مۇنىمەن توقتاپ قالمايمىز. ءبىز ايەلدەردىڭ مەملەكەتتىك قۇرىلىم جۇيەسىندە قانداي ءرول اتقاراتىنى تۋرالى ەسەپ جاريالادىق جانە ءارقاشان ينكليۋزيۆتى قوعامعا ۇمتىلامىز. ەرلەر دە، ايەلدەر دە – قوعامداستىقتىڭ تەڭ مۇشەلەرى. ءبىز سەرىكتەستىك قاتىناستارعا نەگىزدەلگەن وسى ءتاسىلدى ۇستانامىز»، - دەدى سينگاپۋر پرەزيدەنتى نازاربايەۆ ۋنيۆەرسيتەتىندە وتكەن دارىستە.

سينگاپۋر پرەزيدەنتى قازاقستاننىڭ تەڭدىك يدەياسىن ىلگەرىلەتۋ ءۇشىن ورتالىق ازيادا العاش رەت ايەلدەر ماسەلەلەرى جونىندەگى ارنايى ورگان قۇرعانىن اتاپ ءوتتى.

«سونىمەن بىرگە، قازاقستاندا شەشىم قابىلداۋ پروسەستەرىنە قاتىساتىن ايەلدەر سانى دا ارتىپ كەلەدى. بۇل كورسەتكىش 2030 جىلعا قاراي ارتا تۇسەدى. قازاقستان ايەلدەرىنىڭ جوعارى ءبىلىمدى، جاقسى مانساپ قۇرۋعا ۇمتىلاتىنىن بىلەمىن. مىسال رەتىندە عىلىم اكادەمياسىنىڭ پرەزيدەنتى كۇنسۇلۋ زاكاريانى ايتقىم كەلەدى. قازاقستاندى ايەلدەرگە وسىنداي مۇمكىندىك بەرۋ سالاسىنداعى ءوز تاجىريبەسىمەن بولىسۋگە شاقىرامىن»، - دەدى حاليما ياكوب.

ونىڭ ايتۋىنشا، تاعى ءبىر نەگىزگى باعىت – ەڭبەك نارىعىنداعى تەڭ مۇمكىندىكتەر. سينگاپۋر ۇكىمەتى وسى تەڭ تاسىلگە قول جەتكىزۋ ءۇشىن جۇمىس بەرۋشىلەرمەن، كاسىپوداقتارمەن جۇمىس ىستەپ جاتىر.

«بۇل ەڭبەك نارىعى ءۇشىن قالىپتى نارسە بولۋى كەرەك. ەرلەر مەن ايەلدەر وتباسىندا جاۋاپكەرشىلىكتى تەڭ ءبولىپ، ەڭبەك نارىعىنا بىردەي قول جەتكىزۋى كەرەك»، - دەدى سينگاپۋر پرەزيدەنتى.