«OzgeEpic» ونەر كەڭىستىگىندە «Taboo» سپەكتاكلىنىڭ پرەمەراسى ءوتتى، دەپ حابارلايدى Almaty-akshamy.kz.
سپەكتاكلدىڭ رەجيسسەرى – البينا كۋلاحمەدوۆا، پەسا اۆتورى – ميا العوجايەۆا. جاس تالانتتار - تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ءبىتىرۋشى تۇلەكتەرى.
زامانداس جاستاردىڭ ءبىر-بىرىنىڭ ءتىلىن تۇسىنگەنى كورىنىپ تۇر. دراماتۋرگيالىق شىعارمانىڭ ءوزى قاقتىعىستار مەن كۇتپەگەن وقيعالارعا تولى. وعان قوسا جازىلۋىندا دا ەرەكشەلىكتەر بار. مىسالى، ءبىر كەيىپكەردىڭ بىرنەشە بەينەدە ويناۋى. وسى سەكىلدى تراكتوۆكالاردى ميا العوجايەۆانىڭ ءوزى دايىن ماتىندە بەرگەن. سوعان ساي رەجيسسەر اۆتوردىڭ شەشىمدەرىنە ەش قارسىلىقسىز ميزانسەنالار قۇرعان. ياعني سپەكتاكلدە دە پەسادا كەلتىرىلگەندەي ەكى اكتەر بوي كورسەتەدى.
قاسىم رولىندە – مەدەت باتىرجان، مەدبيكە رولىندە – نازەركە ۇزاقبەك. ولاردىڭ ءوز كەيىپكەرىنە دەگەن سۇيىسپەنشىلىكپەن جۇمىس جاساعانىن اڭعارامىز. بىردەن ءۇش بەينەنى بويىنا ءسىڭىرۋ وڭايعا سوقپايتىنى بەلگىلى. دەگەنمەن ساحناگەرلەردىڭ ويىنىنان ستانيسلاۆسكييدىڭ «كەيىپكەر جاندىلىعىنىڭ» ءدامىن تاتتىق.
ەگەر سپەكتاكلدىڭ قورىتىندى بولىگىن (اكتەرلەردىڭ بالاعا اينالىپ كەتىپ، الدىڭعى ساحنالاردىڭ بارلىعى ويىن بولىپ قالۋى) ەسەپكە الماساق، بۇل تۋىندىنى تەك اكتەرلىك ويىن مەن دراماتۋرگيا عانا قۇرىپ تۇر دەسەك بولادى. الايدا، قاسىمنىڭ بالا كەزدەن ءيۋپيدى جەگەنى ونىڭ بولاشاقتا كەسىر ىسكە باراتىنىنا سىلتەمە كەلتىرۋى. مەدبيكەنىڭ قايتا-قايتا قول ساعاتىنا قاراپ، ءومىر كەڭىستىگىندەگى ۋاقىتتىڭ ازدىعىن مەڭزەۋى سەكىلدى تاعى دا باسقا رەجيسسەرلىك شەشىمدەردى جوققا شىعارۋعا كەلمەس.
نەگىزگى تاقىرىپ ەسىرتكى بولعانىمەن، شىعارمادا بالا تاربيەسى، وتباسىلىق قيىندىقتار، ءومىردىڭ ءمانى سياقتى ماسەلەلەر دە كورىنىس تابادى. باستى كەيىپكەر قاسىمنىڭ زياندى ارەكەتكە بارۋى بالا كەزىندەگى ماتەريالدىق جوقشىلىقتان، اتا-انا تاربيەسىنىڭ كەمشىلىگىنەن ەكەنى ونى اقتاپ تۇر.
بۇل قويىلىمدى ستۋدەنتتىك جۇمىس رەتىندە قاراعان قاتەلىك بولار. تاپسىرىسپەن قويىلسا دا، تۋىندىنىڭ ماحابباتپەن جاسالعانىن سەزەمىز. ءوزىنىڭ ۇتىمدى شەشىمىن تاپقان سپەكتاكلدىڭ عۇمىرى ۇزاق بولعاي.