بيىل قىستا قازاقستان رەكوردتى مولشەردە گاز تۇتىنعان.
قىس قاھارىنا مىنگەندە، ەلدە كوگىلدىر وتىندى تۇتىنۋ كولەمى كۇرت ارتقان. سالا ماماندارىنىڭ ايتۋىنشا، جىلىتۋ ماۋسىمى كەزىندە ساعاتىنا 4 ملن تەكشە مەتر گاز قولدانىلدى،
بۇعان دەيىنگى ماۋسىمداردا 3،5 ملن تەكشە مەتر شاماسىندا عانا تۇتىنىلعان ەدى. قاڭتارداعى سارشۇناق ايازدىڭ سالدارىنان ەلىمىزدە تابيعي گازدى تۇتىنۋ كولەمى كۇرت ارتقان، دەپ حابارلايدى Almaty-akshamy.kz.
24.kz اقپاراتىنا سايكەس، بىلتىر تاۋلىگىنە 77 مىڭ 400 تەكشە مەتر قولدانىلسا، بيىل بۇل كورسەتكىش 95 مىڭ تەكشە مەترگە جەتكەن. بۇل – بۇرىڭ-سوڭدى بولماعان رەكوردتىق كورسەتكىش. قازىرگى تاڭدا ۇكىمەت «QazaqGaz» ۇلتتىق كومپانياسىمەن بىرگە ەلدەگى وتىن-ەنەرگەتيكالىق قاۋىپسىزدىكتى قامتۋدىڭ جوسپارىن ايقىنداعان. وسى رەتتە حالىقتىڭ كوگىلدىر وتىندى ۇنەمدەپ تۇتىنۋى اسا ماڭىزدى، - دەيدى سالا ماماندارى.
«گاز - ول ۇلكەن رەسۋرس. باعالى رەسۋرس. ونى ءوندىرۋ، گەولوگيالىق بارلاۋ جاساۋ جانە دە تاسىمالداپ، تۇتىنۋشىلارىمىزعا اكەلۋ وتە ۇلكەن، قيىن جۇمىس. جانە دە قىمبات جۇمىس. سوندىقتان قىمبات رەسۋرستى ۇنەمدەپ، ەنەرگەتيكالىق قاۋىپسىزدىگىمىزدى ارتتىرۋعا بارلىق تۇتىنۋشىلارىمىزدى شاقىرامىن»، - دەيدى «QazaqGaz» ۇك اق ءتوراعاسى سانجار جاركەشوۆ.
بيىلعى جىلىتۋ ماۋسىمى رەسمي تۇردە 27 ساۋىردە اياقتالعان. ال كەلەر ماۋسىمعا دايىندىق ودان بۇرىن باستالىپ كەتتى. ماماندار اقاۋ شىققان گاز قوندىرعىلارى مەن قۇبىرلاردىڭ تەحنيكالىق تەكسەرىسىنە كىرىسكەن. ءقازىر ولاردى جاڭعىرتىپ، اۋىستىرۋ بويىنشا جۇمىستاردى جۇرگىزىپ جاتىر.
«گاز قوندىرعىلارىنىڭ تەحنيكالىق قىزمەت كورسەتۋ جۇمىستارى باستالدى. تولىقتاي اياقتالۋىنا شىلدە ايىنىڭ ورتاسى دەپ وتىرمىز. جىلىتۋ ماۋسىمىنا دايىقدىق تولىقتاي 1 قىركۇيەككە دەيىن اياقتالادى. جانە جىلىتۋ ماۋسىمىنا دايىندىق پاسپورتى ازىرلەنىپ، دايىن بولۋى شارت»، - دەيدى «قازترانسگازايماق» اق استانا وندىرىستىك فيليالى ديرەكتورىنىڭ ورىنباسارى ەرجان بالابەكوۆ.
ماماندار جەكە تۇرعىن ۇيلەر دە الداعى قىس ماۋسىمىنا دايىندىقتى وسى كەزدەن باستاعان ءجون دەيدى. جىلۋ ەكى ارادا جوعالىپ كەتپەس ءۇشىن ءۇيدىڭ قاسبەتىن، شاتىرى مەن ەدەنىن قالىڭداتقان ابزال. وسىلايشا جىلۋ جۇيەسىنە سالماق تۇسىرمەي، گازدى مەيلىنشە ۇنەمدەۋگە بولاتىن كورىنەدى.