سىرتتا جۇرگەن وتانداسىمىز لوندوندا قازاق ءتىلىن ۇيرەتىپ ءجۇر

بالالارى قازاق ءتىلىن ۇمىتپاسىن دەپ لوندوندا قازاق ءتىلى سىنىبىن اشقان انا

تاياۋدا لوندوندا وتانداسىمىز اسەل مولداعالييەۆا قازاق ءتىلى سىنىبىن اشتى، دەپ حابارلايدى Almaty-akshamy.kz

Almaty.tv سايتىنىڭ اقپاراتىنا سۇيەنسەك، بالالارى انا تىلىندە اعىلشىنشا اكسەنتپەن سويلەي باس­تاعانىن بايقاعان اسەل دەرەۋ قازاق ءتىلى سى­نىبىن اشۋدى ۇيعارعان. 

اسەلدىڭ ماماندىعى - ەسەپشى. دەگەنمەن، ءمۇعالىمنىڭ جۇمىسىن ءبىر كىسىدەي بىلەدى. ويتكەنى جاڭا ورتاعا تۇسكەن كەزدە ءتورت بالاسىنىڭ وقۋ ۇلگەرىمىن جوعارىلاتۋ ءۇشىن قولىنان كەلگەننىڭ بارلىعىن جاساعان. ۋاقىت وتە كەلە، بالالارىنىڭ قازاق تىلىندە اعىلشىن اكسەنتىمەن سويلەيتىنىن بايقاعان انا وسىنىڭ الدىن الۋدى ءجون سانايدى. كەيىننەن بالالارى تولىعىمەن قازاقشا سويلەۋدىڭ ورنىنا اراسىنا ءۇش-تورت ءتىلدى قوسىپ سويلەيتىندى شىعارعان.

اسەلدىڭ ايتۋىنشا، مۇنى تۇسىنۋگە بولادى، سەبەبى جاڭا ءتىل ۇيرەنىپ جۇرگەن بالانىڭ ءسوز اراسىندا سول تىلدەگى سوزدەردى اۆتوماتتى تۇردە ايتىپ قالاتىنى بەلگىلى. ءقازىر بالالارىنىڭ ءبىرى نەمىس، ءبىرى فرانسۋز ءتىلىن وقىپ ءجۇر ەكەن. كوپ ءتىل ءبىلسىن دەسەك تە، قازاق ءتىلىن ۇمىتپاسىن، اكسەنتپەن سويلەمەسىن دەگەن ماقساتپەن اسەل قازاق ءتىلى سىنىبىن اشۋدى قولعا الىپتى.

 «جالپى، مامىر ايىندا وسىنداي يدەيا تۋىنداعان سوڭ، ەڭ الدىمەن ساباق وتكىزەتىن ورىن ىزدەي باستادىم. ول ورىن جاي عانا كابينەت نەمەسە شاعىن كافە بولماۋى ءتيىس ەكەنىن ءاۋ باستان ءتۇسىندىم. سەبەبى بالالار ونداي جەرلەردە وقي المايدى، ولار مەكتەپتىڭ اتموسفەراسىن سەزىنۋى كەرەك. مەكتەپ اتموسفەراسىن سەزىنە العان بالا ءۇشىن وقۋدا كوپ قيىندىق بولمايدى. سوندىقتان بىردەن مەكتەپ ىزدەستىردىم. وسىندا ورنالاسقان A* Russian School مەملەكەتتىك مەكتەبىنىڭ ديرەكتورىمەن كەزدەسىپ، ءوز يدەيامدى ورتاعا سالىپ، ۇسىنىس ءبىلدىردىم. ول كىسى بىردەن قولداپ، سەنبى جانە جەكسەنبى كۇندەرى مەكتەپ كابينەتتەرىن جالعا بەرەتىن بولىپ كەلىستى. ءسويتىپ، قىركۇيەك ايىنىڭ ورتاسىنان باستاپ، ساباق جۇرگىزۋدى باستاپ كەتتىك»، - دەيدى اسەل مولداعالييەۆا.

ءقازىر ون جەتى بالا وقيدى، ولار ءۇش توپقا ءبولىنىپ وقىپ جاتىر. ساباققا قاجەتتى وقۋلىقتاردى قازاقستاننان الدىرتقان. بۇگىندە لوندونداعى بالالاردىڭ قازاق ءتىلىن ءبىلۋ دەڭگەيلەرى ءارتۇرلى. ولاردىڭ بەلسەندىلىگىن ارتتىرۋ ءۇشىن اسەلدىڭ ءتىل ۇيرەتۋ مەكتەبى جۇمىس ىستەپ جاتقان كورىنەدى