قازاقستان مەن شۆەيساريا اراسىنداعى ەكىجاقتى قارىم-قاتىناستار جاندانۋدا
ءسىم مالىمەتىنشە، قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى شۆەيساريا كونفەدەراسياسىنا رەسمي ساپارمەن باردى، دەپ حابارلايدى Almaty-akshamy.kz
قازاقستان مەن شۆەيساريا ەكىجاقتى قارىم-قاتىناستاردىڭ بارلىق سپەكترى بويىنشا ءوزارا ءتيىمدى، كوپ جوسپارلى ىنتىماقتاستىقتى دامىتۋعا نيەتتى. قازاقستان ءسىم باسشىسى م.تىلەۋبەردى شۆەيساريا ۆيسە-پرەزيدەنتى، فەدەرالدىق كەڭەسشىسى (ءمينيسترى) يگناسيو كاسسيسپەن كەلىسسوزدەرىنىڭ نەگىزگى لەيتموتيۆى وسىنداي.
«شۆەيساريا - قازاقستاننىڭ ەۋروپاداعى ماڭىزدى ساياسي جانە ەكونوميكالىق ارىپتەستەرىنىڭ ءبىرى. ءبىز سەنىمگە، ءوزارا قۇرمەتكە جانە ورتاق باسىمدىقتارعا نەگىزدەلگەن بەرىك قاتىناستار ورناتتىق. بۇل قاتىناستار جاھاندىق جانە وڭىرلىك قاۋىپسىزدىكتى قامتاماسىز ەتۋدەگى سەنىمدى سەرىكتەستىكپەن، سەرپىندى ساۋدا ىنتىماقتاستىقپەن، سونداي-اق ساياسي جانە تۇلعاارالىق قاتىناستارمەن نىعايتىلۋدا»، - دەدى م.تىلەۋبەردى.
قازاقستان مەن شۆەيساريانىڭ جوعارى باسشىلىعى اراسىنداعى بايلانىستاردىڭ قارقىندى دامۋىن جانە ەكى جاقتى ءوزارا ءىس-قيمىلدى نىعايتۋعا ءوزارا مۇددەلىلىكتىڭ ارتىپ كەلە جاتقانىن اتاپ ءوتىپ، تاراپتار ۇكىمەتارالىق، پارلامەنتارالىق جانە ىسكەرلىك بايلانىستاردى دامىتۋعا ودان ءارى جاردەمدەسۋگە كەلىستى. بۇل تۇرعىدا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ اعىمداعى جىلدىڭ قاراشاسىنا جوسپارلانعان شۆەيسارياعا رەسمي ساپارىنا دايىندىق بارىسىنا ەرەكشە نازار اۋدارىلدى.
حالىقارالىق ماسەلەلەر بويىنشا پىكىر الماسۋ بارىسىندا تاراپتار بۇۇ، ەقىۇ جانە باسقا دا كوپ جاقتى قۇرىلىمدار اياسىنداعى ءوزارا ءىس-قيمىلدى تالقىلادى. كەلىسسوزدەردىڭ كۇن تارتىبىنە وڭىرلىك ماسەلەلەر، سونىڭ ىشىندە اۋعانستانداعى جاعداي، ورتالىق ازيا ەلدەرىمەن ىنتىماقتاستىق جانە سۋ رەسۋرستارىن باسقارۋ كىردى. دامۋعا رەسمي كومەك جەلىسى بويىنشا، اتاپ ايتقاندا قازاقستاندىق KazAID حالىقارالىق دامۋ اگەنتتىگى جانە شۆەيساريانىڭ SDC دامۋ جانە ىنتىماقتاستىق اگەنتتىگى اراسىنداعى بىرلەسكەن جۇمىس اسپەكتىلەرى قوزعالدى.
كەلىسسوزدەر قورىتىندىسى بويىنشا دەلەگاسيا باسشىلارى ديپلوماتيالىق نەمەسە قىزمەتتىك پاسپورتتاردىڭ يەلەرىن ۆيزالىق تالاپتاردان ءوزارا بوساتۋ تۋرالى، سونداي-اق ديپلوماتيالىق وكىلدىكتەر، حالىقارالىق ۇيىمدار جانىنداعى تۇراقتى وكىلدىكتەر مەن كونسۋلدىق مەكەمەلەر قىزمەتكەرلەرىنىڭ وتباسى مۇشەلەرىنىڭ اقىلى ەڭبەك قىزمەتى تۋرالى ەكى ۇكىمەتارالىق كەلىسىمگە قول قويدى.
سىرتقى ساياسي كۇن تارتىبىندەگى ەكونوميكالىق ديپلوماتيانىڭ باسىمدىعىن ەسكەرە وتىرىپ، مينيستر م.تىلەۋبەردى سول كۇنى شۆەيساريانىڭ «Stadler Rail»، «Ammann Group»، «Sandoz»، «KS Genetics»، «Inoks Capital» جانە «Philip Morris International» ءىرى كومپانيالارىنىڭ باسشىلارىمەن كەزدەسۋلەر وتكىزدى.
قازاقستانداعى ينۆەستيسيالىق احۋالدى جاقسارتۋ بويىنشا قابىلدانىپ جاتقان شارالاردى ۇسىنا وتىرىپ، مينيستر شۆەيساريالىق ارىپتەستەردى ينۆەستيسيالاردى تارتۋدى ىنتالاندىرۋدىڭ جاڭا قۇرالى «ستراتەگيالىق ينۆەستيسيالىق كەلىسىممەن» تانىستىردى.
ساۋدا-ەكونوميكالىق ىنتىماقتاستىقتى دامىتۋدىڭ ۇلكەن الەۋەتى شۆەيساريا بيزنەسىنىڭ حيميا-فارماسيەۆتيكا جانە ماشينا جاساۋ، جاڭا تەحنولوگيالار مەن ەنەرگەتيكا سالاسىندا، اگروونەركاسىپ كەشەنى (اوك) مەن قارجى سەكتورىندا ءوزارا ءتيىمدى جوبالاردى ىسكە اسىرۋعا مۇددەلىلىگىمەن راستالادى. شۆەيساريانىڭ قازاقستاننىڭ ءىرى سىرتقى ەكونوميكالىق سەرىكتەستەرىنىڭ ءبىرى رەتىندەگى ءرولى مەن ماڭىزى اتاپ ءوتىلدى. 2020 جىلى شۆەيساريا قازاقستانعا تارتىلعان تىكەلەي شەتەلدىك ينۆەستيسيالار كولەمى بويىنشا 3ء-شى ورىندى، ال ءبىزدىڭ ەلمەن ەكىجاقتى ساۋدا كولەمى بويىنشا 10-شى ورىندى يەلەندى.
ساپار اياسىندا «Kazakh Invest» ۇك» اق مەن شۆەيساريالىق كومپانيالار اراسىندا قازاقستاننىڭ اوك جانە ماشينا جاساۋ سالاسىنداعى ينۆەستيسيالىق جوبالاردى ىسكە اسىرۋ بويىنشا ىنتىماقتاستىق تۋرالى مەموراندۋمدارعا قول قويىلدى.
سىرتقى ىستەر ءمينيسترى باستاعان قازاقستاندىق دەلەگاسيا بەرن تاريحي مۇراجايىندا قازاق مەملەكەتتىلىگىنىڭ تاريحىنان بىرەگەي مۇراعاتتىق ماتەريالدارعا ارنالعان ارنايى كورمەنى ارالادى. مۋزەيدە سونداي-اق ر.ب. سۇلەيمەنوۆ اتىنداعى شىعىستانۋ ينستيتۋتى، بەرن تاريحي مۋزەيىندە جانە بەرن ۋنيۆەرسيتەتى اراسىندا «ورتالىق ازيا مەن شۆەيساريانىڭ تۇركى حالىقتارىنىڭ مۇراسى» اتتى كەلىسىمگە قول قويۋ ءراسىمى ءوتتى.