قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ رەسمي ساپارمەن ۆەنگرياعا كەلىپ، ونىڭ شەڭبەرىندە قازاقستان-ماجارستان ستراتەگيالىق كەڭەسىنىڭ 6-شى وتىرىسىنا قاتىستى.
تاراپتار ساياسي، ساۋدا-ەكونوميكالىق، ينۆەستيسيالىق جانە مادەني-گۋمانيتارلىق سالالارداعى ەكىجاقتى قاتىناستاردىڭ وزەكتى ماسەلەلەرىن تالقىلادى، دەپ حابارلايدى اlmaty-akshamy.kz. ۇلتتىق مۇددەلەردىڭ «ءتۇيىسۋ نۇكتەلەرى» رەتىندە ەنەرگەتيكا، ونەركاسىپ، كولىك جانە لوگيستيكا، سۋ رەسۋرستارىنىڭ مەنەدجمەنتى جانە يننوۆاسيا، اۋىل شارۋاشىلىعى، ءبىلىم بەرۋ جانە تۋريزم سياقتى سالالار بولدى.
دەلەگاسيا باسشىلارى ساۋدا-ەكونوميكالىق سالاداعى قازاق-ماجار ىنتىماقتاستىعى ەكى ەل اراسىنداعى ستراتەگيالىق ارىپتەستىكتىڭ باستى قوزعاۋشى كۇشى ەكەنىن اتاپ ءوتتى. وسىعان بايلانىستى تاراپتار ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ الەۋەتىن ءتيىمدى پايدالانۋ جانە قازاقستان مەن ماجارستاننىڭ ىسكەر توپتارى اراسىنداعى ءوزارا ءىس-قيمىلدى جانداندىرۋ قاجەتتىگى جونىندە كەلىستى.
ق ر سىرتقى ىستەر ءمينيسترى استانا مەن بۋداپەشت اراسىنداعى ىنتىماقتاستىقتىڭ بارلىق سپەكترىن كەڭەيتۋ بويىنشا پراكتيكالىق قادامداردى ىسكە اسىرۋدىڭ ماڭىزدىلىعىن اتاپ ءوتتى. «ءبىزدىڭ ەلدەرىمىزدىڭ اراسىندا ساياسي دەڭگەيدەگى وتە جاقىن جانە سەنىمدى بايلانىستاردىڭ، ىسكەر توپتار اراسىنداعى جەمىستى ىنتىماقتاستىقتىڭ، سونداي-اق مادەني جانە ادامارالىق بايلانىستاردىڭ ارقاسىندا شەشىلمەگەن ماسەلەلەر جوق»، – دەدى م.نۇرتىلەۋ.
ءوز كەزەگىندە ماجار دەلەگاسياسىنىڭ باسشىسى ماجارستان قازاقستاننىڭ ەۋروپالىق وداقتاعى سەنىمدى سەرىكتەسى ەكەنىن مالىمدەدى. «ءبىز ءسىزدىڭ ەلىڭىزدەگى ساياسي جانە ەكونوميكالىق رەفورمالاردى قولدايمىز جانە تابىستى سەرىكتەستىگىمىزدى ودان ءارى بەلسەندى دامىتۋعا دايىنبىز»، – دەدى م.ۆارگا.
سونداي-اق، تاراپتار ماجارستان پرەمەر-مينيسترى ۆيكتور ورباننىڭ قازاقستانعا ساپارى كەزىندە قول جەتكىزىلگەن ۋاعدالاستىقتاردى ءىس جۇزىندە ىسكە اسىرۋ ماسەلەلەرىن تالقىلادى. اتاپ ايتقاندا، تاراپتار ءىرى بىرلەسكەن جوبالاردى ىسكە اسىرۋدا، ءوزارا ساۋدانى ءارتاراپتاندىرۋ جانە ۇلعايتۋدا كۇش-جىگەردى بىرىكتىرۋ ۋاعدالاستىقق قول جەتكىزدى. قازاقستان ەكسپورتتىق تاۋارلار نومەنكلاتۋراسىن سوماسى 700 ملن اقش دوللارىنا جۋىق 95 اتاۋعا ۇلعايتۋ نيەتىن راستادى.
قازاقستان تاراپىنىڭ ستاتيستيكاسى بويىنشا ەكى ەل اراسىنداعى تاۋار اينالىمى 2022 جىلى 172 ملن اقش دوللارىن قۇرادى، ال اعىمداعى جىلدىڭ 9 ايىندا وتكەن جىلدىڭ سايكەس كەزەڭىمەن سالىستىرعاندا 22%-عا ۇلعايىپ، 140 ملن دوللاردى قۇردى.
وتىرىس بارىسىندا وكىلدى دەلەگاسيا قۇرامىنا كىرگەن ق ر بەيىندى مينيسترلىكتەرىنىڭ وكىلدەرى دە ءسوز سويلەدى. اتوم ەنەرگياسىن بەيبىت ماقساتتا پايدالانۋ سالاسىندا ماماندار دايارلاۋ، سۋ رەسۋرستارىن ءتيىمدى باسقارۋدا تاجىريبە الماسۋ، سونداي-اق ساۋدا ميسسيالارىنىڭ ءوزارا ساپارلارىن ۇيىمداستىرۋ ماسەلەلەرىندە ودان ءارى ءوزارا ءىس-قيمىل جاساۋ جونىندە ۇسىنىستار ايتىلدى.
ستراتەگيالىق كەڭەس اياسىندا سۋ رەسۋرستارىن باسقارۋ بويىنشا قازاقستان-ماجارستان فورۋمى ءوتتى. ساراپشىلار سۋ رەسۋرستارىنا قاتىستى وزەكتى ماسەلەلەردى شەشۋ بويىنشا بەيىندى مينيسترلىكتەردىڭ بىرلەسكەن ءىس-شارالارىن وتكىزۋگە كەلىستى.
سونداي-اق، مينيستر م.نۇرتىلەۋ «Globalia» ماجار كومپانياسىنىڭ باسشىسى گابور شاگي جانە «استانا» حالىقارالىق قارجى ورتالىعىنىڭ (احقو) الاڭىندا جۇمىس ىستەيتىن «Equilibrium Capital» ينۆەستيسيالىق قورىنىڭ پرەزيدەنتى پيتەر نادپەن ەكىجاقتى كەزدەسۋلەر وتكىزدى.
كومپانيا باسشىلارى قازاقستاندا جاڭارتىلاتىن ەنەرگيا كوزدەرى، ماجار كاپيتالىنىڭ قاتىسۋىمەن احقو الاڭىندا ساۋدا-ينۆەستيسيالىق ينستيتۋتتار قۇرۋ، IT جانە بانكتىك كونسالتينگ سالاسىنداعى ينۆەستيسيالىق جوبالاردىڭ ىسكە اسىرۋ بارىسى جونىندە، سونداي-اق ەكونوميكالىق ىنتىماقتاستىقتى ودان ءارى كەڭەيتۋ بويىنشا جوسپارلار تۋرالى ەگجەي-تەگجەيلى حابارلادى.