سىيلىق العان ديرەكتور مەن ءمۇعالىم قىلمىستىق جاۋاپكەرشىلىككە تارتىلادى

بۇل انتيكوردىڭ مالىمدەمەسى.

ۆەدومستۆوعا 1424 Call-ورتالىعى ارقىلى مەكتەپتەردەگى اقشا جيناۋ فاكتىسى بويىنشا 20-دان استام شاعىم تۇسكەن، دەپ حابارلايدى Almaty-akshamy.kz

سىبايلاس جەمقورلىققا قارسى ءىس قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ اقپاراتىنا سايكەس، مەكتەپتە سىيلىق العان ديرەكتور مەن ءمۇعالىم قىلمىستىق جاۋاپكەرشىلىككە تارتىلادى.

"جىل سايىن مەكتەپتەردە سوڭعى قوڭىراۋلار، ءبىتىرۋ كەشتەرى جانە مۇعالىمدەر مەن مەكتەپ ديرەكتورلارىنا قىمبات سىيلىق الىپ جاتادى. وقۋشىلاردىڭ اتا-انالارى قوسىمشا شىعىنداردى كوتەرمەۋى كەرەك. قازاقستاندا ورتا ءبىلىم تەگىن. بارلىق مەكتەپتە الىمدارعا قاتاڭ تىيىم سالىنادى"، - دەيدى اگەنتتىك ماماندارى.

ديرەكتور مەن ءمۇعالىم سىيلىق العان جاعدايدا قىلمىستىق جاۋاپكەرشىلىككە تارتىلادى.

"مەكتەپ ديرەكتورلارى زاڭسىز ماتەريالدىق سىياقى مەن پارا العانى ءۇشىن اكىمشىلىك جانە قىلمىستىق جاۋاپكەرشىلىككە تارتىلادى. اكىمشىلىك سىبايلاس جەمقورلىق ءۇشىن 600 اەك ايىپپۇل سالىنادى، ال قىلمىستىق جاۋاپكەرشىلىككە تارتىلسا، مۇلكى تاركىلەنە وتىرىپ، پارا سوماسىنىڭ 20 ەسەلەنگەن مولشەرىندە ايىپپۇل سالۋدان باستاپ 15 جىلعا دەيىنگى مەرزىمگە باس بوستاندىعىنان ايىرۋ جازاسى بەلگىلەنەدى. ال مۇعالىمدەرگە قۇنى 10 اەك-تەن اساتىن سىيلىق بەرۋگە تىيىم سالىنادى. ەگەر زاڭبۇزۋشىلىق بولعان جاعدايدا 2000 اەك دەيىن ايىپپۇل تۇرىندەگى قىلمىستىق جاۋاپكەرشىلىككە تارتىلادى"، - دەپ جازىلعان انتيكور حابارلاماسىندا.

اتا-انالاردان نەمەسە قىزمەتكەرلەردەن اقشا جيناۋ فاكتىلەرى، سونداي-اق باسقا دا سىبايلاس جەمقورلىق تۋرالى 1424 Call-ورتالىعىنا شاعىمدانۋعا بولادى.