سىيلاستىق شكالاسى دەگەنىمىز نە؟!
ەل اراسىندا «سىيلاعاننىڭ قۇلىمىز» دەپ جاتادى. اسا تەرەڭ ايتىلعان وي. بۇگىنگىدەي قاربالاس زاماندا وسى ءسوزدىڭ ءتىپتى دە ءقادىرى ارتقان سياقتى.
سىيلاستىق ۇلگىسى. ءسوزىمىز جاندى بولۋى ءۇشىن شەجىرەنى سويلەتەلىك. تاريحتا پاتشا وكىمەتىنە قارسى شىققان ماحامبەت پەن يساتاي باتىرلار وتكەن. ولاردىڭ وتان الدىندا جاساعان ەرلىگى، باتىلدىعى، باتىرلىعى بولەك اڭگىمە. ماحامبەت اتامىز سەرىگى، جان دوسى يساتاي باتىرعا دەگەن سىيلاستىعى ەرەكشە بولعانعا ۇقسايدى. ءتىپتى دۇنيەدەن وتكەن شاعىندا قيماۋى، ولەڭ ارناۋى وسىنىڭ دالەلى دەسەك، ارتىق ايتپاعاندىق. بارلىعىن سارالاعاندا، دوستىقتىڭ باستاۋى سىيلاستىقتا تۇر دەر ەدىك.
سونداي ءبىر كورىنىستى كەنەسارى حان تۋرالى اڭىزدان بايقايمىز. حاننىڭ اسكەرى الدىنداعى ابىرويى تىم بيىك بولىپتى. بىردە 500 جاساعىمەن ۇرىستا جاۋ قورشاۋىندا قالىپتى. سوندا وزەننەن وتە الماي جاتقان تۇستا ۇزەڭگىلەستەرى وعان ءوز اتىن ۇسىنىپ، قورشاۋدان شىعۋعا، امان-ەسەن قالۋىنا جاندارىن سالىپتى. وسىنداي شىن ىقىلاستى قۇرمەت ءجيى قايتالانعانعا ۇقسايدى. ءبىراق، حان كەنە ەش ۋاقىتتا ءوز ساربازدارىن جاۋ قولىنا قالدىرماپتى. سىيلاستىقتىڭ ايرىقشا بەلگىسىنە وسى وقيعانى قالايشا جاتقىزبايمىز؟!
توپتاۋ. بۇرىنعى عۇلامالار «دۇنيەنىڭ ەڭ ءتاتتىسى – سىيلاستىق» دەپتى. جوعارىداعى مىسالداردى توپتاعانداعى شىعاتىن وي وسى. ال سىيلاستىقتى ءبىلدىرۋدىڭ جولدارىن اركىم ءوزى بىلەر. سىيلى بولۋ – ابىروي، سىيلاي ءبىلۋ – ادامدىق دەمەكپىز.