سىبايلاس جەمقورلىققا قارسى سانانى قالىپتاستىرۋ قوعامداعى پاراقورلىقتى جويۋ جولىنداعى ماڭىزدى قادام بولىپ تابىلادى.
بۇل تۋرالى وكق الاڭىندا وتكەن بريفينگتە ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى ارمان راحيموۆ مالىمدەدى، دەپ حابارلايدى Almaty-akshamy.kz.
جوبانىڭ ماقساتى – ازاماتتاردى، قوعامدىق بىرلەستىكتەردى، كاسىپكەرلىك سۋبەكتىلەرى مەن كۆازيمەملەكەتتىك سەكتورلاردى، سونداي-اق باسقا دا ۇيىمداردى سىبايلاس جەمقورلىققا قارسى ءىس-شارالارعا ۆولونتەر رەتىندە تارتۋ.
«2023 جىلدىڭ تامىز ايىنان باستاپ «سىبايلاس جەمقورلىققا قارسى ۆولونتەرلىك» جوباسى ءساتتى جۇزەگە اسىرىلۋدا، وعان الماتى قالاسىندا 260-تان استام ازامات قوسىلدى»، - دەدى ارمان راحيموۆ.
وكق سپيكەرى قىسقا مەرزىمدە بەلگىلى ناتيجەلەرگە قول جەتكىزىلگەنىن اتاپ ءوتتى. وسىلايشا، مەملەكەتتىك ساتىپ الۋ مونيتورينگى بارىسىندا 312 ميلليون تەڭگەدەن استام بيۋدجەت قاراجاتىن ۇنەمدەۋگە قول جەتكىزدى.
بالالار ويىن الاڭدارىنا، سالىنىپ جاتقان نىساندارعا، اسفالتبەتون توسەنىشتەرى مەن باسقا دا الەۋمەتتىك نىساندارعا مونيتورينگ جۇرگىزىلدى.
مەملەكەتتىك ساتىپ الۋ مونيتورينگىنىڭ قورىتىندىسى بويىنشا اۋدان اكىمدىگىمەن جالپى قۇنى 1،3 ملرد تەڭگەنى قۇرايتىن «240 اۋلا اۋماقتارىنا جوندەۋ جۇرگىزۋ» تۋرالى حابارلاندىرۋ جاريالانعانى انىقتالدى. كەلىسىمشارتتى تەكسەرۋ كەزىندە قىزمەت اقىسى تولىق كولەمدە تولەنگەنى انىقتالدى. الايدا، ۆولونتەرلىك توپ كوشپەلى مونيتورينگ جۇرگىزۋ بارىسىندا سپورتتىق قۇرال-جابدىقتاردىڭ جەتكىلىكسىزدىگى (اتكەنشەك، باسكەتبول قالقاندارى، كوشە ترەناجەرلەرى)، ورىندىقتاردىڭ، قوقىس جاشىكتەرى مەن سىرتقى جارىقتاندىرۋ قۇرىلعىلارىنىڭ جوقتىعى سەكىلدى ت.ب. بۇزۋشىلىقتاردى انىقتادى. اتالعان فاكتى بويىنشا اۋدان اكىمدىگىنە حات جولدانىپ، ناتيجەسىندە كەمشىلىكتەر جويىلدى.
سىبايلاس جەمقورلىقتىڭ الدىن الۋ بويىنشا جۇمىس قوعام قايراتكەرلەرىمەن، ۇكىمەتتىك ەمەس ۇيىمداردىڭ، ازاماتتىق اليانستاردىڭ وكىلدەرىمەن، بيزنەس بەلسەندىلەرىمەن جانە جاستار قوزعالىسىنىڭ جەتەكشىلەرىمەن تىعىز بايلانىستا جۇرگىزىلەدى.
«جىل باسىنان بەرى سىبايلاس جەمقورلىققا قارسى مادەنيەتتى قالىپتاستىرۋ اياسىندا ءتۇرلى فورماتتاعى 50 ءىس-شارا وتكىزىلدى، وعان 3 مىڭنان استام ادام قاتىستى»، - دەدى ا. راحيموۆ.
ول ءسوز سوڭىندا، قوعام سىبايلاس جەمقورلىق تاۋەكەلدەرىنە سىرتقى تالداۋ جۇرگىزۋگە، سىبايلاس جەمقورلىقپەن كۇرەسۋگە باعىتتالعان ءتۇرلى ءىس-شارالاردى ۇيىمداستىرۋعا، وزەكتى ماسەلەلەردى تالقىلاۋعا قاتىساتىنىن اتاپ ءوتتى.