سىياقى كولەمى انىقتالعان قىلمىستىڭ ساناتىنا قاراي بەلگىلەنەدى.
وتكەن جىلى تۇركىستان وبلىسىندا سىبايلاس جەمقورلىق قىلمىسى بويىنشا حابار بەرگەن 5 ازامات سىياقى العان. بيىل تاعى ەكى تۇرعىن اتالعان سىياقىعا قول جەتكىزدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سىياقى مولشەرى انىقتالعان قىلمىستىڭ ساناتىنا بايلانىستى بەلگىلەنگەن.
«زالال مولشەرى 1000 ايلىق ەسەپتىك كورسەتكىشتەن اساتىن بولسا، 10 پايىزدىق تەتىك قولدانادى. مىسالى، 6 ملن تەڭگە زالال كەلتىرىلسە، حابارلاۋشىعا 600 000 تەڭگە تولەنەدى. ال، ەڭ كوپ مەملەكەتتىك كەپىل رەتىندە بەرە الاتىن سوما 12 ملن تەڭگەنى قۇرايدى. ول ءۇشىن حابار بەرۋشى 120 ملن تەڭگە زالال كەلتىرىلگەن قىلمىس تۋرالى حابارلاۋى كەرەك»، - دەدى سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى سامەت نۇرداۋلەت.
ايتا كەتەيىك، جالپى تۇركىستان وبلىسىندا سىبايلاس جەمقورلىق قىلمىسى 2 ەسەگە وسكەن. وتكەن جىلدىڭ ءبىرىنشى توقسانىندا 12 قىلمىس تىركەلسە، بيىل 35 قىلمىس انىقتالىپ وتىر. سىبايلاس جەمقورلىق قىلمىستارىنىڭ باسىم بولىگى جەرگىلىكتى اتقارۋشى ورگاندار مەن قۇقىق قورعاۋ سالالارىندا جانە قارجى، اۋىل شارۋاشىلىعى، دەنساۋلىق ساقتاۋ مەن ءبىلىم بەرۋ مەكەمەلەرىندە ورىن العان.