قازاقستان حالقىنا جولداۋىن جاريالاعان پرەزيدەنت قاسىم-جومارت توقايەۆ كومىرتەكتى بەيتاراپتىققا كوشۋدى جەدەلدەتەتىن فاكتوردى اتادى، دەپ حابارلايدى قازاقپارات ءتىلشىسى.
«حالىقارالىق ساراپشىلاردىڭ پىكىرىنشە، جاھاندىق كۇردەلى سالىمداردىڭ ۇشتەن ءبىر بولىگى ءقازىردىڭ وزىندە جاڭارتىلاتىن ەنەرگەتيكا جوبالارىنا تيەسىلى. قازاقستاندا دا ۇلكەن جۇمىس اتقارىلدى، جاڭا ەكولوگيالىق كودەكس جانە 2060 جىلعا دەيىن كومىرتەكتى بەيتاراپتىققا قول جەتكىزۋ ستراتەگياسى قابىلداندى. گەنەراسيانىڭ جالپى كولەمىندەگى جاڭارتىلاتىن ەنەرگەتيكانىڭ ۇلەسى سوڭعى بەس جىلدا 5%-عا دەيىن ءوستى. 2027 جىلعا قاراي تاعى 1،4 گيگاۆاتت قۋات ەنگىزىلەدى»، - دەدى پرەزيدەنت.
مەملەكەت باسشىسى ەلدەگى ەنەرگەتيكالىق بالانس قۇرىلىمى وزگەرگەنىن ايتىپ، بۇكىل ەنەرگەتيكا سالاسىن باسقارۋ تاسىلدەرىن جەتىلدىرۋ قاجەت ەكەنىن اتاپ ءوتتى.
«سۋتەگى گەنەراسياسىن دامىتۋ قاجەت. گەنەراسيالاۋ وبەكتىلەرىن كەڭەيتۋ-تەحنولوگيالاردى ترانسفەرتتەۋ جانە ەنەرگەتيكالىق ماشينا جاساۋدا ءوندىرىستى وقشاۋلاۋ، اككۋمۋلياتور ونەركاسىبىن قۇرۋعا نەگىز بولماق. باقىتىمىزعا وراي، بىزدە شيكىزات جەتكىلىكتى. تەڭدەستىرۋ قۋاتىن، ەنەرگيانى جيناقتاۋ جۇيەسىن قۇرۋ سالاسىندا جاڭا شەشىمدەر قاجەت. كومىرتەكتى بەيتاراپتىققا كوشۋدى پارنيكتىك گازدار شىعارىندىلارىنا كۆوتا ساۋداسى جەدەلدەتۋى مۇمكىن. ۇكىمەت پەن بيزنەس وسى باعىتتارداعى مۇمكىندىكتەردى پايدالانۋى كەرەك»، - دەپ توقتالدى پرەزيدەنت.