ءسۇت ونىمدەرىنە قاتىستى تاڭبالاۋ تالاپتارى كۇشەيدى

ءسۇت ونىمدەرىنىڭ جوعارى ساپاسى مەن قاۋىپسىزدىگىن قامتاماسىز ەتۋگە باعىتتالعان وزگەرىستەر كۇشىنە ەنەدى. 

بۇل وزگەرىستەر ءسۇت ونىمدەرىنىڭ جوعارى ساپاسى مەن قاۋىپسىزدىگىن قامتاماسىز ەتۋگە باعىتتالعان، دەپ حابارلايدى Almaty-akshamy.kz

«بيىلعى 22 قىركۇيەكتەن باستاپ ەۋرازيالىق ەكونوميكالىق كوميسسيا كەڭەسىنىڭ 2022 جىلعى 23 قىركۇيەكتەگى №143 شەشىمى نەگىزىندە «ءسۇت جانە ءسۇت ونىمدەرىنىڭ قاۋىپسىزدىگى تۋرالى» تەحنيكالىق رەگلامەنتىنە ەلەۋلى وزگەرىستەر كۇشىنە ەنەدى. »، - دەلىنگەن قازاقستان ستاندارتتاۋ جانە مەترولوگيا ينستيتۋتىنىڭ مالىمەتىندە.

2013 جىلدان تەحنيكالىق رەگلامەنت العاش رەت قولدانىسقا ەنگىزىلگەن كەزدە، ونى قولدانۋ پراكتيكاسى ءسۇت ونىمدەرىن وندىرۋشىلەرگە دە، تۇتىنۋشىلارعا دا قاتىستى ءبىرقاتار ماڭىزدى ماسەلە بويىنشا ناقتىلاۋ جۇمىسى قاجەت ەكەنى انىقتالدى.

اتالعان ينستيتۋت ساراپشىلارىنىڭ ايتۋىنشا، وسىمدىك مايلارىنىڭ قوسىلعانى تۋرالى اقپاراتتى ءسۇت ونىمدەرى قۇيىلعان قاپتامادا مىندەتتى تۇردە ورنالاستىرۋ نەگىزگى وزگەرىستەردىڭ ءبىرى سانالادى. بۇل ءوز كەزەگىندە ادامدارعا ءونىمدى ساتىپ الۋ كەزىندە دۇرىس مالىمەت الۋىنا ىقپال ەتەدى.

سونىمەن قاتار، بالالار تاعامى ونىمدەرىن سايكەستەندىرۋدىڭ فيزيكا-حيميالىق كورسەتكىشتەرى وزگەردى. بۇل رەتتە د دارۋمەنى مولشەرىنىڭ شەكتى دەڭگەيى ۇلعايتىلدى. وسى وزگەرىستەر بالالار تاعامىن ءوندىرۋدى تۇراقتاندىرۋعا جانە تۇتىنۋشىلاردى جوعارى ساپالى ونىمدەرمەن قامتاماسىز ەتۋگە مۇمكىندىك بەرەدى.

جاڭا تۇزەتۋدە ايران، سۇزبە، قۇرت سياقتى ۇلتتىق ءسۇت ونىمدەرى قامتىلىپ، ولاردىڭ نارىققا كەڭىنەن شىعارۋ ەسكەرىلگەن.