بۇگىن الماتى قالاسىنىڭ تۇرعىندارى ەرەكشە وقيعاعا كۋا بولدى. «اتاكەنت» كورمە ورتالىعى الدىنداعى سەرۋەندەۋ ايماعىندا وتەتىن تازالىق اكسياسى بارىسىندا قالانىڭ تازالىعىن قامتاماسىز ەتۋشى قىزمەتكەرلەرگە كۇتپەگەن جەردەن كومەككە سۋپەرقاھارماندار كەلدى. ولاردىڭ قاتارىندا حالك، ورمەكشى ادام، بەتمەن جانە سۋپەرمەن بولدى. بۇل تانىمال كەيىپكەرلەر كوشەلەردى سىپىرىپ، تۇرعىندارعا قالانى تازا ۇستاۋ قاجەتتىگىن ناسيحاتتادى، دەپ حابارلايدى aqshamnews.kz.
سۋپەرقاھارماندار الەمدى قۇتقارۋ سىندى ۇلكەن ىستەرمەن اينالىسقانىنا قاراماستان، قالا كوشەلەرىن جيناۋعا كىرىستى. ورمەكشى ادام تۇرعىنداردى تازالىققا اتسالىسۋعا شاقىرىپ، تروتۋارلاردى تازالاۋعا كومەكتەستى.
– مەن الماتىعا ارنايى تازالىق شاراسىنا قاتىسۋ ءۇشىن كەلدىم. كومانداممەن بىرگە شامامەن ءبىر ساعات بويى سىپىرعىشپەن جۇمىس ىستەدىك. تۇرعىندارعا جاقىنداپ، بىرگە تازالىق جۇرگىزۋگە شاقىردىم. كەيبىرەۋلەرى كەلىسىپ، كومەكتەستى، ال كەيبىرەۋلەرى باس تارتتى. ءبىر قىزىلوردالىق ازامات الماتىنىڭ تازالىعىن جوعارى باعالاپ، مۇندا سەنبىلىكتەر ءجيى وتەتىنىن ايتتى. سونداي-اق، بالالاردى دا تازالىققا ۇيرەتتىم – ولار بۇل ىسكە قۋانا-قۋانا كىرىستى، – دەپ ءبولىستى ورمەكشى ادام.
بەتمەن مەن سۋپەرمەن كوشە تازالاۋشىلاردىڭ اربالارىن كولىككە جەتكىزۋگە كومەكتەسسە، حالك جولدا تۇرىپ قالعان ساموسۆالدى يتەرىپ جىبەردى.
– بۇل مەن ءۇشىن جاڭا تاجىريبە بولدى. دۇنيەجۇزىلىك بەيبىتشىلىك ءۇشىن كۇرەسپەن سالىستىرۋعا بولادى. دۆورنيكتەردىڭ ەڭبەگى زور، ولاردى قاتتى قۇرمەتتەيمىن. ءبىزدىڭ قالامىزدا وتە قوناقجاي ادامدار تۇرادى، ولار ءاردايىم قالانىڭ تازالىعىن قولدايدى، – دەدى انيماتور رۇستەم عادايەۆ.
تازالىق قىزمەتكەرلەرى باستاپقىدا مۇنى جاي عانا كوڭىل كوتەرۋ دەپ ويلادى. الايدا، سۋپەرقاھارمانداردىڭ شىنايى تۇردە تازالىققا ارالاسقانىن كورىپ، كۇلىمسىرەپ، ولارعا العىستارىن ءبىلدىردى.
– بۇگىن ءبىز «اتاكەنت» اۋماعىندا سەنبىلىك وتكىزىپ جاتقان ەدىك. سول كەزدە سۋپەرقاھارماندار كەلىپ، ءبىزدىڭ جۇمىسىمىزعا كومەكتەستى. ولار سىپىرعىشتاردى الىپ، بىزگە ىستىق شاي ۇسىندى. بۇل ءبىزدىڭ ەڭبەگىمىزدى باعالاۋدىڭ ەرەكشە بەلگىسى بولدى. بارشا تۇرعىنداردى قوقىستى قوقىس جاشىگىنە تاستاۋعا شاقىرامىن، بۇل ءبىزدىڭ جۇمىسىمىزدى جەڭىلدەتەر ەدى. ۇيىمداستىرۋشىلارعا راحمەت! – دەدى تازالاۋشى تاتەي قىستاۋبايەۆا.
بۇل اكسياعا جاقىن ماڭداعى ءدامحانالار مەن دۇكەندەردىڭ قىزمەتكەرلەرى دە نازار اۋداردى. كوپشىلىگى سۋپەرقاھارماندارمەن بىرگە سۋرەتكە ءتۇسىپ، ءوز العىستارىن ءبىلدىردى.
– مەن الماتى قالاسىنىڭ تۇرعىنىمىن. بۇگىن سۋپەرقاھارمانداردىڭ كوشەلەردى تازالاپ جۇرگەنىن كورىپ، تاڭقالدىم. قالانىڭ تازالىعى ءۇشىن وسىنداي شارالاردى ۇيىمداستىرىپ جاتقان اكىمدىككە العىسىمدى بىلدىرەمىن. جىل سايىن الماتى بۇرىنعىدان دا تازا جانە كوركەم بولىپ كەلەدى. تازالاۋشىلارعا ارنالعان جاڭا تەحنيكا الىنىپ، ولاردىڭ ەڭبەگى جەڭىلدەپ جاتىر. قالا تازالىعىن ساقتاپ جۇرگەن تازالىق قىزمەتكەرلەرىنىڭ ەڭبەگى زور، – دەدى ساۋدا ورتالىعىنىڭ قاۋىپسىزدىك قىزمەتىنىڭ باسشىسى قانات دۇيسەنبييەۆ.
بۇل شارا تۇرعىندارعا قالانىڭ تازالىعىن ساقتاۋ جاۋاپكەرشىلىگىن ەسكە سالىپ، تازالىق قىزمەتكەرلەرىنىڭ ەڭبەگىن جوعارى باعالاۋعا شاقىردى.