سۇڭگۋىرلەر تەڭىزگە باتىپ كەتكەن ءۇش جىگىتتىڭ دە دەنەسىن تاپتى

كاسپيي تەڭىزىنىڭ تۇبىنە ءۇش مەتر تەرەڭدىككە سۇڭگۋ جۇمىستارىن جۇرگىزىلدى

16  مامىردا اقتاۋدا كاسپيي تەڭىزىندە سۋعا باتىپ كەتكەن ءۇش جىگىتتىڭ ءمايىتى تابىلدى. مارقۇمداردىڭ ءبىرى ءبىر كۇن بۇرىن، 15 مامىردا ۇيلەنگەن ەكەن. بۇل تۋرالى ماڭعىستاۋ وبلىسى توتەنشە جاعدايلار دەپارتامەنتى باسشىسىنىڭ ورىنباسارى بەكبولات ءابدىقادىروۆ ايتتى، دەپ حابارلايدى Almaty-akshamy.kz.

Lada.kz سايتىنىڭ مالىمەتىنشە، قايتىس بولعان ەكى قاراعاندىلىق اقتاۋعا دوسىنىڭ تويىنا  كەلگەن. 16 مامىردا دوستار تەڭىزگە شومىلۋعا شەشىم قابىلداعان. وسىلاي ۇشەۋى دە سۋعا باتىپ كەتكەن.

«سۋعا تۇسۋگە شەشىم قابىلداعان ەكى جىگىت سۋعا باتا باستاعان، ال ەكەۋى ولاردى قۇتقارۋعا ۇمتىلعان. دوستارىن قۇتقارۋ ءۇشىن سەكىرىپ كەتكەندەردىڭ ءبىرىن وقيعا كۋاگەرلەرى الىپ شىقتى. ول 26 جاستاعى بەينەۋ قالاسىنىڭ تۇرعىنى. ءقازىر جاعدايى قاناعاتتانارلىق، دارىگەرلەردىڭ قاراۋىنان كەيىن ۇيىنە شىعارىلدى»، - دەدى بەكبولات ءابدىقادىروۆ.

وقيعا ورنىندا ىزدەستىرۋ جۇمىستارىن جۇرگىزۋ بارىسىندا تجد كۇشتەرى جاعالاۋدان 1،5-2 مەتر قاشىقتىقتا كاسپيي تەڭىزىنىڭ تۇبىنە ءۇش مەتر تەرەڭدىككە سۇڭگۋ جۇمىستارىن جۇرگىزدى. سونداي-اق، وقيعا ورنىندا توتەنشە جاعدايلار دەپارتامەنتىنىڭ پسيحولوگيالىق قىزمەتىنىڭ توبى جۇمىس ىستەپ، سۋعا باتقان جاستاردىڭ جاقىندارىنا كومەك كورسەتتى.

«اۋا رايىنىڭ قولايسىزدىعىنا قاراماستان، قۇتقارۋشىلار كاسىبي جانە ءتيىمدى جۇمىس ىستەدى، از ۋاقىت ىشىندە سۋعا باتقان ءۇش ادامنىڭ دا دەنەسى تابىلىپ، سۋدان شىعارىلدى»، - دەدى بەكبولات ءابدىقادىروۆ.

وقيعا ورنىنان الكوگولدىك سۋسىندار تابىلعان.

ەسكە سالايىق، كاسپيي تەڭىزىندە شومىلۋ كەزىندە ءتورت جىگىت سۋعا باتىپ كەتكەن. ولاردىڭ ءبىرىن وقيعا كۋاگەرى امان الىپ قالدى، قالعان ۇشەۋى قۇتقارۋشىلار كەلگەنشە سۋعا باتىپ كەتتى.