ءسۇت بەزىنىڭ قاتەرلى ىسىگىندە قولتىق استىنداعى ليمفا تۇيىندەرى ءجيى زاقىمدالادى
كۇزەتتى ءليمفوتۇيىننىڭ بيپوسياسى نەمەسە Sentinel Lymph Node Biopsy (SLNB) – قاتەرلى ىسىكتىڭ شەكاراسىنان تىس قاتەرلى ۇدەرىستىڭ تارالۋىن انىقتاۋعا، ياعني ءسۇت بەزىنىڭ قاتەرلى ىسىگى كەزىندە ليمفا تۇيىندەرىندە ەڭ باستاپقى، ەرتە پروسەستەردى (مەتاستازداردى) انىقتاۋعا مۇمكىندىك بەرەتىن شاعىن ءينۆازيۆتى حيرۋرگيالىق ارالاسۋ. مۇنداي قوندىرعى الماتىلىق ونكولوگيالىق ورتالىقتا ورناتىلعانى تۋرالى ماممولوگيا بولىمشەسىنىڭ مەڭگەرۋشىسى سەرىك بايدىلبەكوۆ ايتىپ ءوتتى، دەپ حابارلايدى Almaty-akshamy.kz اتالعان ورتالىقتىڭ باسپا ءسوز قىزمەتىنە سىلتەمە جاساپ.
كۇزەتتى (دابىلدى) ليمفا ءتۇيىنى- بۇل ايماقتىق ليمفالىق باسسەيندەگى ءبىرىنشى ليمفا ءتۇيىن، ول ارقىلى ليمفا باستاپقى ىسىكتەن شىعىپ، ەڭ الدىمەن، ىسىك جاسۋشالارىمەن زاقىمدانادى.
كەزىندە ءسۇت بەزى ىسىگىن الىپ تاستاعان كەزدە، ولاردىڭ مەتاستازامەن زاقىمدانعانى انىقتاي الماعاني سەبەپتى، وعان جاقىن ورنالاسقان بارلىق ليمفا تۇيىندەر دە الىنعان. ليمفا ءتۇيىنىنىڭ رەزەكسياسى كەزىندە كۇزەتتى تۇيىنگە نەمەسە تۇيىندەر توبىنا اپاراتىن ليمفا تامىرلارى كەسىلەدى. بۇل ليمفانىڭ قالىپتى اعىنىن بۇزا وتىرىپ، ليمفا سۇيىقتىعىنىڭ قالىپتان تىس جينالۋىنا اكەلدى، بۇل ءوز كەزەگىندە ىسىنۋگە اپارادى.
ليمفوستاز ناۋقاستا زاقىمدانعان جەرىندە اۋىرسىنۋ مەن ىڭعايسىزدىقتى تۋدىرادى، ال اينالاسىنداعى تەرى قالىڭداپ قاتايادى. ليمفەدەمانىڭ دامۋ ىقتيمالدىعى جويىلعان ليمفا تۇيىندەرىنىڭ سانىنىڭ ۇلعايۋىمەن بولۋى مۇمكىن. «ءسۇت بەزىنىڭ قاتەرلى ىسىگىندە قولتىق استىنداعى ليمفا تۇيىندەرى ءجيى زاقىمدالادى».
بۇرىن ءبىز كەۋدە بۇلشىقەتتەرىنە جاقىن جەردە ورنالاسقان بارلىق ليمفا تۇيىندەرىمەن قوسا ىسىكتەردى الىپ تاستايتىنبىز. كوبىنەسە ليمفانى الىپ تاستاعان ادامداردا كەيىننەن «شوراياق» اۋرۋى دامي باستادى، باسقا سوزبەن ايتقاندا، ءبىز ءومىر ءسۇرۋ سالتىنا، قالىپتى تۇردە قوزعالۋعا كۇردەلى كەدەرگى كەلتىرەتىن جانە پسيحولوگيالىق ىڭعايسىزدىق تۋدىراتىن ليمفالىق ىسىكتەر تۋرالى ايتىپ وتىرمىز. ەندى وسى جابدىقتىڭ كومەگىمەن ىسىكتىڭ جانىنداعى ليمفا جۇيەسىنىڭ زاقىمدانعانىن انىقتاۋعا بولادى.
ول ءۇشىن ىسىكتىڭ جانىنا ارنايى زات ەنگىزەمىز، سودان كەيىن ارنايى جابدىقتى پايدالانا وتىرىپ، وسى زاتى بار ليمفا ءتۇيىنىن تابامىز. دابىلدى ليمفا ءتۇيىنى تابىلعاننان كەيىن تەرىگە كىشكەنە تىلىك جاساپ، ءتۇيىندى الىپ تاستايمىز. سودان سوڭ، پاتوگيستولوگ الىنعان كۇزەتتى ليمفو ءتۇيىندى ىسىك جاسۋشالارىنىڭ بارىنا زەرتتەيدى.
ەگەر دە قاتەرلى ىسىك انىقتالسا، حيرۋرگ قوسىمشا ليمفا تۇيىندەرىن دەرەۋ الىپ تاستاي الادى، ەگەر جوق بولسا، وندا ناۋقاس ليمفا جۇيەسىنە اۋقىمدى تراۆماتيكالىق ارالاسۋدان اۋلاق بولادى، تەك ىسىك جويىلادى»، - دەدى مامان. سەرىك بايدىلبەكوۆتىڭ ايتۋىنشا، ناۋقاستان ليمفا تۇيىندەرى نەعۇرلىم از الىنىپ تاستالسا، ىسىك جويىلعاننان كەيىن اسقىنۋ ىقتيمالدىعى سوعۇرلىم از بولادى.