الماتىدا الماتى قالاسى ءبىلىم باسقارماسىنىڭ ۇيىمداستىرۋىمەن الماتى سەرۆيس جانە تەحنولوگيالار كوللەدجىندە «ستيل سيقىرى» اتتى رەسپۋبليكالىق چەمپيونات ءوتىپ جاتىر.
ءىس-شارا قىزمەت كورسەتۋ سالاسى كادرلارىن دايارلاۋ باعىتىندا ۇيىمداستىرىلىپ، سۇلۋلىق پەن قىزمەت كورسەتۋ يندۋسترياسىنىڭ كاسىبي شەبەرلىگىن دامىتۋعا ارنالدى. چەمپيونات الماتى قالاسىن دامىتۋدىڭ 2025 جىلعا دەيىنگى جول كارتاسى مەن 2030 جىلعا دەيىنگى ورتا مەرزىمدى پەرسپەكتيۆالاردى ىسكە اسىرۋ اياسىندا جۇزەگە اسىرىلدى.
چەمپيوناتتا قاتىسۋشىلار بىرنەشە باعىتتا ءوز شەبەرلىكتەرىن كورسەتتى. شاشتاراز ونەرى بويىنشا كەشكى، كوكتەيلدىك، ۇيلەنۋ شاش ۇلگىلەرى مەن كرەاتيۆتى ەرلەر شاش ءسانى ۇسىنىلدى.
ماكياج ونەرى بويىنشا «گۇلدەر» تاقىرىبىنداعى شىعارماشىلىق بەينەلەر جاسالدى. ءىس-شاراعا ءبىلىم باسقارماسىنىڭ وكىلدەرى، الەۋمەتتىك سەرىكتەستەر جانە كوللەدجدىڭ وقىتۋشىلارى مەن ستۋدەنتتەرى قاتىستى.
الماتى سەرۆيس جانە تەحنولوگيالار كوللەدجى بۇل چەمپيوناتتىڭ ۇيىمداستىرىلۋىندا ەرەكشە ءرول اتقاردى. 70 جىلدىق تاريحى بار بۇل وقۋ ورنى شاشتاراز ونەرى مەن ساندىك كوسمەتيكا باعىتىندا كوپتەگەن مامانداردى دايارلاپ شىعاردى. كوللەدجدىڭ حالىقارالىق دەڭگەيدەگى جەتىستىكتەرى كوپ. وقۋ ورنى «جاس مامان» جوباسى اياسىندا وقۋ پروسەسىن جاڭعىرتتى، WorldSkills چەمپيوناتتارىنا قاتىسىپ، جۇلدەلى ورىندارعا يە بولدى، سونداي-اق فرانسيا، يتاليا جانە تۇركيا سياقتى ەلدەردە حالىقارالىق تاعىلىمدامالارعا قاتىستى.
چەمپيونات بارىسىندا قاتىسۋشىلاردىڭ جۇمىستارى جوعارى باعالاندى. «ستيل سيقىرى» چەمپيوناتى جۇمىسشى ماماندىقتاردىڭ بەدەلىن ارتتىرۋعا جانە جاستاردى كاسىپتىك وقىتۋعا تارتۋعا باعىتتالعان ماڭىزدى ءىس-شارا رەتىندە تانىلدى. ۇيىمداستىرۋشىلار بۇل چەمپيوناتتىڭ ەڭبەك نارىعىنىڭ تالاپتارىنا ساي جاڭا بۋىن كادرلارىن دايارلاۋعا ۇلەس قوسقانىنا سەنىمدى.