2024 جىلدىڭ ءبىرىنشى توقسانىندا سۇيىتىلعان مۇناي گازىنىڭ 1 ءليترى شامامەن 5 تەڭگەگە قىمباتتايدى. بۇل تۋرالى ەنەرگەتيكا ۆيسە-مينيسترى الىبەك جاماۋوۆ ايتتى، دەپ حابارلايدى اlmaty-akshamy.kz.
«بۇگىندە رەسپۋبليكادا ايىنا 135 مىڭ توننا سۇيىتىلعان مۇناي گازى وندىرىلەدى. تۇتىنۋ مۇنان كوپ. سوعان بايلانىستى تاپشىلىق تۋىندايدى. اۆتوموبيل يەلەرىنىڭ كوپشىلىگى سۇيىتىلعان مۇناي گازىنا اۋىسىپ جاتقانىن بىلەمىز. گاز بالونىن ورناتۋ رەتتەلمەيدى»، - دەدى ول ب ا ق وكىلدەرىنە ارنالعان بريفينگتە.
ونىڭ اتاپ وتۋىنشە، ءوندىرىس تۇتىنۋ كولەمىن قامتاماسىز ەتە الماي وتىر.
«سوندىقتان دا ءبىرقاتار شارا قابىلدادىق. تەڭىزشيەۆرويلمەن ىشكى نارىققا اي سايىن 10 مىڭ توننا گاز جەتكىزۋگە ۋاعدالاستىق. 13 قاراشادا سۇيىتىلعان مۇناي گازىنىڭ ەكسپورتىنا تولىق شەكتەۋ ەنگىزدىك. كازروسگاز كومپانياسىمەن ورىنبور مۇناي وڭدەۋ زاۋىتىنان سۇيىتىلعان مۇناي گازىنىڭ قوسىمشا كولەمىن باعىتتاۋ تۋرالى كەلىستىك. قازىرگى ۋاقىتتا تاپشىلىق بايقالمايدى»، - دەدى ۆيسە-مينيستر.
مۇنان بولەك ول كەلەسى جىلدان گاز باعاسى كوتەرىلەتىندىگىن ايتتى.
«ەنەرگەتيكا مينيسترلىگى گاز باعاسىن بىرتىندەپ كوتەرۋدى كوزدەيدى. 2024 جىلدىڭ ءبىرىنشى توقسانىندا سۇيىتىلعان مۇناي گازىنىڭ 1 ءليترى شامامەن 5 تەڭگەگە كوتەرىلەدى دەپ كۇتەمىز. ودان كەيىن الداعى 3 جىلدىڭ ىشىندە گاز باعاسى ءار 6 اي سايىن قىمباتتاپ وتىرماق»،- دەدى الىبەك جاماۋوۆ.